Nsanganya y’olimu ya ngɔndɔ k’enanɛi

Lomingu la ngɔndɔ k’enanɛi 2

Osambu 39

Taahe 10: Waewoyelo. Waewoyelo w’oma l’Olimu Aso wa Diolelo. Sha alapɔlɔ w’olimu wa Ngɔndɔ ka Tanu wa lo Congo-Kinshasa la Congo-Brazzaville ndo wa l’etshumanelo kanyu. Keketsha apandjudi tshɛ dia ndjâkimɔ l’olimu w’esambishelo Ngɔndɔ k’Enanɛi kɛnɛ.

Taahe 17: “Totamanya Nɛmiya Lokombo la Jehowa la Dimɛna Efula.” Sala mbɔtwɛlɔ kahakoke kânga yaahe ɔtɔi, ko wɛ ndjeta lo wembola l’ekadimwelo. Ka epole ɔsɛkɛ lo avɛsa woshilami.​—⁠Enda lo dibuku Lɔsɛnɔ la Pondjo, lɛkɛ 184-5.

Taahe 18: “Kalasa ka l’Andja Ɔnɛ la Eyango Ayɛ wa lo Nyuma.” Papa ka nkumbo ayosawolaka nde l’ɔnande la pami kana la womoto. Vɔ wayohola ndo awui wa lo Réveillez-vous ! wa Ngɔndɔ ka Dikumi l’Ahende 22, 1995, lɛkɛ 7-11.

Osambu 148 ndo dɔmbɛlɔ dia ndjihelo.

Lomingu la ngɔndɔ k’enanɛi 9

Osambu 138

Taahe 8: Waewoyelo. Alapɔlɔ wa falanga.

Taahe 12: Ambatshi Mboka Kimanyiyaka Akina​—⁠Ehamelo Kakɔna Kamonga? Dako ndo ɛkɔnya wayɔlɔmbwama oma le omendji w’olimu. Nyovusole alako wakashama lo Olimu Aso wa Diolelo wa Ngɔndɔ ka Divwa 1998, lɛkɛ 4. Kɔndɔla nganɛ wakanyakongɛ dikambo sɔ l’etshumanelo kanyu, ndo ewoya woho wakahame anto wakakondja ekimanyielo kɛsɔ. Kɔnya ombatshi mboka ɔtɔi kana ahende la apandjudi amɔtshi wakakondja wahɔ oma l’ekimanyielo kawɔ. Keketsha wanɛ wele suke la kondja ekimanyielo kɛsɔ dia vɔ kondja wahɔ oma lo yɛdikɔ shɔ.

Taahe 25: “Shi Kakianɛ Lokuke Lambokodihwɛ Otsha l’Olimu w’Ombatshi Mboka?” Wembola l’ekadimwelo oma le ekumanyi kɛmɔtshi. Lo yoho yasungana, ɛnya waaso wele l’apandjudi efula dia vɔ kamba olimu w’ombatshi mboka. Kɔnya ambatshi mboka wakoka dia vɔ kɔndɔla nganɛ wakawakoke tondoya ekakatanu wakahomana la wɔ wakomɛ apandjudi efula. Nyɔsɛdingole “Dikongelo di’Ambatshi Mboka wa Pondjo,” lo tɛtɛ nganɛ wakoka onto kotsha lofulo la wenya lɔsɔ lo monga l’ekongelo ka dimɛna. Ewoya di’onto tshɛ lalanga kondja fɔrmilɛrɛ k’ombatshi mboka kokaka kikondja l’ɔkɔngɔ wa losanganya.

Osambu 202 ndo dɔmbɛlɔ dia ndjihelo.

Lomingu la ngɔndɔ k’enanɛi 16

Osambu 131

Taahe 10: Waewoyelo. Lam’ele mingu hiende tsho mambotshikala dia Ngɔndɔ k’Enanɛi shila, keketsha onto tshɛ dia nde sambisha la ntondo ka ngɔndɔ shila. Vusola “Ekongelo ka Losanganya Layaye la Lânde la Lushi Ɔtɔi.”

Taahe 15: Ehomba wa l’etshumanelo.

Taahe 20: Onde Wɛ Ekɔ lo Mbetɛ Anto Ambeki? Ɔkɛtshanyelo l’ampokami. Lo menda efula k’ekanda wakatasha anto, oyango aso la dia monga wa tatɛ mbeka l’anto Bible dia vɔ kondja wahɔ oma l’ekanda wakawalongola. Tɛ apandjudi amɔtshi wakɔndɔlɛ kɛnɛ kâshimba dia vɔ mbeka l’anto efula Bible: (1) Lo mbilo efula, ekɔ wolo tana anto walanga mbeka Bible. (2) Anto amɔtshi wɛnya saki mbutaka dia vɔ bu l’etena ka mbeka nɛ dia wekɔ la wesanu efula. (3) L’ɔkɔngɔ wa tatɛ mbeka l’onto Bible, mongaka wolo tana onto akɔ la ngelo dia tetemala mbeka la nde Bible. Ta nto tokanyi tele l’apandjudi amɔtshi lo kɛnɛ kendana l’olimu wa mbeka l’anto Bible: (1) mɛnaka di’oko dimi bu ombetsha w’oshika.’ (2) ‘Dimi kema l’etena ka mbekaka l’onto lomingu la lomingu.’ (3) ‘Dimi mbokaka wolo sɛngɔla onto dia mbeka la nde Bible.’ (4) ‘Dimi ngɛnangɛnaka komɛ lo elimu ekina wendana l’esambishelo.’ Sha alako w’amɛna lo kɛnɛ kendana la woho wakoka onto tondoya ekakatanu ɛsɔ dia mbeya ndjasha l’olimu wa mbetɛ anto ambeki. Apandjudi amɔtshi wakoka wakɔndɔlɛ ɔngɛnɛngɛnɔ wakondjawɔ l’olimu wa mbeka l’anto Bible.​—⁠Enda lo dikatshi di’okotsha di’Olimu Aso wa Diolelo wa Ngɔndɔ ka Tanu 1998, odingɔ 3-8, 15.

Osambu 100 ndo dɔmbɛlɔ dia ndjihelo.

Lomingu la ngɔndɔ k’enanɛi 23

Osambu 94

Taahe 10: Waewoyelo.

Taahe 15: Kimanyiya Wanɛ Wêke ka Ndjasha dia Vɔ Ngɛnangɛna Ekila ka Diwala. Ekumanyi ayɔlɔmbɔla sawo l’ampokami, diɔ mbɔsama oma lo dibuku Comment raisonner, lɛkɛ 224-226. Sho pomanaka l’atshukanyi amɔtshi wetawɔ losango la Diolelo koko hawohame esadi esadi nɛ dia diwala diawɔ diatatombe lo washo wa lɛɛta. Ɛnya woho wakokaso mbakimanyiya dia vɔ shihodia bonde kahomba Akristo monga la diwala dia nɛmɔ. (Enda lo Réveillez-vous ! wa Ngɔndɔ ka Ntondo 8, 1992, lɛkɛ 26-27.) Ɛnya woho wakokaso kimanyiya wadi l’omi wa ngasɔ la yewo tshɛ dia vɔ mbeya dia hawotɔsamaka oko ase etshumanelo edja tshɛ kele diwala diawɔ diateyama le lɛɛta.

Taahe 20: Sawo dimɔtshi l’atei a wanɛ wele l’Olimu Aso wa Diolelo wa Ngɔndɔ k’Esambele kana k’Enanɛi waki kombekama l’ɔtɛ w’assemblée kana sawo nɛ: “Ayoyotɛ Ose Buda Na?” Wembola la ekadimwelo. Mbala efula sho ndjambolaka kɛnɛ kahombaso mbita lam’ahomanaso l’anto wele bu l’ɔtɛmwɛlɔ w’Akristo wele la tokanyi, ditshelo, ndo mbekelo yahateye. Sawo nɛ mbele etenyi ka ntondo l’atei w’asawo atanu wayotomba wendana la dikambo sɔ. Lɔngɔsɔla kɛnyɔ mɔtshi ya dimɛna. Dia wɛ mbeya awui efula wendana l’Ase Buda, enda lo dikatshi di’okotsha di’Olimu Aso wa Diolelo wa Ngɔndɔ ka Hende 1998; lo dibuku Comment raisonner, lɛkɛ 21; ndo lo L’humanité à la recherche de Dieu, lɛkɛ 6.

Osambu 133 ndo dɔmbɛlɔ dia ndjihelo.

Lomingu la ngɔndɔ k’enanɛi 30

Osambu 99

Taahe 10: Waewoyelo. Ohola anto tshɛ dia vɔ kimɔ alapɔlɔ awɔ w’olimu wa Ngɔndɔ k’Enanɛi. ɛnɔmbɔdi wa Wekelo wa Dibuku wa l’Etshumanelo la dia menda kana onto tshɛ la l’olui awɔ ambokimɔ alapɔlɔ woho wa vɔ mbeya tomama lo biro la ntondo ka Ngɔndɔ ka Divwa 6.

Taahe 17: Sho Mbokaka Anangɛso Ngandji. Dako oma l’ekumanyi kɛmɔtshi kâmɛ ndo ɔkɛtshanyelo l’ampokami. Sawo diakɔ tomba oma lo Tshoto y’Etangelo ya Ngɔndɔ ka Dikumi l’Ahende 1, 1995, lɛkɛ 15-17, odingɔ 7-11. Ka epole ɔsɛkɛ l’ɛlɔlɔ wakondjaso lo mbeyana l’anangɛso dimɛna, lo keketshanya ndo lo kimanyiyana dia sho mbikikɛ ehemba. Ɛnya woho wakokaso ntshɛ anto efula dikambo sɔ. Lɔmba ampokami dia vɔ kɔndɔla nganɛ wakawakeketshama oma l’ekimanyielo ka la ngandji k’oma le anto akina.

Taahe 18: Sha Ɔkɔkɔ w’Elongamelo Kayɛ. Ekumanyi kɛmɔtshi ayɔkɔnya ɔlɔngɔlɔngɔ ɔtɔi kana ehende wele l’ɛnyɛlɔ k’ɔlɔlɔ ndo wɔtɔ kalasa. Mbala efula vɔ pomanaka l’ɛlɔngɔlɔngɔ kana esekaseka wa l’andja ɔnɛ walanga mbeya bonde kele ɛlɔngɔlɔngɔ l’esekaseka aso tonaka mbɔtɔ lo tɔkɛnyɔ tawɔ. Etena kakambawɔ la waaso asɔ dia mbalembetshiya akambo wa lo Bible wetawɔwɔ, ɛlɔngɔlɔngɔ l’esekaseka aso wekɔ l’ohomba wa tshikala nge nshi tshɛ. Ekumanyi l’olui ande wekɔ lo kɛtshanya nganɛ wahombawɔ ntsha naka onto owasha mfɔka kana didjoyadjoya. Vusola kanyi yoshami lo dibuku Les jeunes s’interrogent, lɛkɛ 277-281. Lembetshiya nganɛ wakokamɛwɔ ndo wasambishawɔ dimɛna lam’ayakeketshawɔ dia ntshaka kɛnɛ kele ɔlɔlɔ.

Osambu 129 ndo dɔmbɛlɔ dia ndjihelo.