‘Sho hatokoke tshika mvuta’
1 Yeso Kristo mbatalɔmbɔla olimu w’esambishelo. (Mat. 28:20; Mako 13:10) Kânga mbayaso oko miliyɔ shamalo y’apandjudi wasambisha lo wedja 234, sho hatohombe fɔnya ɔnɛ olimu aso w’esambishelo amboshila. Edja tshɛ kele Nzambi atâte ɔnɛ olimu amboshila, ‘sho hatokoke tshika mvuta’ akambo wakatɛnyi ndo wakatoke.—Etsha 4:20.
2 Toyaɛkɛ le nyuma kaki Nzambi: Satana ekɔ lo tôdja tohiha efula dia tɔkɔmɔla otema. (Eny. 12:17) Lâdiko dia lâsɔ, demba diaso diele kema kokele diekɔ lo tosoya la weho w’ekakatanu efula. Weho w’akambo asɔ mbeyaka ndjêkola yimba yaso l’ohomba w’efula wele l’olimu w’esambishelo. Koko, naka sho ndjaɛkɛ le Jehowa, kete nyuma kande ayotokimanyiya dia tondoya woho w’okakatanu tshɛ.
3 Lam’akahɛnyahɛnyamaka Akristo wa lo ntambe ka ntondo lo yoho yakaleke tshɛ kɔlɔ, vɔ wakalɔmbɛ Nzambi dia mbâkimanyiya woho wa vɔ tetemala mvuta dui diakinde la dihonga tshɛ. Jehowa akoke dɔmbɛlɔ diawɔ, akâlodja la nyuma kande ndo akawasha ohetoheto ndo eshikikelo kaki ohomba dia vɔ tetemala la sambisha. Dikambo sɔ di’akayonga l’etombelo akɔna na? Vɔ wakatetemala sambisha lokumu l’ɔlɔlɔ la dihonga.—Etsha 4:29, 31; 5:42.
4 Tatokake ɛtɛkɛta wa diɔnyɔ wɔma: Ditakataka di’anto kana emamatanya awɔ, kokaka ndj’ototsha wɔma dia kamba olimu aso. Koko, tohɔ ɛtɛkɛta wakate Petero nde l’apɔstɔlɔ akina la dihonga, lam’akiwɔ la ntondo ka tuminadi ta lâdiko t’ase Juda, ɛtɛkɛta wofundami lo Etsha 5:29-32. Oko wakadite Ngamaliyɛlɛ, ombetsha w’Ɛlɛmbɛ, olimu waki Nzambi hakoke shimbama. Aha oma lo wolo wakiso shamɛ mbakambema olimu ɔsɔ. Nzambi mbasukɛ olimu wa woke ɔnɛ ndo paka ndamɛ mbakoka mbôkamba!—Zek. 4:6.
5 Nyɛsɔ tɔlɔmbake Jehowa nyuma kande lushi la lushi woho wa tɔ tokimanyiya dia sambisha lokumu l’ɔlɔlɔ l’ohetoheto. Nyɛsɔ tote oko wakate Jeremiya ɔnɛ: lokumu la Diolelo lekɔ oko dja yalombalomba l’etei ka weka wakiso. (Jer. 20:9) Sho hatokoke ndiha onyɔ!