Onde Wɛ Ayonga Lawɔ?
1 Ɔmɛnyi ɔmɔtshi waya edja efula lo mɛtɛ akate lushi lɔmɔtshi ate: “Naka wɛ mbetsha lushi la ntondo la losanganya la woke, kete wɛ pandja akambo efula!” Lande na kakandate ngasɔ na? Nɛ dia lushi la ntondo ekɔ etatelo ka dambo dia dimɛna efula dia lo nyuma diakatokatɛ ɔlɔngɔswamelo waki Jehowa. (Is. 25:6) Naka sho monga oma k’etatelo, kete tayɛnya dia tekɔ la saki kaki l’omembi w’esambo lakate ate: “Dimi lakangenangena lam’akawamvutela vati: Tutshu lu luudu la [Jehowa]!”—Osam. 122:1.
2 Koko, ɔnɔnyi wetshi, l’ahole amɔtshi wakasalema Nsanganya ya Distrikɛ yaki l’ɔtɛ a dui ɔnɛ: “Ɔtɛkɛta wa Prɔfɛsiya Waki Nzambi,” lofulo l’anto wakatanema Lushi la Tanu laki l’ɛse k’efula lo mbɛdika la lɔnɛ laki Lushi la Samalo ndo la Lomingu. Kɛsɔ mɛnyaka dia efula k’anangɛso l’akadiyɛso wakahandja asawo amɔtshi wa lo losanganya la woke wakatɛkɛta awui w’ohomba efula wendana l’ɔtɛkɛta wa prɔfɛsiya. Vɔ wakahandja nto diɔtɔnganelo di’ɔlɔlɔ dia l’anyawɔ ambetawudi.
3 Aha Wɛ Mbetawɔ Olimu wa l’Emunyi Koshimba: Ondo amɔtshi kɔmbɔtɔ Lushi la Tanu la wɔma w’ɔnɛ watokoyoshisha olimu awɔ wa l’emunyi. Koko, Ɛmɛnyi wa Jehowa efula wamboshola dia, ewandji awɔ w’olimu mbetawɔka mbasha dikimɔ naka vɔ tadilɔmbi nshi efula la ntondo. Owandji ɔmɔtshi w’olimu akambe efula dia mɛna woho wakayashikikɛ kadiyɛso kɛmɔtshi kele ombatshi mboka dia mbɔtɔka lo nsanganya tshɛ ya l’etshumanelo ndo ya weke, dui sɔ akayotshutshuya owandji ande dia mbɔtɔ lushi l’otondo lo losanganya lɔmɔtshi la woke!
4 Tɔfɔnyake wate owandji ayɛ w’olimu hatetawɔ kosha dikimɔ kana fɔnya ɔnɛ mbetsha lushi ɔtɔi lo losanganya hahɔndja ndjɔvu. La mbetawɔ tshɛ, yalɔngɔsɔla la loshilambo tshɛ dia mɛnya owandji ayɛ w’olimu l’ekimanyielo k’Afundelo bonde kele wɔtwɛlɔ wa nsanganya ya weke ekɔ dui di’ohomba efula dia l’ɔtɛmwɛlɔ ayɛ. (Heb. 10:24, 25) Oma lâsɔ ko wɛ ndjaɛkɛ tshɛ l’alaka waki Jehowa, eya wate wɛ ayokondja ɛngɔ tshɛ ka l’emunyi kayoyɔlɔmba naka wɛ mbetsha ehomba wa lo nyuma lo dihole dia ntondo lo lɔsɛnɔ layɛ.—Mat. 6:33; Heb. 13:5, 6.
5 Kɛnɛ koleki ele ngɛnangɛna ‘akambo woleki ohomba.’ (Fil. 1:10, 11; Osam. 27:4) Kɛsɔ kotshutshuyaka dia kongɛ akambo woho wa wɛ ndjokondja wahɔ efula oma lo yɛdikɔ nyɛ y’ohomba efula y’oma le Jehowa. Tatɛ sala ekongelo ka pondjo oma ko kakianɛ, ndo onga l’eshikikelo dia wɛ ayonga lawɔ nshi yakɔ shato!