Tosambisha Lɛnɛ Ele Anto
1 Oko akandeyaka lotumu lakakambaka nyuma ka Nzambi l’olimu ande, ɔpɔstɔlɔ Paulo akate ate: ‘Nzambi kôdia.’ Nde aketawɔ nto ate: “Shu teko ekambi kame la [Nzambi].” (1 Kor. 3:5-9) Ɔsɔ ekɔ diɛsɛ dia mamba. Ngande wokokiso mɛnya lo sɛkɛ ɔnɛ sho ngɛnangɛnaka monga ekambi kâmɛ la Nzambi na? Lo sambishaka anto tshɛ wahomana la so lokumu l’ɔlɔlɔ lo luudu la luudu ndo l’ahole akina tshɛ.
2 Wakatodjangɛ dia sho ‘mbetɛ anto ambeki.’ (Mat. 28:19) Naka sho sawolaka paka l’anto yema tshitshɛ tsho lam’atshɔso a tosambisha, kete sho mbeyaka kɔmɔ demba esadi eto ndo mɛna oko hatosadi ndoko ema k’ɔlɔ. Koko, sho ngɛnangɛnaka efula l’olimu aso lam’atanaso anto efula ndo asawolaso la wɔ. Dikambo sɔ nɔmbaka dia sho mbidja weolo efula, nɛ dia sho pombaka ntshɔ lɛnɛ ele anto woho wa sho tosawola la wɔ.
3 Diɛnyɛlɔ dia Kamba la Diɔ: Sho kokaka sambisha anto lo lobingu, l’ahole watomuyaka ambetshitshi, ndo l’ahole watotshumanaka anto kana lo dibongo. Lam’adɛyɛ lo mutuka kana lo masuwa, onde wɛ tayalɔngɔsɔlaki dia tasambishaka lam’enyu lo mboka? Ɛmɛnyi wa Jehowa ehende wakadɛ lo bisi kɛmɔtshi kakalole anto tɔɔ lam’akawatatshɔka otsha lo losanganya l’olimu w’esambishelo, wakamɛ kɔmatɛ osato wa Paradiso kosangiwɔ lo dibuku Ewo, ndo sawola dia alaka wa Nzambi wendana la nshi yayaye. Oko akawakombolaka, ɔlɔngɔlɔngɔ ɔmɔtshi waki suke la wɔ akɔtɔ lo sawo diawɔ. Kɛnɛ kakandoke akawâmbia heyama, ko lo wonya wa polɔ oma lo bisi nde akalongola dibuku dimɔtshi ndo akalɔmbɛ dia onto ɔmɔtshi ntshɔ dia towenda lakande.
4 Apandjudi efula ngɛnangɛnaka l’esambishelo ka lo tshakitudi. Kadiyɛso kɛmɔtshi akatshu la dikɔlɔ dimɔtshi lo dihole diatowosondjaka diangɔ ko akamɛ sawola l’anto wakandɛnyi ɔnɛ wamboshila la somba diangɔ diawɔ koko wakatshimbatshimba lawɔ. Nde akawasha ekanda tshɛ waki lande lo tapa. Pami kɛmɔtshi kakatshikala lo mutuka ande akalongola wa periodikɛ yakandawosha l’ɔngɛnɔngɛnɔ. Nde akatshɔka lo nsanganya nshi ya ntondo, ndo sawo diawɔ diakayohɛtshahɛtsha saki kande nto.
5 Ekɔ diɛsɛ dia tombola lokombo la Jehowa. Naka tayosambishaka l’ohetoheto, kete tayɛnyaka ɔnɛ sho mandolaka ɔlɔlɔ wa mamba watosalɛ Nzambi. Nɛ dia “kakiane eko etena k’ololo” ka kimanyiya anto akina, totshu lɛnɛ ele anto ndo totasambisha dikambo dia “lushi la panda.”—2 Kor. 6:1, 2.