Sho Tshɛ Tekɔ Ohomba Dia Kamba Olimu
1 Ombeki tshɛ wa Yeso Kristo pombaka mbeya ɔnɛ weolo wadjande dia sukɛ esambishelo ka Diolelo ndo disambisha wekɔ ohomba efula. Yeso akeyaka ɔnɛ ambeki ande wayɔtɔ elowa lo tɛdikɔ totshikitanyi. (Mat. 13:23) Kânga mbele ambatshi mboka wele la wolo mboleki nsambisha, sho mandolaka wanɛ tshɛ watetemala tombola Nzambi l’ohetoheto ndo watɔ elowa lo yɛdikɔ yɛdim’awɔ.—Joa. 15:8.
2 Olimu wa l’Olui Kambemaka Efula: Yeso akatatshi ɔnɛ olimu wayokamba ambeki ande l’olui ayoleka wɔnɛ wakandatshe. (Joa. 14:12) Oyadi lɔsɛnɔ laso shamɛ tɛdikɛka kɛnɛ kahombaso ntsha kana toshaka diaaso dia nsambisha efula, onto l’onto l’atei aso ekɔ ohomba dia kamba olimu. Kɛsɔ mɛtɛ mbakate Paulo: ‘Demba di’otondo, lam’ɔtɔnganɛdiɔ ko kamba kâmɛ l’ekimanyielo k’asɔnga tshɛ washa kɛnɛ kahombama, lo ndjela woho wakamba etenyi l’etenyi ka demba lânde, lo yɛdikɔ yakoka, kimanyiyaka dia demba fuwɔ.’—Ef. 4:16.
3 Amɔtshi mbeyaka ndjaoka ɔnɛ weolo wadjawɔ hakimanyiya efula. Ko tete le kɛnɛ kele ohomba lo washo wa Jehowa ele, tokambe olimu aso l’anima aso tshɛ. Kɛnɛ tshɛ kawotshɛso kekɔ la nɛmɔ, ndo nde kiandolaka.—Enda lo Luka 21:1-4.
4 Totetemale Sukɛ Olimu: Sho tshɛ tekɔ la diɛsɛ dia kimɔ weshasha wa l’emunyi dia sukɛ olimu wa l’andja w’otondo. Amɔtshi koka kamba ntumu ya l’anya yendana l’olimu wa Diolelo. Onto l’onto l’atei aso koka ndjatshutshuya dia mbisha kɔmatɛrɛ yɔlɔngɔswami dimɛna lo nsanganya ndo mbisha asawo lo Kalasa k’Olimu wa Teokrasi. Lam’akambaso la waaso wakondjaso dia keketsha anto akina, sho kimanyiyaka lo yoho y’ɔlɔlɔ dia etshumanelo pama lo nyuma, ko kamba lotumu latɔ dimɛna.
5 Mɛtɛ, sho tshɛ tekɔ ohomba dia kamba olimu. Ndoko lahomba ndjaɛna onto l’anyanya. Oyadi tekɔ lo mbidja weolo efula kana yema tshitshɛ, tshɛ katshaso dia kambɛ Jehowa mɛnyaka ɔnɛ tekɔ l’atei w’ekambi wa mɛtɛ wa Nzambi. (Mal. 3:18) Onto l’onto l’atei aso koka kamba lotumu l’ohomba efula dia tombola Jehowa ndo kimanyiya akina dia vɔ mbêya ndo mbôkambɛ.