Bonde Kasalawɔ Olimu Akɔ?
1 Lo dikambo dia Kristo, amvutshi wakatatshi vate ‘ohetoheto lo dikambo dia luudu la Nzambi ayowonya to.’ (Osam. 69:9) Ohetoheto wele la Yeso lo dikambo dia ɔtɛmwɛlɔ wa mɛtɛ watɛmɔlawɔ Jehowa akosokoya lo nde mbidja olimu ande lo dihole dia ntondo. (Luka 4:43; Joa. 18:37) Ɛlɔ kɛnɛ, Ɛmɛnyi wa Jehowa mɛnyaka ohetoheto akɔ wamɛ l’olimu awɔ lo sambisha akambo wa mɛtɛ. Ɔnɔnyi wetshi, lo yɛdikɔ ya l’atei atei apandjudi 645509 wakayasha ngɔndɔ tshɛ lo woho ɔmɔtshi kana okina w’olimu wa lo tena tshɛ. Lam’ele takayakimɔ le Nzambi, sho tshɛ pombaka sɛdingola lo dɔmbɛlɔ kana sho kokaka ndjalɔngɔsɔla dia monga ambatshi mboka wa tshanda kana wa pondjo.—Osam. 110:3; Und. 12:1; Romo 12:1.
2 Tekɔ lo sɛna lo dikongɛ di’akambo dia lokaki ndo diele la saki ka lomombo; anto efula hawoke bonde kayasha akina ngasɔ l’olimu w’esambishelo lam’ele aha futama mbafutamawɔ ndo hawokondja kânga lokumu oma lɔkɔ. Bonde kadisala ambatshi mboka na? Vɔ mbeyaka ɔnɛ l’olimu washa anto panda mbayashawɔ tshɛ. Lam’ele vɔ sokoyamaka la ngandji k’efula kokawɔ Jehowa la anyawɔ anto, vɔ ndjaokaka dia vɔ pombaka kimanyiya anto dia mbâshimbela. (Romo 1:14-16; 1 Tim. 2:4; 4:16) Atshukanyi amɔtshi waki ambatshi mboka wakate dikambo sɔ lo tshena pe vate: “Bonde keso ambatshi mboka? Onde totonga l’ɔkɔkɔ ɔmɔtshi w’oshika wa mbutɛ Nzambi otondonga sho bu ambatshi mboka?”
3 Kadiyɛso kekina akate dia yɛdikɔ yakandɔshi ya monga ombatshi mboka ate: “Dimi l’omɛmi takayalɔngɔsɔla dia sɛnaka paka la difuto ɔtɔi, diɔ diakɔ diakatahombe minya yimba l’ɔngɔnyi. Koko, Jehowa ambotɔtshɔkɔla heyama, ndoko lushi lakandatotshike lo wola kana lo dihombo. . . . Lambɛna ɔkɔkɔ mɛtɛ wemi la lɔsɛnɔ: lekɔ lo kimanyiya anto wele l’ohomba dia vɔ mbeya ɔnɛ Jehowa, Nzambi ka mɛtɛ, hanganyi etale la wanɛ wôyanga.” Lam’eyawɔ ɔnɛ nshi yotête esadi esadi, ambatshi mboka monaka paka diangɔ dioleki ohomba dia sɛna, wayaombɛ kawɔ akɔ ango ndo mbɔkɔ y’akɛsɔ y’eshika ya lo nyuma yayoviya pondjo pondjo.—1 Tim. 6:8, 18, 19.
4 Naka wɛ ekɔ la diaaso lo menda akambo wele layɛ, bonde kahayɔtɔ l’ɔnɔngɔ w’anangɛso l’akadiyɛso nunu nkama wa l’andja w’otondo wele ambatshi mboka na? Dui sɔ diayokokimanyiya dia wɛ monga l’ɔngɛnɔngɛnɔ oko vɔ.