Ekadimwelo lo wembola anyu
◼ Ngande wakokaso kimanyiya onto lakɔlɛ lo nyuma edja efula dia nde nyomonga l’akoka w’opandjudi wa lokumu l’ɔlɔlɔ?
Naka onto lakɔlɛ lo nyuma ambɛnya dia nde ekɔ la nsaki k’efula ka nyomokambɛ Jehowa, kete ɔsɔ ekɔ dikambo di’ɔngɛnɔngɛnɔ. (Luka 15:4-6) Ondo onto akɔ aketawɔ dia ɔlɔshamelo kana ekakatanu wa lo lɔsɛnɔ mbôshimba dia salaka wekelo w’onto ndamɛ, mbɔtɔka lo nsanganya kana tombaka l’esambishelo. Lâsɔ, yoho yakɔna yoleki ɔlɔlɔ yakokaso mbokimanyiya dia nde mbeya pama lo nyuma na?
Onto tshɛ l’atei aso pombaka mbɔsa yɛdikɔ ya mbɔkɛnɛmɔlɛ ngandji kaso k’oshika k’Akristo. Dikumanyi wayongaka suke suke dia mbôkimanyiya l’ehomba ande wa laande wa lo nyuma. (Jak. 5:14, 15) Naka atonge edja kɔ̂dinde lo nyuma, kete nde mbeyaka monga tsho l’ohomba w’ekimanyielo k’oma le opandjudi ɔmɔtshi wahokɔ awui dia nde nyomɔhɛtahɛta nto l’esambishelo. Koko, naka onto ɔsɔ amangana l’etshumanelo edja efula, kete ondo nde ayonga l’ohomba w’ekimayielo k’efula. Dia keketsha mbetawɔ ndo lowando lande l’akambo wa lo nyuma nto, mbeyaka monga ohomba mbeka la nde Bible lo dibuku dimɔtshi diasungana. L’etena kɛsɔ, omendji w’olimu ayɔlɔngɔsɔla di’opandjudi ɔmɔtshi wahokɔ awui nɔmbɔla wekelo ɔsɔ. (Heb. 5:12-14; enda lo sawo diele l’ɔtɛ a dui ɔnɛ: Ekadimwelo lo Wembola Anyu l’Olimu Aso wa Diolelo wa Ngɔndɔ ka Dikumi l’Ɔtɔi 1998.) Naka wɛ mbeyaka onto ɔmɔtshi lele l’ohomba wa woho w’ekimanyielo ka ngasɔ, kete ewoya omendji w’olimu wa l’etshumanelo kanyu.
La ntondo ka mbetawɔ di’onto lakɔlɛ lo nyuma edja k’efula tomba nto l’olimu w’esambishelo, ekɔ ohomba dikumanyi dihende mbidjasɛ la nde dia sɛdingola kana nde amboyalowanya oko opandjudi wa Diolelo. Vɔ wayoyela ɛsɛdingwelo ka woho watowosalaka l’onto lalanga koma opandjudi wa lokumu l’ɔlɔlɔ. (Enda lo Tshoto y’Etangelo ya Ngɔndɔ ka Dikumi l’Ɔtɔi 15, 1988, lɛkɛ 17.) Ɔnɛ lakɔlɛ lo nyuma pombaka monga la nsaki k’efula ka sambisha lokumu l’ɔlɔlɔ kâmɛ l’anto akina. Nde lawɔ pombaka kotsha awui walɔmbawɔ le opandjudi wofundami lo dibuku Notre ministère lɛkɛ 98-99 ndo mbɔtɔka mbala la mbala lo nsanganya ya l’etshumanelo.
Monga la mbekelo y’ɔlɔlɔ ya lo nyuma ayokimanyiya ɔnɛ lambokalola dia nde keketsha ndo nama diɔtɔnganelo di’oshinga wolo diele lam’asande la Jehowa ndo mbokimanyiya dia tetemala la kɛndakɛnda lo mboka k’otsha lo lɔsɛnɔ la pondjo. (Mat. 7:14; Heb. 10:23-25) Naka nde mbidja ‘welo tshɛ’ ndo pamia waonga w’Okristo wahashishɔ, kete nde hatokoma nto ombeki w’Okristo wa ‘shuwasuwa kana wahatɔ elowa.’—2 Pet. 1:5-8.