Anto Wa Weho Tshɛ Wayoshimbamela
1 Jehowa nangaka “dia anto wa weho tshɛ shimbamela ndo koma lo ewo k’oshika ka mɛtɛ.” (1 Tim. 2:4, NW) Mɛtɛ, lo yɛdikɔ mɔtshi, anto wekɔ lo mɛna pâ l’etombelo w’oma l’ohowɔ, shɛngiya y’oma l’ahole wakawotɔ ndo ya lɛnɛ odjashiwɔ, koko wekɔ la lotshungɔ ndo mbɔsa tɛdikɔ vamɛ dia kɛnɛ kayowosala lo lɔsɛnɔ lawɔ. Vɔ kokaka sala ɔlɔlɔ ko sɛna, kana sala kɔlɔ ko mvɔ. (Mat. 7:13, 14) Naa shɛngiya yahomba dikambo sɔ ndjâla layɔ lo kɛnɛ kendana la woho wahombaso mbɔsaka anto watɛso lokumu l’ɔlɔlɔ la Diolelo na?
2 Hatohombe fɔnya ɔnɛ yambalo yadja onto lo mɛtɛ nemanɛka la akambo wele oko kɛnɛ kasalema lo wodja awɔ, yoho yawɔ ya sɛna, kana tshunda di’anto diewɔ. Mɛtɛ kotolaka oyadi anto wakeke efula kana wanɛ waki kombeka efula, kâmɛ ndo wanɛ wasala akambo wa pɔlitikɛ, wanɛ wakamba elimu w’ambeyi w’ekanda, wanɛ wahetawɔ ɔnɛ Nzambi ekɔ, wanɛ wahetawɔ awui woleki yimba y’onto, kânga ndo akanga wa kɔlɔ y’efula. Anto w’oma lo tokoma tshɛ ta nkɛtɛ ndo wanɛ wele lo ahole w’elimu wa weho tshɛ wakatshikitanya lɔkɛwɔ ndo wekɔ kakianɛ l’elongamelo ka sɛna lo Paradiso. (Tuk. 11:19) Omalɔkɔ, hatohombe kandakanda dia mbewoya anto wa weho tshɛ losango la Diolelo.
3 Tende Diɛnyɛlɔ Diayela nɛ: Onto ɔmɔtshi akânɛ dia ndjaka okilande a pami, koko nde kombodiaka. L’ɔkɔngɔ diko, nde akɔshi yɛdikɔ ya ndjadiaka, koko nde kokotsha kɛnɛ kakandasangoya. Ko l’ɔkɔngɔ wakawodje lo lokanu l’ɔkɔkɔ wa wovi l’osondjelo wa didjoyadjoya, ko diwala diande diakahandjɔ. Ɛlɔ kɛnɛ, pami kɛsɔ ekɔ la lɔsɛnɔ la losembwe, nde ekɔ l’ɔngɛnɔngɛnɔ lo diwala ndo okana l’okilande a pami dimɛna efula. Kakɔna kakôtshikitanya na? Wekelo wa Bible l’Ɛmɛnyi wa Jehowa ndo okotshelo wa kɛnɛ kakandeke. Jehowa kombɔ̂sa oko onto lahalowanaki.
4 Osekaseka ɔmɔtshi aki ɔkɛnyi wa lo televiziɔ wakeyamaka efula, koko dikambo sɔ komboshaka ɔngɛnɔngɛnɔ. Lam’akandambiama la lɔkɛwɔ l’ɔlɔlɔ efula laki l’Ɛmɛnyi, nde aketawɔ mbeka Bible ndo kem’edja akamɛ mbewoya anto akina lokumu l’ɔlɔlɔ la Diolelo. Dihole tshɛ diakandatasambishaka lo soko la soko, wakataweyaka, koko nde akatalembetshiyaka l’ɔngɛnɔngɛnɔ tshɛ ate nde ndeka nanga mbeyama oko Ɔmɛnyi wa Jehowa lo dihole dia mbeyama oko ɔkɛnyi.
5 Kadiyɛso kɛmɔtshi akalakana l’onto ɔmɔtshi laki l’abɔnɛma wa Tshoto y’Etangelo dia nde ndjêka la nde Bible, ko osukanyi ande a omoto, ɔnɛ lakoke wokana, akaye lam’akawekaka. Mbala kakɔ ɔtɔi, omoto akɔ akɛnyi ate mɛtɛ kakandatayangaka tɔ kɛnɛ! Nde l’omɛnde wakatola yɛdikɔ yakawɔshi ya ndjaka diwala ndo wakokana. Nde akayashaka efula lo wekelo wa tɔɔtɔ ndo akatɛmɔlaka ɛdiɛngɛ, koko nde ndamɛ aketawɔ minya abuku w’oshinga wolo ndo diangɔ dikina tshɛ diaki lande diendana l’awui w’ɛdiɛngɛ. Nde kotshimbatshimba la mbɔtɔ lo nsanganya ndo mbutɛ nkumbo kande l’angɛnyi ande dikambo dia mbetawɔ kande k’oyoyo. Ɛlɔ kɛnɛ nde ekɔ lo sambisha akina la wangasanu tshɛ.
6 Hatohombe kanɛ ndoko onto kɔlɔ. Koko, tewoya lokumu l’ɔlɔlɔ l’ohetoheto l’ahole tshɛ. Sho kokaka monga la mbetawɔ ɔnɛ Jehowa, ɔnɛ “latɛnaka kɛnɛ kele l’otema,” ayonga ‘Oshimbedi w’anto wa weho tshɛ.’—1 Sam. 16:7; 1 Tim. 4:10.