Ambutshi Wangɛnangɛna!

¹ Le nyu wanɛ wele ɛlɔngɔlɔngɔ ndo wasɛna lo nkumbo k’Akristo, yoho mɔtshi ya lânde yekɔ ya nyu ngɛnyangɛnya ambutshi anyu. Naka nyu kɛndakɛnda lo losembwe, kete ‘wa shɛnyu l’anyangɛnyu wayɔngɛnangɛna.’ (Tuk. 23:​22-25) Ambutshi anyu kombolaka nyosha nshi tshɛ kɛnɛ koleki ɔlɔlɔ. Ndoko ɛngɔ kokoki mbângɛnyangɛnya efula oko nyɛ̂na nyadja yimba lo mɛtɛ ndo nyakimɔ nsɛnɔ yanyu le Jehowa.

² Ande diɛsɛ dia monga l’ambutshi w’Akristo lee! Lakanyôtɔ, vɔ wekɔ lo nyolesha, nyɔlɔtsha, nyodjasha ndo nyokokɛ. Dikambo dioleki nto ele, vɔ salaka tshɛ dia nyolakanya woho wa nyu mbeya Jehowa la etsha ande wa losembwe; olowanyelo ɔsɔ kokaka kosha lɔsɛnɔ la pondjo. (Ef. 6:​1-4) Ngande ayoyɛnya lowando layɛ?

³ Nyɔsɛ Mɛtɛ la Nɛmɔ di’Efula: Ambutshi anyu wakasale tshɛ dia nyokimanyiya lo nyu mbɔsa mɛtɛ la nɛmɔ, pama lo nyuma ndo tshikala suke l’ɔlɔngɔswamelo wa Jehowa. Nyu kokaka mɛnya lowando lanyu lo mbidjaka yambalo dia mbɔtɔka lo wekelo wa lo nkumbo aha l’onto nyosokoya. Nyɛnya saki ka mbɔtɔ lo nsanganya, nyâmɛ nyɔsɛ yɛdikɔ dia ndjalɔngɔsɔla woho wa nkumbo koma la wonya. Nyodjasɛ suke l’ambutshi anyu ndo nyohokɛ lotui ɔlɔlɔ; nyoyele l’ekanda wekanyu. Nyosale tshɛ dia mbisha kɔmatɛrɛ. Nyoyale ambeki w’eshika lo Kalasa k’Olimu wa Teokrasi, nyetawɔke sala asawo ndo nyâlɔngɔsɔlake dimɛna efula. Lo Mbalasa ka Diolelo, nyosha lonya l’elimu wotshikitanyi wakambema. Lam’ayonyosalaka ɔnkɔnɛ, nyayoshikikɛka yimba lo kɛnɛ kele ɔlɔlɔ dia lonyuma lanyu.

⁴ Nyoyadje Eyango Watakotshaka Yema Yema. Tanyohembetɛke la sambishaka ngango ngango; nyonge la saki ka koma apandjudi w’eshika lushi lokina. Nyoyele ekongelo ka walelo wa Bible wa lomingu la lomingu, kana ndeka dimɛna kiâla tshɛ lo ndjela ekongelo k’onto ndamɛ. Nyonge l’oyango wa kotsha kɛnɛ kalɔmbama dia ndjakimɔ la tshondo le Jehowa ndo batizama. Ambutshi anyu kokaka nyokimanyiya dia nyu monga la tokanyi tasungana lam’atanyɔtɔ kalasa dia kondja elowanelo kɛmɔtshi kayonyokimanyiya dia kambɛ Jehowa lo tena la tena. Nyoyange dia monga la lokumu lakoka anto nyɔtɛkɛtɛ dia nyu kondja waɛsɛ wa lânde, oko olimu w’ombatshi mboka kana wa lo Bɛtɛlɛ. (Etsha 16:​1, 2) Nyoyadje eyango woho wa ‘nyu sɔna kɛnɛ koleki ohomba, dia nyu  . . . ndolanɛ l’elowa wa losembwe.’​—⁠Fil. 1:​10, 11.

⁵ Nshi y’ɔlɔngɔlɔngɔ ekɔ etena ka ndjalowanya, mbeya akambo ndo mbeka woho wa monga l’anto. Ekɔ etena kokokiso ngɛnangɛna la lɔsɛnɔ la ntondo ka tokanyi la ɛkɛndɛ watongaka l’epalanga tokomɛ. Sɔlɔmɔna akate ate: “Olongo a pami li, ongenangenaki lu nshi yaye y’olongolongo. Utema aye akongenyangenyaki lu nshi yaye y’olongolongo.” (Und. 11:⁠9) Naka nyu mbɔsa tɛdikɔ dia kambɛ Jehowa lo nshi yanyu y’ɔlɔngɔlɔngɔ, kete nyayokondja ɛtshɔkɔ wa pondjo.​—⁠1 Ek. 28:⁠9.

⁶ Naka nyu ‘ndjela akambo w’ɔlɔlɔ’ lo dihole dia “nsaki yatongaka lo nshi y’ɔlɔngɔlɔngɔ” kete ambutshi anyu hawotonga asolo l’olongo ndo hawotokiyana. (2 Tim. 2:​22, NW) Otema ayɛ wɛmɛ ayɔngɛnangɛna. (Tuk. 12:25) Kɛnɛ koleki ko, nyayɔngɛnyangɛnya Otungi anyu, Jehowa Nzambi.​—⁠Tuk. 27:⁠11.