Tôkoya Mbetawɔ Kawɔ
1 Ɔpɔstɔlɔ Paulo akɔ̂mbɔla mbetawɔ oko “dikongelo di’oshika dia akambo walongamɛso, ɔkɛnɛmwɛlɔ w’akambo wa mɛtɛ wahatɛnyi.” Nde akakotsha ate: ‘Aha la mbetawɔ hatokoke ngɛnyangɛnya Nzambi.’ (Hɛb. 11:1, 6, NW) Paulo akatolake dia sho mumbɔmbɔ la mbetawɔ, kamba latɔ ndo kiyela.—2 Kor. 4:13; Kol. 2:7; 2 Tim. 2:22.
2 Bible ndola la diɛnyɛlɔ di’ɛlɔlɔ dia mbetawɔ. Lo Heberu tshapita 11, Paulo shilaka ɔnɔngɔ w’otale w’ɛmɛnyi wakɛnya mbetawɔ kawɔ la ntondo k’ohemba tshɛ. Lɔkɔ kele ndo Abɛlɛ, omvuedi wa dietawɔ wa ntondo. Nɔa ekɔ lɔkɔ, nɛ dia oma lo mbetawɔ kande, nde akɛnya wɔma a Nzambi wahombama dia shimbɛ ase luudu lande. Abarahama tombwamaka oma lo mbetawɔ kande l’okitanyiya ande. Ndo Mɔsɛ, nɛ dia oma lo mbetawɔ kande nde akatshikala nge oko onto lakɛnaka Ɔnɛ lahɛnama. Diɛnyɛlɔ sɔ diaki efula heyama ko etena bu ka nde kɔndɔla akambo awɔ tshɛ, mbata Paulo. Ande lowando lele la so dia keketsha mbetawɔ kaso oma lo sɛdingola ‘etsha ɛsɔ wa lɔkɛwɔ l’ekila’ ndo ‘akambo asɔ wɛnama oma lo woho wakawamamema Nzambi’ lee!—2 Pet. 3:11.
3 L’eleko ka ntondo, Yeso akambola dimbola nɛ: “Lam’ayuya On’a untu, ndi ayutana mbetawo la kete?” (Luka 18:8) Ko onde, diɛnyɛlɔ dia mɛtɛ dia mbetawɔ diekɔ l’atei aso ɛlɔ kɛnɛ? Onde tɛnakɔ apami la amato, ɛlɔngɔlɔngɔ l’akɛnda, wɛnya mbetawɔ ka nge le Jehowa, oko akasale ekambi wa Nzambi lo nshi yakafundamaka Bible?
4 Diɛnyɛlɔ dia Nshi Nyɛ dia Mbetawɔ: Diɛnyɛlɔ di’ɛlɔlɔ dia mbetawɔ hadiohandɔ l’emamu aso! Mbetawɔ k’emendji watɔlɔmbɔla sunganaka mbokoyama. (Heb. 13:7) Koko aha vamɛ ato mbɛnya mbetawɔ k’ɔlɔlɔ. Etshumanelo tshɛ kekɔ l’anto wa kɔlamelo watetemala l’olimu wakambewɔ Jehowa oma ko edjedja, tena efula l’atei wa mpɛpɛ la asuku.
5 Akadiyɛso wa kɔlamelo, wanɛ wakikɛ wekamu ɛnɔnyi k’ɛnɔnyi oma le omi latohetsha, pombaka mandɔma. Ambutshi amɔtshi w’apami ndo wa amato wakatondoya vamɛ okakatanu wa mbodia ana. L’atei aso tekɔ la wadi waki edo waya esombe watetemala kamba elimu tshɛ wa l’etshumanelo, koko amɔtshi bu la nkumbo kâkimanyiya. (Enda lo Luka 2:37.) Mbetawɔ ya wanɛ wadiɛnɛ la hemɔ yahakɔnɔ tâmbiaka tena tshɛ. Efula wekɔ lo tetemala la kamba la kɔlamelo kânga mbewɔ la pâ yâshimba kondja waɛsɛ akina wa lo Teokrasi. Ɛmɛnyi ɛmɔtshi w’ɛlɔngɔlɔngɔ wakɛnya mbetawɔ la dihonga tshɛ kânga mbakiwɔ la wekamu la kalasa. Omamanelo aso le Nzambi keketalaka lam’endaso ambatshi mboka wa kɔlamelo watetemala ɔnɔnyi l’ɔnɔnyi, watokomɛ ekakatanu wa weolo. Oko Paulo, etena hatonga naka sho kɔndɔla kɛnɛ tshɛ kakɛnyi anangɛso l’akadiyɛso asɔ l’olimu wa Diolelo, etsha tshɛ wa mbetawɔ wakawasale!
6 Diɛnyɛlɔ sɔ dia mbetawɔ toshaka esambelo ndo ekeketshelo. (1 Tes. 3:7, 8) Sho kokaka mbokoya mbetawɔ kawɔ, nɛ dia “wanɛ wele la kɔlamelo ngɛnyangɛnyaka [Jehowa].”—Tok. 12:22, NW.