‘Toleke’ Mbɔtɔka Lo Nsanganya
1 Nsangana kâmɛ okongaka nshi tshɛ ohomba le ekambi wa Jehowa. Le Ase Isariyɛlɛ, tɛmpɛlɔ la shinangɔnga mbaki ahole w’ɔtɛmwɛlɔ wa mɛtɛ; lɛkɔ, vɔ wakalongolaka wetshelo oma le Nzambi, ndo wakasanganaka l’ɔngɛnɔngɛnɔ. Woho akɔ mbele, Akristo wa ntondo kokimɔka nsangana kâmɛ. Lam’ele ɛhɛnyɔhɛnyɔ l’ekakatanu wekɔ lo tafulanɛ tsho lo nshi y’ekomelo ya pâ nyɛ, sho lawɔ tekɔ l’ohomba wa keketshama lo nyuma lo tshimbo ya nsanganya yaso ya l’etshumanelo ndo ‘tamboleka’ monga l’ohomba wa mbɔtɔ lo losanganya. (Heb. 10:25) Tênde ɛkɔkɔ esato watosokoya dia mbɔtɔka lo nsanganya.
2 Dia Sanganaka Kâmɛ: Afundelo tɔlɔmbaka dia sho ‘tetemala keketshanya ndo mbodianya lam’asaso.’ (1 Tes. 5:11) Sangana l’anto woka Nzambi wɔma ndodjaka wɔɔngɔ aso la tokanyi t’ɛlɔlɔ ndo totshutshuyaka l’etsha w’ɔlɔlɔ. Ko naka tayoyakakitola l’akina, kete tokanyi ta kɔlɔ, ta lokaki ndo ta mindo mbeyaka toyɛ.—Tuk. 18:1.
3 Dia Mbetshama: Nsanganya y’Akristo toshaka wetshelo w’oma lo Bible waha l’ekomelo watokimanyiya dia pɛtshahɛtshaka ngandji ka Nzambi kele l’etema aso. Yɔ tetshaka nganɛ wakokaso kamba ‘l’alako tshɛ waki Nzambi.’ (Etsha 20:27) Nsanganya tetshaka dia mbeya sambisha ndo mbetsha anto lokumu l’ɔlɔlɔ, dikambo diele ohomba efula ɛlɔ kɛnɛ dia sho kondja ɔngɛnɔngɛnɔ w’efula waya lam’atanaso ndo wakimanyiyaso wanɛ wetawɔ akambo wa mɛtɛ wa lo Bible.
4 Dia Kondja Ekokelo: L’andja aso wa kɔlɔ ɔnɛ, etshumanelo ekɔ eshamelo k’oshika ka lo nyuma—dihole dia wɔladi ndo dia ngandji. Wonya wɔtɔso nsanganya ya l’etshumanelo, nyuma k’ekila ka Nzambi mongaka la shɛngiya ya wolo efula le so; tɔ tɔtɔshɛka elowa wele oko: ‘ngandji, ɔngɛnɔngɛnɔ, wɔladi, lotutsha, lɔsɛngɔ, ɔlɔlɔ, mbetawɔ, wɔlamu, la ndjâkimɛ.’ (Ngal. 5:22, 23) [Lo eyangelo weke ka ntshama dia mbeya lande na katshanyema anto efula oma l’etshumanelo, emendji weteta wakate ɔnɛ: nkɛndɔ ya nshi efula yanda anangɛso atayangaka falanga mbɔladiaka anto efula lo nyuma. Lo kakitɔna la nkumbo ndo l’etshumanelo edja ka ngɔndɔ efula, mbala efula onto ndjokomaka shuwasuwa, hayosambisha ngɔndɔ tshɛ, ndo ndjɔkɔka lo monanyi kana loseka ndo lo pɛkato ya weho ekina. Etena kele Nsanganya tokeketshaka dia sho shika ekolo ndo tshikala nge lo mbetawɔ. Yɔ tokimanyiyaka woho wa ndjotokomɛ ehemba watokongɛ.
5 Lo mbɔtɔka nshi tshɛ lo nsanganya, sho mɛnaka mɛtɛ ka kɛnɛ kakate omembi w’Esambu, l’Osambu 133:1, 3 ɔnɛ: “Ndi dimena li! Ndi olo weko di’[onto, NW] l’anangu mbidjase kame li!” Oyadi lo dihole diakɔna diakambɛ anto Nzambi kana diasanganawɔ ɛlɔ kɛnɛ, ‘lɛkɔ mbatshululɛ Jehowa anto ɛtshɔkɔ, eelo, lɔsɛnɔ l’aha l’ekomelo.’