Bible: Ehomɔ Kakasha Nzambi Anto Tshɛ Dia Mbâlɔmbɔlaka
1 Oko yɛdikɔ ya miliyara nyɛi ya Bible yambofundama l’ɛtɛkɛta ndekana 2 100 ndo ɛtɛkɛta wa totshitshɛ, ko Dui dia Nzambi diambokokanɛ le anto ndekana % 90 lo nkɛtɛ k’otondo. Koko, “ndjala ka mboka ɛtɛkɛta wa Jehowa” kekɔ l’andja ɔnɛ. (Am. 8:11, NW ) Anto efula wekɔ la Bible koko, hawokiadia kana hawokioke. Ngande wakokaso mbâtshutshuya dia vɔ tshika Bible nɔmbɔla lɔsɛnɔ lawɔ lo yoho y’oshika yɛnama?
2 Lo Ngɔndɔ ka Ntondo tayosha anto dibuku La Bible : Parole de Dieu ou des hommes ? Wanɛ wayɛnya saki, tayokoka mbasha ndo ekadimwelo ka Bible kele laso aya ɛnɔnyi 34: la Traduction du monde nouveau. Omalɔkɔ, towaɛnya dia ɔtɛkɛta wa lɔkɔ mbokɛmaka hwe ndo vɔ mbatɛkɛtama nshi nyɛ. Tayɛnya lowando laso lo oshasha ɔsɔ w’oma le Jehowa naka sho kimanyiya anto akina l’ohetoheto tshɛ dia vɔ mbɔsa Bible oko losha l’oma le Nzambi dia nɔmbɔla anto tshɛ.
3 Wɛ kokaka tatɛ sawo dimɔtshi l’ekimanyielo ka kiatshikatshi yata ɔnɛ: “Lande na kahombaye mbetawo Bible,” lo mbuta kânga ɔnɛ:
4 “Anto ndekana % 90 l’andja w’otondo wekɔ la Bible, koko anto yema tshitshɛ tsho mbakiadia tena tshɛ. Lande na ngasɔ na?” Adia edingɔ ehende wa l’etatelo ka kiatshi yakɔ kâmɛ ndo 2 Timote 3:16. Shande dibuku Parole de Dieu. Naka nde ambodilongola, tɛnde oshinga adiɔ. Naka nde amboditona, tshikɛnde kiatshi yakɔ dia nde shidiya ndjiadia, ko wɛ kotola ndo yambalo yande l’ɔtɛ a dui wa komelo wata ɔnɛ: “Bible mbutaka kɛnɛ kayoya.”
4 Lam’embolayɛ anto wakalongola kiatshikatshi y’ɔnɛ “Lande na kahombaye mbetawo Bible,” wɛ mbeyaka pemba ɔnkɔnɛ:
◼ L’ɔkɔngɔ a wɛ mbohola sawo dianyu dia mbala ketshi, adia edingɔ ehende wa l’ekomelo ka kiatshi yakɔ. Mbola onto lasawola la yɛ dia kana nde ambokanyiyaka dia dikoka dia sɛna pondjo pondjo la nkɛtɛ. Longa okadimwelo ande, ko wɛ kotsha wate: “Ɛmɛnyi wa Jehowa mbetawɔka ɔnɛ mɛtɛ pɔlɔfɛsi tshɛ ya lo Bible yayokotshama, kâmɛ ndo nyɛ yata ɔnɛ anto wetawɔma le Nzambi wayonga la nshi yayaye ya dimɛna efula.” Ɛnyande osato wele lo lɛkɛ 13 lo biukubuku Katɔlɔmba. Dia tatɛ wekelo, fola lo wekelo 5, ko wɛ mbotɛ dia nyu sɛdingola ekadimwelo a wembola wele lawɔ.
5 Lo mbilo yele anto ndjashaka l’ɔtɛmwɛlɔ, wɛ mbeyaka pemba mbɔtwɛlɔ ka lo sawo kɛnɛ:
◼ “Tekɔ lo takeketsha anto dia vɔ mbɔsa Bible la nɛmɔ di’efula. Nkumbo efula yekɔ la Bible, koko ngana tsho mbakiadia l’etena kewɔ l’ekakatanu wa wolo. Onde wɛ ambɛnaka dikambo sɔ? [Tshikande akadimule.] Ondo anto fɔnyaka ɔnɛ Bible amboshila nɛmɔ. Dibuku nɛ, La Bible : Parole de Dieu ou des hommes ? mbishaka tolembetelo t’eshika tɛnya ɔnɛ Bible mbutaka mɛtɛ l’akambo wendana la siansɛ ndo ɔnɛ tɔ tɛnyaka woho wa kandola ekakatanu wa wolo wahomana la so nshi nyɛ.” Ka epole ɔsɛkɛ lo tokanyi tɔmɔtshi t’oma lo tshapita 8 kana 12 ya dibuku diakɔ, ko wɛ mboshadiɔ.
6 Lam’ayokalola dia tenda onto lakayasha dibuku “Parole de Dieu”, wɛ kokaka mbuta ɔnɛ:
◼ “Mbala ketshi, takɛnyi woho watokimanyiya Bible dia kandola ekakatanu wa wolo watomba nshi nyɛ. Tɔ kimanyiyaka ndo wanɛ wakietawɔ ɔnɛ kekɔ Dui dia Nzambi dia vɔ sɛna lɔsɛnɔ l’ɔngɛnɔngɛnɔ efula. Nte kɛnya dui dimɔtshi di’oshika diatanema lo Bible diɔmbɔdiwɔ lo dibuku diakamakotshikɛ.” Nyosawole dia dui dimɔtshi dia l’Afundelo diatawɔ lo tshapita 12, odingɔ 3-6, ko wɛ ndjihiya la wadielo w’odingɔ 7. Naka nde ambɛnya saki, sɛngɔlande dia mbeka la nde lo dibuku Ewo kana lo biukubuku Katɔlɔmba.
7 Sawo diayela nɛ mbeyaka kotola yambalo y’epalanga w’anto:
◼ “Nshi mɔtshi, nkumbo efula yaki la mbekelo ka mbadiaka Bible ndo wakayelaka awui wa lɔkɔ lo lɔsɛnɔ lawɔ la lo nkumbo. Onde ndo nyu mbaki la mbekelo kɛsɔ lo nkumbo kanyu? [Tshikande akadimule.] Ɛlɔ kɛnɛ, ndjaka oko anto efula wekɔ la wesanu heyama ko bu l’etena ka mbadia Bible, kana vɔ fɔnyaka ɔnɛ ɛlɛmbɛ wendana la lɔkɛwɔ wele lɔkɔ wambetaka lowe. Tshapita 13 ya dibuku nɛ, La Bible : Parole de Dieu ou des hommes ? kɔndɔlaka bɛnyɛlɔ sato di’anto wakatshikitanya nsɛnɔ yawɔ l’ɔkɔngɔ wa mbeka Bible. Naka wɛ nangaka mbadia woho wakâkimanyiya wolo wele la Dui dia Nzambi, kete layɔngɛnangɛna kotshikɛ dibuku nɛ.”
8 Lam’ayoyowenda nto, wɛ kokaka mbuta ɔnɛ:
◼ “Mbala ketshi, takasuya ɔnɛ anto wa nshi nyɛ mɔnyɔlaka ɛlɛmbɛ wa lo Bible wendana la lɔkɛwɔ. Akanyiyɛ, onde dui sɔ tendaka? [Tshikande akadimule.] Yeso Kristo akalembetshiya ɔnɛ mbeka dia mbeya Nzambi ekɔ ohomba w’efula.” Adia Joani 17:3. L’ɔkɔngɔ ko wɛ mbifola dibuku Ewo lo tshapita 1 ko wɛ kɛtshanya la nde l’odingɔ 5. Tɛnde ɔnɛ sho mbekaka l’anto Bible ofele ndo lɔmbande dia wɛ mbɛ̂nya woho wasalaso.
9 Tɔlɔmbɛ Jehowa dia nde tshɔkɔla weolo wadjaso dia kotola yambalo y’anto lo Bible, ehomɔ kakandasha anto tshɛ dia mbâlɔmbɔlaka!
[Caption on page 6]
Tosha Anto Traduction Du Monde Nouveau
1 Ɔmɔmbɔdi ɔmɔtshi w’awui wa lo Hɛbɛru la wa lo Grɛkɛ akate ate: “Sunganaka mɛtɛ di’onto monga [l’ekadimwelo ka] Traduction du monde nouveau. Tɔ kekɔ la nkudu ndo la lɔsɛnɔ, ndo sokoyaka ombadi atɔ lo nde kana yimba ndo mbeka. Tɔ kema olimu wakakambe Amɔnyɔdi wa Bible, koko w’akanga a timba walɛnya Nzambi ndo Ɔtɛkɛta Ande.” Sho suyaka dikambo sɔ! Ngande wokokiso kimanyiya akina dia vɔ ngɛnangɛna Traduction du monde nouveau oko sho lam’akishaso anto kâmɛ la dibuku Ewo lo Ngɔndɔ ka Dikumi l’Ahende kɛnɛ na?
2 Anto amɔtshi mbeyaka mbuta ɔnɛ: “Lekɔ la Bible kɛmɔtshi. Dimi bu l’ohomba wa kekina.” Diele la so dia mbaokiya ɔnɛ Traduction du monde nouveau kema oko Bible nkina. Tɔ kakakadimɔma l’ɔtɛkɛta watɛkɛtaso nshi nyɛ waleka mamema ɔtɛkɛta wa ntondo wakafundama Bible. Sho koka mɛna dia tɔ ndeka dimɛna naka sho mbɛdika woho wakakadimɔma ɛtɛkɛta wele oko wɛnɛ: “kituka” (Bible k’Ekila) la “lomingu lasondjawɔ nyama” (Traduction du monde nouveau) lo 1 Koreto 10:25.
3 Koko, anto yema tshitshɛ tsho mbadia Bible ndo tɔtɔi toto mbashihodia awui wa lɔkɔ wendana la lɔsɛnɔ la lushi la lushi. Vɔ wekɔ l’ohomba wa mbeya nganɛ wakoka Ɔtɛkɛta wa Nzambi mbâtshutshuya dia ntsha kɛnɛ kele ɔlɔlɔ ndo ɔnɛ naka vɔ ndjela alako atɔ wendana la losembwe, lɔkɛwɔ l’ɔlɔlɔ, ndo lɔsɛnɔ la nkumbo, kete vɔ kokaka kondja ekimanyielo dia vɔ ndɔshana l’ekakatanu wa lushi la lushi. Ngande wahomba dikambo sɔ kotshama na?
4 Sawo Dimɔtshi dia Mbokoya: “Onde wɛ mbetawɔka dia tekɔ l’ohomba w’ɔnɔmbɔdi w’oshika ɛlɔ kɛnɛ lo menda nganɛ wataleke anto ntsha awui wa kɔlɔ ndo woho wele lɔsɛnɔ la lo nshi yayaye lekɔ lo wâle? [Konga akadimule.] Kânga mbele Bible dibuku di’edjedja efula dioleki akina tshɛ, diɔ toshaka alako w’eshika lo woho wakokaso sɛna dimɛna ɛlɔ kɛnɛ ndo monga la lɔsɛnɔ la nkumbo l’ɔngɛnɔngɛnɔ.” L’ɔkɔngɔ ko wɛ mbifola tshapita 2 ya dibuku Ewo, ko wɛ mbadia odingɔ 10 la etelo ka ntondo ka l’odingɔ 11, la 2 Timote 3:16, 17. Naka nde nangaka, ko wɛ mbosha dibuku Ewo, ko mbôlembetshiya woho wekaso l’anto Bible ofele la ngelo, ko wɛ mbɔ̂lɛkɛ Traduction du monde nouveau. Naka wɛ mɛnaka dia ayoleka dimɛna tatɛ mbeka la nde lo biukubuku Katɔlɔmba, ko nyu mbeka. Enda lo biukubuku Woho wa Tatɛ ndo Tetemala la Sawola l’Anto lo lɛkɛ 2-7, ayɛna mbɔtwɛlɔ nkina yasungana.
5 Tɛnya dia sho ngɛnangɛnaka Traduction du monde nouveau ekadimwelo ka dimɛna efula. Sho koka ntsha ngasɔ lo kisha anto l’ohetoheto lo Ngɔndɔ kɛnɛ ka Dikumi l’Ahende.