Ekadimwelo Lo Wembola Anyu

◼ Onde âkasungana mbeka Bible l’ɔnangɛso ɔmɔtshi lahayosalangana, naka sho nɔmba ose kɔmite k’olimu ka l’etshumanelo?

Dikumanyi diekɔ l’ɔkɛndɛ wa ndesha ase etshumanelo, mbidja ndo wanɛ wahayosalangana. Vɔ ntshɔka atowaenda ndo kanyiyaka di’ekimanyielo kahomba onto l’onto l’atei awɔ nongola. Tena dimɔtshi tongaka ohomba dia sɛngɔla onto lahayosalangana dia mbeka la nde Bible. Dibuku Organisés pour bien remplir notre ministère mɛnyaka lo lɛkɛ 103 ɔnɛ kɔmite k’olimu ka l’etshumanelo mbahomba shikikɛ akɔna ayokondja ekimanyielo ka ngasɔ.

Omendji w’olimu ayota akɔna okoki mɛtɛ mbôkimanyiya, kɛnɛ kayowɔsɛdingola ndo okanda akɔna wayoleka sungana vɔ mbeka. Ondo ayoleka dimɛna ɔnɛ lakawetsha kana onto leyande ndo lalangande mbôkimanyiya. Kokaka nɔmba kadiyɛso kɛmɔtshi kele l’akoka ndo kambotshunda lo nyuma dia nde kimanyiya kadiyɛso kahayosalangana. Oko okodiotshamaka, kema ohomba dia opandjudi okina tshindɛ ɔnɛ lalɔmbɔla wekelo. Naka wambotɛ onto lahomba mbeka la nde, kete nde kokaka mbadiaka wenya, waembwelo, ndo wekelo.​—⁠Enda l’Olimu Aso wa Diolelo wa Ngɔndɔ ka Sato 1988, lɛkɛ 3.

Lam’ele onto leka ambobatizamaka, hatongaka ohomba dia wekelo ndjâla ɔtshɔlɔlɔ. Oyango aso ele kimanyiya ɔnɛ lahayosalangana dia nde tatɛ ntshɔ nto lo nsanganya ndo ndjâla nto opandjudi wasambisha lokumu l’ɔlɔlɔ ngɔndɔ tshɛ. Omendji w’olimu ayoyâshikikɛka di’ohamelo a wanɛ weka ngasɔ. Ekimanyielo kɛsɔ koludi la ngandji pombaka konya anangɛso asɔ lo vɔ kotsha ɛkɛndɛ awɔ la ntondo ka Jehowa ndo dia vɔ ‘mbika edio ndo shikikala’ nge lo sɔlɔ.​—⁠Ef. 3:17; Ngal. 6:⁠5.