Nsanganya Y’olimu Ya Ngɔndɔ K’esambele
DIEWOYELO: Olimu Aso wa Diolelo ayongaka l’ekongelo ka losanganya lɔmɔtshi l’olimu lomingu tshɛ l’assemblées. Tshumanelo diayotshikitanya ekongelo kawɔ lo woho wahombama lam’eyawɔ ɔnɛ wayɔtɔ lo losanganya la distrikɛ “Mboka ka Nzambi ka Lɔsɛnɔ” ndo wayotsha ovuswelo w’atshina w’akambo wakatama l’assemblée akɔ l’edja ka taahe 30 lo losanganya l’olimu layosalema l’ɔkɔngɔ w’assemblée. Anangɛso ahende kana asato wahokɔ akambo efula wayotasɔnami k’ɔmɔ woho wa vɔ sɔtɔla tokanyi toleki ohomba ko ndjosala ovuswelo ɔsɔ w’alako wakashama lushi la lushi l’assemblée. Kanyɔlɔngɔsɔlɛ ovuswelo ɔsɔ dimɛna dia kimanyiya ase etshumanelo dia vɔ mbohɔ tokanyi t’ohomba, woho wa vɔ ndjaɔtɔnganyiya la tɔ ndo kamba la tɔ l’esambishelo. Kɔmatɛrɛ y’ampokami ndo akambo wakete l’esambishelo wakawate lɛkɔ kawotami lo hiembola ndo kawonge awui w’eshika.
Lomingu la Ngɔndɔ k’Esambele 6
Osambu 223
Taahe 8: Waewoyelo. Waewoyelo wendana l’Olimu Aso wa Diolelo. Nsango ya Teokrasi.
Taahe 15: “ ‘Anto Wɔlɔngɔswami Dimɛna dia Ntsha Olimu Tshɛ w’Ɔlɔlɔ.’ ” La wembola ndo ekadimwelo. Sha kɔmatɛrɛ lo tshena pe, oma lo Tshoto y’Etangelo ya Ngɔndɔ ka Hende 15, 1989, lɛkɛ 22-4.
Taahe 22: “Tosambisha ‘Anto wa Weho Tshɛ.’ ” Ekumanyi kɛmɔtshi ɛnya ɔnɛ, kânga mbashaso anto abuku amɔtshi wa ndjɛkɛ 192 lo Ngɔndɔ k’Esambele kɛnɛ, sho kokaka mbaɛnya dibuku Onto Loleki Woke lo Tena Tshɛ kana L’humanité à la recherche de Dieu l’etena kasungana. Ekumanyi kɛmɔtshi akɛtshanya l’apandjudi amɔtshi wa tomanamana lo toho ta nsambisha tele lo sawo diakɔ. Ta lo tshena pe ɛtɛmwɛlɔ akɔna wele lo mbilo kanyu ndo lembetshiya bonde kahombaso nɔngɔsɔla kanyi mɔtshi dia tatɛka sawola l’anto lo dikambo tshɛ. Nyotshe wɛnyɛlɔ ɔtɔi kana ehende lo tshena pe.
Osambu 112 ndo dɔmbɛlɔ dia ndjihelo.
Lomingu la Ngɔndɔ k’Esambele 13
Osambu 209
Taahe 10: Waewoyelo. Alapɔlɔ wa falanga.
Taahe 15: “Vɔ Namaka Diangɔ dia Nkumɛwɔ.” Dako diayoshama oma le ekumanyi l’awui wele lo dikatshi di’okotsha.
Taahe 20: “Sho Tshɛ Tekɔ Ohomba dia Kamba Olimu.” La wembola ndo ekadimwelo. Lembetshiya bonde kele dikumanyi l’ohomba w’anto efula wayakimɔ la lolango lawɔ dia kamba tumu y’ohomba. Tɛkɛta di’ehomba wa l’etshumanelo, oko wɔmbɛlɔ l’ɔlɔngɔswɛlɔ wa Mbalasa ka Diolelo, ekimanyielo le ase hemɔ l’esombe w’anto ndo esambishelo lo mbilo k’otondo. Lɔmba dikumanyi dia vɔ mbuta nganɛ wangɛnangɛnawɔ ekimanyielo kawasha wanɛ wayakimɔ la lolango lawɔ. Ka epole ɔsɛkɛ ɔnɛ weolo wadja onto l’onto ekɔ ohomba efula.
Osambu 153 ndo dɔmbɛlɔ dia ndjihelo.
Lomingu la Ngɔndɔ k’Esambele 20
Taahe 10: Waewoyelo.
Taahe 20: Nyɔlɔsha la Wolo. Dako oma lo Tshoto y’Etangelo ya Ngɔndɔ ka Ntondo 15, 1986, lɛkɛ 10-14. Tɛkɛta di’ohomba w’olimu w’ombatshi mboka wa pondjo ndo keketsha apandjudi dia vɔ tatɛ olimu ɔsɔ lo Ngɔndɔ ka Divwa 1.
Taahe 15: “Tosambisha oma lo Lɔkɛwɔ Laso l’Ɔlɔlɔ.” La wembola ndo ekadimwelo. Kɔnya akɛnda amɔtshi wele la lɔkɛwɔ l’ɔlɔlɔ. Wate woho wakâmbe anto akina lo mɛna lɔkɛwɔ lawɔ l’Akristo l’ɔlɔlɔ. Ta ɔkɔndɔ ɔtɔi kana ehende w’oma lo Tshoto y’Etangelo ya Ngɔndɔ ka Ntondo 1, 1995 (Falase), lɛkɛ 24-5.
Osambu 170 ndo dɔmbɛlɔ dia ndjihelo.
Lomingu la Ngɔndɔ k’Esambele 27
Taahe 10: Waewoyelo. Ohola dia onto tshɛ kimɔ alapɔlɔ ande wa Ngɔndɔ k’Esambele.
Taahe 15: Woho wa ntsha otadimbo w’okahanyelo wa periodikɛ. Tɛtɛ lo awui anɛ wele ohomba: funda periodikɛ tshɛ yoshaso anto, kawola l’ɔkɔngɔ wa lomingu kana mingu hiende, mbaɛnya tokanyi tele lo numɛlɔ y’eyoyo dia pɛtshahɛtsha saki kawɔ. Ta ɔnɛ l’otadimbo aso w’okahanyelo wa periodikɛ, sho kokaka mbidja ndo asukanyi, asekaso wa l’olimu, waa kɔmɛlɛsa, wanɛ wasondja l’asanga a mboka, ndo anto akina. Sha wanɛ watetemala mɛnya saki abɔnɛma wa ngɔndɔ shamalo. Lɔmba opandjudi ɔtɔi kana ahende dia vɔ kɔndɔla dikambo dimɔtshi diakatshama diendana l’etadimbo w’okahanyelo wa periodikɛ.
Taahe 20: Ambatshi mboka kimanyiyaka anto akina. Dako oma le omendji w’olimu, diayondɔtɛkɛta dia yɛdikɔ mɔtshi yambɔsama dia ambatshi mboka kimanyiya apandjudi l’onto ndo l’onto. Lembetshiya ɔnɛ lo nshi ya ntondo wakatshaka ekongelo ka ngasɔ dia mbâkimanyiyaka. (jv 100) Anto ndekana miliyɔ weke ka batizama ɛnɔnyi esato wetshi ɛnɛ wekɔ l’ohomba w’anto mbâlowanya. Ekongelo ka “Ambatshi mboka kimanyiyaka anto akina” toholaka kɛnɛ kakete ndo woho wakalowanyema ambatshi mboka wa pondjo la wa lânde wakɔtɔ lo Kalasa k’Ambatshi Mboka. Oyango w’ekongelo kɛsɔ ele ombatshi mboka tshɛ akimanyiya apandjudi ahende l’ɔnɔnyi dia vɔ monga tomanamana l’olimu w’esambishelo ndo ndeka monga la saki ka sambisha. Wanɛ walongola ekimanyielo kɛsɔ hawohombe ndjakiyanya kânga yema; oweso awɔ ele keketsha onto la ngandji ndo la lotutsha. Ekongelo kɛsɔ k’oyoyo kayohomba kimanyiya nunu nkama di’Akristo dia vɔ koma ekambi wa tomanamana.
Osambu 207 ndo dɔmbɛlɔ dia ndjihelo.