“Akambu tshe watshami dia mbudia antu”
1 Lam’asɛnaso l’anangɛso, sho pombaka salaka akambo w’amɛna wakoka mbaodia. Kɛsɔ nembetshiyaka dia sho pombaka ndjâkiyanya dia kokɛ wahɔ awɔ wa lo nyuma. Etena kakambaso olimu ɔmɔtshi wa l’emunyi wendana la tɛtɛmɔla ɛngɔ kɛmɔtshi kana olimu ɔmɔtshi (sala publicité), sho pombaka menda ɔlɔlɔ di’aha sho sala ndoko dikambo diakoka ndjotakanya anangɛso.—2 Kor. 6:3; Fil. 1:9, 10.
2 Anto amɔtshi wakayoyadjaka l’elimu efula wa wâle, ko mbɔsaka kana fɔnyaka ɔnɛ asekawɔ Akristo mbayoyonga oko wa kidiya yakiwɔ. Atshunda amɔtshi w’ekanda keketshaka ase olimu awɔ dia mbɔsa onto tshɛ oko kidiya k’oshika—mbidja ndo wanɛ wele la wɔ ɔtɛmwɛlɔ ɔtɔi. Anangɛso amɔtshi wakasale awandja wa weke wakawatshumanya Ɛmɛnyi wa Jehowa efula l’oyango wa mbakeketsha dia vɔ sukɛ kana ndjâla wa kidiya ya lo tshunda dimɔtshi di’okanda. Akina nyangaka mbudiya okanda awɔ kana ndjâfudjɛka falanga lo mbela asekawɔ ambetawudi diangɔ dimɔtshi diasondjawɔ, tobukubuku, bandɛ ya video la y’aradiyo kana mbaewoya awui lo Internet oyadi kânga vɔ kombâlɔmba diangɔ sɔ. Onde ekɔ dimɛna di’Okristo kamba la diɔtɔnganelo diaso di’Akristo dia nde sala okanda lo demba di’anango wa lo nyuma? Kema!—1 Kor. 10:23, 24, 31-33.
3 Anangɛso pombaka sɛna dimɛna: Dikambo sɔ halembetshiya ɔnɛ Okristo hakoke sala okanda nde l’ɔnango ɔmɔtshi. Ɔsɔ ekɔ dikambo diendana l’onto ndamɛ. Koko, amɔtshi pɔhɔlaka ekanda wakeketsha awui wa lokaki ndo vɔ tɔ̂nganyaka asekawɔ ambetawudi dia sanganya lawɔ akuta woho wa sala okanda kana dia vɔ mbadjɛka lonya. Efula l’atei awɔ wakayɔkɔ, ndo wakayoshishɛka wanɛ wakandaka la wɔ okanda akɔ akuta efula. Oyadi kânga wanɛ wakandaka la wɔ okanda ɔsɔ wakakotwama ondo la saki ka kondja akuta esadi esadi, ɔnɛ lakahɔhɔla dikambo sɔ hakoke mbuta dia nde bu l’onongo naka wamboyɔkɔ. Nde pombaka tasɛdingodi dimɛna la ntondo dia mbeya kɛnɛ kokoki ndjokomɛ anango lo nyuma kana lo demba naka kɛnɛ kosanganyishawɔ halɔnganyi. Wanɛ wele l’ɛkɛndɛ l’atei w’etshumanelo pombaka monga la yambalo y’efula lo kɛnɛ kendana l’elimu awɔ wa l’emunyi dikambo anto akina koka mbaɔsa la nɛmɔ ndo mbɛkɛ otema le wɔ. Ayonga dikambo dia kɔlɔ efula naka vɔ nanya nɛmɔ la kɔfiansɛ kawashawɔ. Ɔnangɛso kokaka shisha waɛsɛ w’olimu w’ekila naka nde amboshisha nɛmɔ diawosha anto akina.
4 Oyango wakiso pombaka monga wa tshika “akambu tshe watshami dia mbudia antu.” (1 Kor. 14:26) Sho pombaka mbewɔ dia sala dikambo tshɛ diakoka mbidja kana keketsha akambo w’okanda l’atei w’etshumanelo. Ndoko losambi lele lam’asa akambo asɔ la ɛkɔkɔ w’oma l’Afundelo wele laso wa tshumanaka kâmɛ.—Heb. 10:24, 25.