Emendji Watɔlɔmbɔla: Omendji-walɔmbɔla
1 Monga omendji l’atei w’etshumanelo ekɔ ɔkɛndɛ wa wotsho efula. (Etsha 20:28; 1 Tim. 3:1) Ɔnɛ ekɔ sawo dia ntondo l’ɔnɔngɔ w’asawo wayotɛnya ɛkɛndɛ wotshikitanyi wele la dikumanyi, dia onto tshɛ l’atei aso mbeya olimu w’ohomba efula wakambawɔ di’ɔlɔlɔ aso.
2 La Société sɔnaka onto dia nde monga omendji-walɔmbɔla aha la mbɔ̂sɛkɛ nshi. Dikumanyi mbidjaka yimba efula l’ɛkɛndɛ awɔ etena kadja omendji-walɔmbɔla akambo l’ɔnɔngɔ. (Dibuku Notre ministère, lɛkɛ 41-2) Dui sɔ alangadiɔ nembetshiya na?
3 Omendji-walɔmbɔla nongolaka mikanda wotomewɔ etshumanelo ko nde mbisha sekeletɛlɛ esadi dia nde menda kɛnɛ kofundami. Lam’alɔngɔsɔla omendji-walɔmbɔla nsanganya ya dikumanyi, nde nongolaka tokanyi ta dikumanyi dikina tendana l’akambo wahomba sɛdingolama ko nde funda wanɛ wayowɔtɛkɛta lushi longo. Nde mbalɔmbɔla ndo losanganya la dikumanyi. Naka wambɔsa tɛdikɔ, nde mendaka dia kana tɔ tambokotshama lo yoho yasungana. Nde mbasɔna wanɛ wayonga l’ɛkɛndɛ lo losanganya l’olimu, nde mbalɔngɔsɔla ndo ekongelo k’alako wa lo sɛkɛ. Nde kasha dikimɔ dia waewoyelo tshɛ mbishama l’etshumanelo, dia tondja falanga ya ntsha akambo wahombama ndo mbidja yimba dia vɔ mbɛdikaka falanga l’ɔkɔngɔ a ngɔndɔ shato tshɛ.
4 Ɔnangɛso ɔsɔ mbele ɔnɔmbɔdi wa kɔmite k’olimu ndo kalowanya lotumu latɔ. Etena kalɔmba onto ɔmɔtshi leka Bible dia nde monga opandjudi wahatabatizama kana etena kalanga opandjudi batizama, omendji-walɔmbɔla mbɔsaka tɛdikɔ dia dikumanyi sangana kâmɛ l’onto akɔ. Omendji-walɔmbɔla mbalɔngɔsɔla ndo diembwelo di’omendji w’otshimbedi woho wa etshumanelo kondja ɛlɔlɔ tshɛ w’oma lo lomingu lɔsɔ l’olimu wa lânde.
5 Omendji-walɔmbɔla ekɔ l’ɛkɛndɛ efula ndo wotshikitanyi. Etena kakotshande ɛkɛndɛ ɛsɔ ‘la kɔmba’ ndo la ndjakitshakitsha, onto tshɛ l’atei aso kokaka mbisha lonya lo kamba kâmɛ la dikumanyi. (Romo 12:8) Naka sho ‘kitanyiya’ ndo ‘monga l’ɛse’ ka wanɛ watɔlɔmbɔla, kete vɔ wayokamba olimu awɔ l’ɔngɛnɔngɛnɔ w’efula.—Heb. 13:17.