Weshasha Wakimɔma Di’olimu Waki La Société Wa L’andja W’otondo Sukɛka Ohamelo
Oko akadite Isaya 54:2, 3, ɔtɛmwɛlɔ wa pudipudi waki Jehowa wekɔ lo tetemala diangana lo nkɛtɛ k’otondo. Ngasɔ mbediɔ djekoleko lo wedja wotshikitanyi wa l’Afrika, kâmɛ ndo lo asɛnga amɔtshi wa suke suke. Lo ɛnɔnyi dikumi wetshi ɛnɛ, diaaso diaki kokondja olimu wa Diolelo lo wedja ɛmɔtshi diambokondjama, oko l’Angola, la Cameroun, l’Éthiopie, la Guinée équatoriale, la Madagascar, la Malawi, la Mozambique ndo lo Togo. Lo wedja ɛsɔ kâmɛ ndo l’ekina lɛnɛ ambɛla dikambɔ dia dinela, wambotoma wa misiɔnɛrɛ y’oma lo Ngiliyadɛ, wanɛ wakalongola apɔlɔmɛ lo Kalasa k’Olowanyelo w’Ekambi, ase nkumbo ka Bɛtɛlɛ ndo apandjudi akina.—Mat. 9:37, 38.
Tâmu kema dia wodelo wa lofulo l’anto wa l’ɔtɛmwɛlɔ wa mɛtɛ l’atei w’ɔlɔngɔswamelo wa Jehowa nɔmbaka wokelo wa nkama ya Mbalasa ya Diolelo. Aya ndo ohomba efula wa mbika Mbalasa ya assemblées ndo mbika kana nunya wa Filialɛ. Etenyi ka woke ka weshasha washaso la Société dia olimu wa l’andja w’otondo kambemaka dia mbika mvudu shɔ, kâmɛ ndo dia kɛndjakɛndja olimu wa Diolelo aha paka l’Afrika oto, koko ndo lo tenyi dikina di’andja.
Fɔtɔ la asango watanema lo ndjɛkɛ hiende ya lo dikatshi di’okotsha nɛ toshaka lokanyi lɔmɔtshi lo kɛnɛ kayatshutshuya la Société dia sala l’Afrika. Wambɛnya mvudu mɔtshi yakawɔ nshi nyɛ ndo mɔtshi yasangoyawɔ dia tatɛ la mbika kem’edja.
Naka sho menda mɛsa w’alapɔlɔ wa l’andja w’otondo lo Annuaire 1996, kete sho monga la kanyi mɔtshi ya shikaa lo dikambo dia olimu wakamba apandjudi lo wedja ɛsɔ. Wedja efula wekɔ l’ohamelo wa mamba, ndo lofulo la diambo l’anto wakɔtɔ lo Eohwelo toshaka elongamelo k’ɔlɔlɔ k’ohamelo. Lam’akanaso yimba lo kɛnɛ kakoka salema lo wedja ekina l’ekimanyielo k’olimu w’esambishelo ndo wa mbetɛ anto ambeki, sho mbokaka diɛsɛ diakɔna diele la so dia sukɛ ɔtɛmwɛlɔ wa mɛtɛ la diangɔ dia l’emunyi.—Luka 16:9; 1 Tim. 6:18.
[Caption on page 3]
[Photo captions on page 3]
Mbalasa ka Diolelo kakakama lo nshi 9 la KwaZulu-Natal, Afrique du Sud.
Mbalasa ka Diolelo k’oshinga l’ɛse, Nigeria.
La Mozambique, Mbalasa k’assemblées kakoka mbɔtɔ anto 1500, kayoshila l’ekomelo k’ɔnɔnyi 1996.
Mvudu ya weke ya lo Filialɛ ka Mozambique, yayotatɛ kambema lo diyee dia 1996.
Filialɛ ka Sierra Leone, kahomba shila l’ɔwɔ ɔnɛ.
[Caption on page 4]
[Photo captions on page 4]
Maurice: Mbalasa k’assemblées kamboshila, hwe l’emamu, ndo mvudu ya weke ya filialɛ yayohomba shila otsha lo Mam’ɛkɔngɔ la Tange 1997.
Filialɛ ka Zimbabwe, kakama.
Mbalasa k’assemblées ka hwe l’emamu ndo Filialɛ kakama lo Sénégal.
Filialɛ k’oyoyo lo Kenya la Nairobi, osomba w’owandji.
Filialɛ ka la Madagascar, kayanga shila.
Filialɛ kasangoyama mbikama la Malawi.