Tekɔ Lo ‘Sambisha Dui’
1 Lo nshi yaso nyɛ, oko ata Bible lo dikambo dia “nshi y’ekomelo,” anto efula wekɔ paka “l’ɛnamelo ka mamema Nzambi.” (2 Tim. 3:1, 5, NW) Kɛsɔ tshɛ tombaka nɛ dia ewandji w’ɛtɛmwɛlɔ wambokita tatala lo kɛnɛ kendana la mbisha ase ɔtɛmwɛlɔ awɔ ɛlɔmbwɛlɔ k’oshika ka lo nyuma. Ewandji w’ɛtɛmwɛlɔ wa lo Lokristokristo hawoleke mbɔsa Bible la nɛmɔ. Lo dihole dia sambisha Dui dia Nzambi, vɔ ndeka nanga mbutaka paka wetshelo w’anyanya wa wa filozɔfɛ la wa teolojiɛ, ndo mbisha tokanyi l’akambo w’atshunda la wa pɔlitikɛ. Ewandji efula w’ɛtɛmwɛlɔ hawetawɔ Bible. Vɔ kiɛnaka ɔnɛ kambeta lowe ndo, l’otshatsha tshɛ, vɔ mbidjaka wetshelo w’ohilwelo la ntondo, lo dihole dia wetshelo wa lo Bible wata dikambo di’Otungi a woke. Ewandji efula w’ɛtɛmwɛlɔ hawodimula kânga lokombo la Nzambi hita ndo hawɛnyi ndoko kɔlɔ naka lɔ minyama oma l’ekadimwelo wa Bible wa nshi nyɛ.
2 Oko waki ewandji w’ɛtɛmwɛlɔ wa lo nshi ya Yeso, asasɛrdɔsɛ wa nshi nyɛ wekɔ lo sambisha anyanya. (Mat. 15:8, 9) Kɛsɔ mɛtɛ mbakate omvutshi Amɔsɛ. Tekɔ lo mɛna “ndjala, aha ka mbo ya ndɛ, ndo posa, aha ka ashi, koko ka mboka dui dia Jehowa.” (Am. 8:11, NW) Oleki diangɔ dikina tshɛ, anto wekɔ l’ohomba wa mbo ya ndɛ ya lo nyuma yele lo Dui dia Nzambi.
3 Woho wa Kotsha Ehomba wa lo Nyuma w’Anto: Paulo akalake Timɔtɛ dia nde mamema ‘afundelo w’ekila wokoki mbosha lomba dia panda,’ ndo akawosha lo sɛkɛ ɔkɛndɛ wa ‘sambisha dui.’ (2 Tim. 3:14, 15; 4:2) Oko weso Ɛmɛnyi wa Jehowa, sho pombaka mamema lo kɛnɛ kata Bible lam’asambishaso, ɔsɔku mbôkoyaso Yeso, Ɛnyɛlɔ kaso, ɔnɛ lakate ate: “Kɛnɛ kalakanyami kema oma le mi, koko oma le ɔnɛ lakatome.” (Joa. 7:16, NW) Wetshelo aso ndja oma lo Dui dia Nzambi, nɛ dia sho mɛnaka lomba la Nzambi lɔkɔ ndo sho nangaka mbewoya anto kiɔkɔ y’awui wawatɛso.—1 Kor. 2:4-7.
4 Dia anto mbeya Jehowa ndo dia vɔ monga la mbetawɔ le nde, vɔ pombaka tokôka mɛtɛ kele lo Bible. Akasungana dia Paulo funda ate: “Ngande wayowonga la mbetawɔ le onto lahawoki watɛkɛta diande? Ndo ngande wayowoka endaka ndoko onto lasambisha?” (Rɔmɔ 10:14, NW) Lo sambishaka Dui dia Nzambi, sho kimanyiyaka akina dia vɔ kondja mbetawɔ oma l’ewo k’oshika. Ewo kɛsɔ kekɔ la wolo wa ndowanya nsɛnɔ, ndo olimu atɔ ɔsɔ. Charles Dickens, ofundji w’Ose Angleterre, akafunde lo dikambo dia Bible ate: “Ekɔ dibuku dioleki dimɛna l’abuku tshɛ ndo diayolekaka l’andja w’otondo, nɛ dia diɔ nyetshaka alako w’amɛna wokoki kimanyiya onto layatshutshuya dia monga la losembwe ndo la kɔlamelo efula oleki abuku akina.”
5 Wanɛ wele la ndjala ka mɛtɛ ka lo nyuma mpotɔka ɔnɛ tɔ kekɔ l’edio atɔ lo Dui dia Nzambi dwamɛmɛ. Lo 1913, wakasha Frederick Franz, lâsɔ ko nde eke ombeki, biukubuku yaki l’ɔtɛ a dui w’ɔnɛ: Où sont les morts? L’ɔkɔngɔ wa nde mbala la saki tshɛ okadimwelo wa dimbola sɔ lo Bible, nde akate ate: “Ekɔ mɛtɛ!” Miliyɔ y’anto wayanga mɛtɛ wakonge la kanyi shɔ. Totetemale la sambisha Dui l’etete ndo l’ohetoheto, dia sho monga l’ɔngɛnɔngɛnɔ wa mboka akina wata vate: “Ekɔ mɛtɛ!”