Dui Dia Nzambi Tɔlɔmbɔlaka
1 “Tekɔ lo sɛna l’andja wambolola tɔ l’ekakatanu; efula k’ekakatanu akɔ heyama ndo woho wa mbashidiya. Miliyɔ y’anto wekɔ lo ndala etema hwe. Lofulo la wanɛ wele fumbe ya kândji kana didjoyadjoya dia wolo lekɔ lo tadɛ mbudɛ tsho. Nkumbo efula yekɔ lo mbatɔna. Dieyanelo dia l’asa wanɛ wotɔ ndo ɔhɛnyɔhɛnyɔ wa l’atei a nkumbo ekɔ akambo wafundama efula lo tojurunalɛ ndo watɛkɛtama tena la tena lo tita nsango Please, compare with English. Diangɔ diele la lɔlɛngɔ diekɔ lo tshumana lo hiɛlɛlɛ yahɛngaso ndo l’ashi wanɔso. L’etena kakɔ kɛnɛ, efula ka l’atei aso wekɔ lo pɛnyahɛnyama l’awui w’epetenge.”
2 Ɛtɛkɛta ɛsɔ mbotate lo dibuku dielɛwɔ La Bible : Parole de Dieu ou des hommes ? Mbɔtwɛlɔ kadiɔ kekɔ wotsho efula nshi nyɛ ndeka ndo woho wakitɔ l’ɛnɔnyi esambele wetshi tatɛ oma lam’akatombe dibuku diakɔ. Anto wekɔ l’ohomba wa mbeya ɔnɛ Dui dia Nzambi tɔlɔmbɔlaka ndo tɛnyaka woho wakokaso kandola ekakatanu watɛnya pâ. Lo ngɔndɔ kɛnɛ ka Tshango, tayosala tshɛ dia mbakimanyiya lo tawashaka Traduction du monde nouveau kana dibuku dielɛwɔ La Bible : Parole de Dieu ou des hommes ? Lo mɛtɛ, aha naka wɛ ambotshikɛ onto okanda ɔmɔtshi kete lâsɔ nde ayetawɔ ɛlɔmbwɛlɔ ka Nzambi. Pombaka sho kalolaka dia tênda anto asɔ l’oyango wa totatɛ mbeka la wɔ Bible. Tekɔ l’eshikikelo ɔnɛ tayokondja ekimanyielo naka sho ndjâtshutshuyaka woho ɔsɔ. (Mat. 28:19, 20) Toho tɔmɔtshi tambotokolaka dia wɛ ndjela tɔ tɔnɛ:
3 Naka wɛ ambohomana l’ekumanyi kɛmɔtshi, wɛ kokaka mbuta ɔnkɔnɛ:
◼ “Mpa (kana mama) nte kombole: Lo nshi yakiyɛ eke ɔlɔngɔlɔngɔ, onto l’onto ngande wakandɔsaka osekande onto na? [Tshikande akadimole.] Awui wambotshikitana woho w’anyanya ɛlɔ kɛnɛ, shi mɛtɛ? Ko lo kanyi yayɛ, bonde kambotshikitana awui nganɛ na? [Tshikande akadimole.] Mɛtɛ, tekɔ lo mɛna ekotshamelo ka pɔlɔfɛsi kɛmɔtshi ka lo Bible. [Adia 2 Timote 3:1-5.] Bible hakome paka lo kɔndɔla andja ɔnɛ woho wewɔ tshɛ ɛlɔ kɛnɛ; tɔ tolakaka andja w’oyoyo wa dimɛna efula wayanga ndja kem’edja nto. Diɔ diakɔ dieso lo takeketsha onto tshɛ dia nde mbadiaka Bible. Wɛ akɛnyi dia ekadimwelo kadishami kɛnɛ kelɛwɔ ɔnɛ Traduction du monde nouveau kekɔ l’ɛtɛkɛta wokɛma hwe?” Tɛnde nto ɔnɛ tɔ fundama lo Falase ka nshi nyɛ, ɔnkɔnɛ ɛtɛkɛta wa lɔkɔ bu wolo mboka. Ɛnyande dibuku La Bible : Parole de Dieu ou des hommes ? ndo dja dikako vɔlɛ lo tshapita 10 yalembetshiya pɔlɔfɛsi kekina kɛnaso ekotshamelo katɔ nshi nyɛ. Shande Bible la dibuku diakɔ naka nde nangaka.
4 Naka wɛ amboya nto dia ndjênda ekumanyi kakayatshikɛ Bible la dibuku, wɛ kokaka mbuta ɔnɛ:
◼ “Mbala ketshi, takɛnyi ɔnɛ andja wa nshi nyɛ wambolana hakoke lo akambo efula, naka sho menda lɔsɛnɔ nganɛ welɔ ɛlɔ kɛnɛ la woho wakilɔ l’edja k’ɛnɔnyi engana eto wetshi. Koko naka lakaye ɛlɔ nto, ele paka dia ndjokɛnya ɔnɛ Bible ekɔ lo tolaka andja wa dimɛna efula lo nshi yayaye. [Adia Enyelo 21:3, 4.] Woho weyaso ɔnɛ Dui dia Nzambi mbata ngasɔ pombaka totshutshuya dia sho menda dikambo dikina nto diatotɛdiɔ.” Fola dibuku La Parole de Dieu lo tshapita 14 ndo adia odingɔ 3-4. Mbolande kana nde nangaka wɛ ndjowetshaka Bible ofele.
5 Naka wɛ ekɔ lo nanga sawola l’ɔlɔngɔlɔngɔ kana osekaseka, wɛ kokaka mbuta nganɛ:
◼ “Nte kombole dimbola dimɔtshi: Wɛ lele ɔlɔngɔlɔngɔ, onde wɛ kanaka ɔnɛ sho kokaka kongɛ nshi yayaye l’ɔngɛnɔngɛnɔ? Ngande wɛnayɛ lɔsɛnɔ la lo nshi yayaye? [Tshikande akadimole.] Diɛsɛ ko tekɔ l’ɔkɔkɔ wa shikaa wa kongɛ nshi yayaye l’ɔngɛnɔngɛnɔ. [Adia Osambu 37:10, 11.] Lam’ele anto wekɔ la tokanyi efula totshikitanyi lo dikambo dia Bible ndo di’awui wele lɔkɔ, takatondja dibuku nɛ dielɛwɔ ɔnɛ: La Bible : Parole de Dieu ou des hommes ? Enda bonde katokeketshadiɔ dia sho mbadiaka Bible. [Adia odingɔ 16-17, lo lɛkɛ 10-11.] Naka tambetawɔ ɔnɛ kɛnɛ kata Bible kekɔ mɛtɛ, kete tambokondja elongamelo k’oshika ka nshi yayaye. Naka wɛ nangaka mbadia dibuku nɛ, kete layɔngɛnangɛna kotshikɛdiɔ; koko wɛ ayombisha paka yema ya woshasha ya tshitshɛ tsho.”
6 Naka wɛ ambokalola dia ndjênda ɔlɔngɔlɔngɔ kana osekaseka waketawɔ mbɔsa dibuku “Parole de Dieu”, wɛ kokaka tatɛ mbuta ɔnkɔnɛ:
◼ “Lakangɛnangɛna efula lam’akamɛnyi nte wɛ ndjashaka dia mbeya lɔsɛnɔ la lo nshi yayaye. Ondo wɛ akohɔ dia lakakɛnya divɛsa dimɔtshi diatolaka ɔnɛ tayonga la lɔsɛnɔ l’ɔngɛnɔngɛnɔ ndo la shikaa lo nshi yayaye. Divɛsa dikina diɔ nɛ. [Adia Enyelo 21:3, 4.] Dibuku diakamakotshikɛ diekɔ la tolembetelo ta shikaa tɛnya ɔnɛ Bible mɛtɛ ekɔ Dui dia Nzambi koko aha dui di’onto. Dikambo sɔ diekɔ la kitshimudi ya woke efula. Enda kitshimudi yakɔ. [Adia odingɔ 1-2, lo lɛkɛ 184-185.] Naka wɛ nangaka, kete layɔngɛnangɛna mbekaka la yɛ Bible ofele.” Naka ɔlɔngɔlɔngɔ kana osekaseka akɔ ambetawɔ wekelo, mbolande kana nde ekɔ la Bible. Naka nde bu latɔ, ɛnyande Traduction du monde nouveau kana nde ayolanga kiɔsa.
7 Naka onto heye lɛnɛ ahombande ntshɔ ko tokondja ekimanyielo dia nde shidiya ekakatanu ande, wɛ kokaka memula saki kande naka wɛ mbotɛ nganɛ:
◼ “Nshi nyɛ, suke l’onto tshɛ pomanaka l’ekakatanu wa weke. Efula ntshɔka le andaki wa weho la weho dia toyanga ekimanyielo. Amɔtshi ntshɔka le atɛkɛtshi wa djimu. Ko lo kanyi yayɛ, lende akokaso kondja alako w’eshika wakoka tokimanyiya mɛtɛ na? [Tshikande akadimole.] Bible mbutaka dikambo dimɔtshi di’ohomba efula diahomba onto tshɛ mbeya.” Adia Jeremiya 10:23. Fola dibuku La Bible : Parole de Dieu ou des hommes ? lo lɛkɛ 187 ko wɛ mbadia odingɔ 9. “Dibuku nɛ diayokokimanyiya dia wɛ shihodia woho wayoshila ekakatanu aso tshɛ lo Diolelo diaki Nzambi. Wɛ ayolanga diadia?”
8 Naka mbala ka ntondo kakayɛnana la nde wɛ akawotɛ ɔnɛ onto ekɔ l’ohomba w’ɛlɔmbwɛlɔ, kete mbala kekina wɛ kokaka ndjotetemala sawola la nde ɔnkɔnɛ:
◼ “Mbala ketshi, taketawɔ ɔnɛ tekɔ l’ohomba wa Nzambi tɔlɔmbɔla naka sho nangaka shidiya ekakatanu wa lo lɔsɛnɔ. Lo dikambo sɔ, dimi kanaka nte wɛ ayɔngɛnangɛna ɛtɛkɛta wa ndjihelo wofundami lo dibuku diakamakotshikɛ. [Adia odingɔ 12-13, lo lɛkɛ 189, lo dibuku Parole de Dieu.] Dimi ngɛnangɛnaka ndjâka lâkayɛ (kana lâkanyu) dia ndjekaka la yɛ Bible ofele, ndo lekɔ lo nanga kɛnya woho watotekaka l’anto Bible.”
9 Jehowa ayɔtshɔkɔla woho wayatshutshuyaso dia kimanyiya ɛlɔngɔlɔngɔ la esombe dia vɔ mbeya nɛmɔ dia Dui dia Nzambi, Dui dialɔmbɔla lɔsɛnɔ laso.—Osam. 119:105.