Tâkimanyiya Dia Vɔ Kamba Nto
1 Lam’akeye ɔpɔstɔlɔ Paulo ɔnɛ asekande Akristo wekɔ lo wâle wa lo nyuma, nde akafunde ate: “Etena ka nyu memo uma lu djo, kambukuka kakiane. Ne dia kakiane, panda kambuleka ndjala suki la su, uleki etena kakatetawo.” (Romo 13:11) Paulo akayakiyanyaka lo dikambo di’anango wakatɔkɔkala lo nyuma; nde aki la mposa ka mbâkeketsha dia vɔ mbasâsa nto.
2 Sho kokaka mbuta mɛtɛ ɔnɛ otsho w’andja ɔnɛ w’omusu ambodja edja ndo onya w’andja w’oyoyo otsha mpotɔ. (Romo 13:12) Sho kokaka mɛtɛ ndjakiyanya lo dikambo di’anangɛso wahayotshɔ la so latosambisha lokumu l’ɔlɔlɔ. Ɔnɔnyi wetshi, paka l’États-Unis oto, olekanyi apandjudi 27 000 wakâsasa nto. Ngande okokiso kimanyiya Akristo akina wa tosuasua dia vɔ kambɛ Jehowa nto na?
3 Kɛnɛ Kokoki Dikumanyi Sala: Akristo efula wa tosuasua hawomwe oma lo mɛtɛ; sambisha tsho mbahawayosambisha l’ɔkɔkɔ w’ɔkɔmwɛlɔ, ekakatanu awɔ vamɛ, saki ka lomombo kana ekiyanu ekina wa lo lɔsɛnɔ. (Luka 21:34-36) Lo yɛdikɔ yakoka, ndeka ɔlɔlɔ kimanyiya apandjudi la ntondo ka vɔ ndjokoma esukukadi. Naka opandjudi ɔmɔtshi hayokimɔ alapɔlɔ ande w’olimu ngɔndɔ tshɛ, kete sekeletɛrɛ ka l’etshumanelo ayewoya ɔnɔmbɔdi wa wekelo ande wa dibuku. Tɛdikɔ tayɔsama dia dikumanyi ntshɔ a towenda la ngelo. Dikumanyi pombaka sala tshɛ dia mbeya kiɔkɔ ya dikambo diakɔ ndo woho wakokawɔ mbôkimanyiya.—Enda lo Tshoto y’Etangelo ya Lovula 15, 1993 (lo Falase), lɛkɛ 20-23.
4 Woho Wakokaso Mbâkimanyiya: Efula l’atei aso mbeyaka onto ɔmɔtshi laya shuasua. Mbeyaka monga onto lakôkanaka la so efula ntondo. Ayotosala dia mbôkimanyiya na? Lande na kahayɛtɔla lakande dia mênda yema? Tɛ̂nde ɔnɛ nde hayokotshindɛ. Yâla l’ɔngɛnɔngɛnɔ ndo l’eshikikelo. Tɛ̂nde ɔnɛ wɛ ndjakiyanyaka lo dikambo diande aha la mbôkiya ɔnɛ nde ekɔ la hemɔ lo nyuma. Kɔndɔla akambo washa ekeketshelo kana awui akina w’ɛlɔlɔ wasala etshumanelo. Tɛ̂nde la wangasanu tshɛ dia losanganya la distrikɛ “Akɛndji wa Wɔladi a Nzambi.” Keketshande dia nde ntshɔ lo losanganya la distrikɛ naka lɔ latasalema. Nde mbeyaka kimanyiyama efula naka nde mbɔtɔnɛ l’etshumanelo nto oleki woho okina tshɛ. Sɛngɔlande dia nyu ntshɔ lo nsanganya. Ewoya dikumanyi woho wakandasadi lam’akawote.
5 Lam’aya Okristo wa shuasua oya lo nsanganya nto, ondo nde ayoka sɔnyi lam’ayondɛna anto amɔtshi wakandeyaka. Tonyowombolake ɔnɛ: “Lende akayatshu?” Koko, nyokimanyiya dia nde mboka ɔnɛ nyambôlongola dimɛna. Nyosawole la nde. Nyowewɔnya l’anto wahandeye. Nyodjasɛ suke la nde lo losanganya ndo nyênde kana nde ekɔ la buku di’esambu kamɛ ndo mukanda wekanyu. Nyôkeketsha dia nde ndja nto ndo nyowote ɔnɛ nyu nangaka mbôkimanyiya naka nde ekɔ l’ohomba w’ekimanyielo.
6 Lam’ele vɔ wekɔ la ngandji k’efula le wanɛ washishɔ, Jehowa la Yeso ngɛnangɛnaka lam’akalangana anto wa ngasɔ lo nyuma. (Mal. 3:7; Mat. 18:12-14) Ndo sho tayonga l’ɔngɛnɔngɛnɔ akɔ naka tayokimanyiya Akristo dia vɔ kambɛ Jehowa nto.