Ekongelo ka losanganya l’olimu
Lomingu la ngɔndɔ k’Esambele 10
Min. 12: Waewoyelo. Waewoyelo w’oma l’Olimu Aso wa Diolelo. Tɛkɛta dikambo dia alapɔlɔ w’olimu w’esambishelo wa Ngɔndɔ ka Divwa 1999 wa lo wodja aso ndo wa l’etshumanelo kanyu. Kotola yambalo lo kiombo yele l’ɔtɛ a dui ɔnɛ: “Enda la Wedi wa Dikatshi,” ndo sala ɛnyɛlɔ ɔtɔi kakoka kamba latɔ olimu dimɛna efula lo ɛtshi kanyu ka nkɛtɛ l’atei wa bɛnyɛlɔ dioshawɔ l’etenyi kɛnɛ.
Min. 15: ‘Sho Hatokoke Tshika Mvuta.’ Sala mbɔtwɛlɔ kahakoke kânga minitɛ ɔtɔi ko wɛ ndjeta lo wembola ndo ekadimwelo. Tɛtɛ lo ɛkɔkɔ watotshutshuya dia sho mbɔsa olimu aso w’esambishelo la nɛmɔ di’efula. Dja ndo alako w’eshika wele lo Tshoto y’Etangelo ya Ngɔndɔ ka Hende 1, 1997, lɛkɛ 16 polo 17.
Min. 18: “Akambu Tshe Watshami dia Mbudia Antu.” Dikumanyi dihende wakɛtshanya sawo nɛ. Wadia odingɔ tshɛ ndo avɛsa wele lɔkɔ. Watondja wetshelo washa etenyi tshɛ. Kawoke epole ɔsɛkɛ l’ohomba wa monga la shɛnɔdi oyadi lam’asalema akambo w’okanda kana lam’asɔndjana anto falanga kana ndjidja l’okanda ɔmɔtshi. Wavusole alako wele lo Tshoto y’Etangelo ya Ngɔndɔ ka Nɛi 1, 1997, lɛkɛ 15 polo 16.
Osambo 15 ndo dɔmbɛlɔ dia ndjihelo.
Lomingu la ngɔndɔ k’Esambele 17
Min. 15: Waewoyelo. Alapɔlɔ wa falanga. Lembetshiya lo tshena pe woho wokokiso kamba la biukubuku Le nom divin dia kimanyiya onto lele la nsaki dia nde shihodia ohomba wa mbeya ndo wa kamba la lokombo laki Nzambi.—Enda lo dibuku Comment raisonner, lɛkɛ 200 polo 201.
Min. 10: “Ekongelo ka Losanganya l’Otshimbedi Layaye.” Wembola ndo ekadimwelo. Ewoya datɛ diyosalema losanganya l’otshimbedi layaye ndo keketsha anto tshɛ dia vɔ tanema nshi yakɔ hiende. Keketsha anto tshɛ dia vɔ sala la wolo dia mbeta ambeki wa Bible oya lo losanganya. Wɔtwɛlɔ wa lo losanganya la woke mbeyaka nomialomia saki kawɔ ka ndjaka lo nsanganya ya l’etshumanelo mbala la mbala.
Min. 20: Onto Akɔna Ahombayɛ Mbokoya Na? Ombutshi wa pami alɔmbɔlɛ wekelo ande wa lo nkumbo nde l’ɔna ɔtɔi kana ahende wele l’ɛnɔnyi dikumi l’ɛmɔtshi. Nde amboshola dia esangɔ efula anande wosawolaka paka asawo wendana l’akɛnyi wa tɔkɛnyɔ wa lokumu, anto wa lokumu, wanɛ wanyanyawɔ lo televiziɔ, ndo akɛnyi wa mishiki. Nde ɛnya nganɛ wayakiyanyande lo dikambo sɔ nɛ dia weho w’asawo asɔ kɛnɛmɔlaka yimba ya l’andja ɔnɛ. Vɔ wekɔ lo kɛtshanya kɛnɛ kele lo Réveillez-vous ! wa Ngɔndɔ ka Tanu 22, 1998, lɛkɛ 12 polo 14. Ana akɔ wambetawɔ dia, tɛmɔla anto wa l’andja ɔnɛ ekɔ wâle ndo wambosuya dia ndoko kakoka anto wanyanyawɔ l’andja ɔnɛ mbisha Akristo. Vɔ wekɔ lo sɛdingola ɛlɔlɔ wakokawɔ kondja naka vɔ ndjela ɛnyɛlɔ k’ambutshi, ka dikumanyi, la k’anto akina washa ɛnyɛlɔ k’ɔlɔlɔ l’etshumanelo ndo djekoleko Yeso Kristo ɔnɛ lele ɛnyɛlɔ kawɔ koleki tshɛ dimɛna.
Osambo 34 ndo dɔmbɛlɔ dia ndjihelo.
Lomingu la ngɔndɔ k’Esambele 24
Min. 5: Waewoyelo.
Min. 15: Toyaɛnya Shamɛ oko Ekambi Waki Nzambi. Ekambi w’olimu ehende wakɛtshanya alako w’oma l’Afundelo wakashama lo Tshoto y’Etangelo ya Ngɔndɔ ka Ntondo 1, 1999, lɛkɛ 11 polo 16. Vɔ wekɔ lo mɛnya ohomba wa monga l’akoka wa mɛmba ɛkɛndɛ awɔ oko wewɔ ekambi w’olimu ndo wekɔ lo vusola kɛnɛ kakokawɔ ntsha onto l’onto woho wa mɛnya dia vɔ wekɔ lo kotsha ɛkɛndɛ wakiwɔ. Vɔ wekɔ lo sɛdingola ohomba wa monga bɛnyɛlɔ di’ɔlɔlɔ l’olimu w’esambishelo ndo wekɔ lo kɛtshanya toho takokawɔ mbeya sukɛ dikumanyi lo kimanyiya anto akina. Vɔ wamboyashikikɛ dia sala kɛnɛ tshɛ kakokawɔ sala woho wa kimanyiya etshumanelo dia shihodia ɔnɛ etena kambotshikala kaya bu efula ndo ɔnɛ ekɔ ohomba mpama ndo keketala lo nyuma.
Min. 10: Tofunde Anto Wahatakoke Mɛnan’awɔ Mukanda. Dako ndo ɔkɛtshanyelo l’ampokami. Lam’ele ekɔ wolo efula dia tana anto lawakawɔ, apandjudi amɔtshi kondjaka etombelo w’ɛlɔlɔ lo mbafundɛ mikanda. Yela alako anɛ: Mikanda anyu pombaka monga tomondo, monga l’ɛtɛkɛta w’oma l’Afundelo ndo monga l’ɛtɛkɛta wele la dilɛmiyɛlɔ. Aha ntoma mukanda wele kema la lokombo laki ɔnɛ lofundji mukanda akɔ. Funda l’anya kana lo mashinyi la kɔmba ndo yoho yokoki mbadiema dimɛna. Fundɛnde adrɛsɛ wa Mbalasa ka Diolelo, la wenya wasalema nsanganya kâmɛ ndo dikatshi dia leeta la nde ndja lo nsanganya. Aha kamba la adrɛsɛ waki Société. Vusola alako wele lo dibuku Manuel pour l’École lɛkɛ 86 polo 87, ndo l’Olimu Aso wa Diolelo wa Ngɔndɔ ka Dikumi l’Ɔtɔi 1996, l’etenyi kele l’ɔtɛ a dui ɔnɛ: Ekadimwelo lo Wembola Anyu.
Min. 15: Kamba la Mbɔtwɛlɔ y’Amɛna. Sɔnɔla mbɔtwɛlɔ ɔtɔi kana hiende oma lo lɛkɛ 2 polo 7 la biukubuku Woho wa Tatɛ ndo Tetemala la Sawola l’Anto lo Bible, ndo ɛnya woho wokoki kamba la yɔ dimɛna lo l’ɛtshi lanyu la nkɛtɛ. Mbola ampokami, “Mbɔtwɛlɔ yakamba la wɔ lam’ahomanawɔ l’onto ɔmɔtshi lo shinga, lo tshakitudi kana lo yoho kina.” Sala ɛnyɛlɔ ɔtɔi kana bɛnyɛlɔ dihende naka wonya wekekɔ.
Osambo 54 ndo dɔmbɛlɔ dia ndjihelo.
Lomingu la ngɔndɔ k’Esambele 31
Min. 15: Waewoyelo. Ohola anto tshɛ dia kimɔ alapɔlɔ awɔ w’olimu wa Ngɔndɔ k’Esambele. Lɔmba ampokami dia kɔndɔla awui wak’angɛnyangɛnya ngɔndɔ kɛnɛ lam’akawatakahanyaka tobukubuku.
Min. 12: Ehomba w’etshumanelo.
Min. 18: “Onde Wɛ Mandolaka Solo dia Lotutsha Diele la Jehowa?” Wembola ndo ekadimwelo. Dja ndo kɔmatɛrɛ y’amɛna yɛnya ndjâkimɛ kele la Jehowa.—Enda lo Étude perspicace vol. 2, lɛkɛ 499 polo 500.
Osambo 75 ndo dɔmbɛlɔ dia ndjihelo.
Lomingu la ngɔndɔ k’Enanɛi 7
Min. 10: Waewoyelo.
Min. 17: “Onde Wɛ Ekɔ Ɔsɔnyi?” Wembola ndo Ekadimwelo. Kɔndɔla dui dimɔtshi di’ekeketshelo di’oma lo Annuaire w’ɔnɔnyi wa 1997, lɛkɛ 43 polo 44.
Min. 18: Onga la Lomba lo Nshi Yayɛ Yayaye. Dako oma le ekumanyi. Ɛlɔngɔlɔngɔ l’esekaseka nangaka ndjɔngɛnangɛna lo nshi yayaye kâmɛ la wanɛ wokawɔ ngandji. Kânga mbele dikambo sɔ kema kɔlɔ, vɔ pombaka kitanyiya alako waki Nzambi naka vɔ nangaka tondoya dikambo sɔ. (Tuk. 19:20) Nsaki ka kotɔma oma le pami kana womoto kekɔ wolo efula lo nshi y’ɔlɔngɔlɔngɔ. Naka onto haheme nsaki yande, kete mpokoso kokaka ndjôkomɛ. Wembola efula mumbɔmaka lo kɛnɛ kendana la lomba lele l’ɛlɔngɔlɔngɔ kana esekaseka wakotɔma oma le pami kana womoto, lo monga la ngandji kayakonyaka lo membɔna la kanyi ya tshukana. Vusola alako wele lo dibuku Les jeunes s’interrogent lɛkɛ 231 polo 235. Ka epole ɔsɛkɛ lo awui w’ohomba wele lo Tshoto y’Etangelo ya Ngɔndɔ ka Dikumi l’Ahende 1, 1999, lɛkɛ 14 polo 18, lɔkɔ vɔ mɛnyaka ohomba wa ɛlɔngɔlɔngɔ l’esekaseka kotsha ɔkɛndɛ wele lawɔ tshɛ le Nzambi. Keketsha ɛlɔngɔlɔngɔ l’esekaseka dia vɔ kana lomba l’alako asɔ ndo tɔkɛtshanya l’ambutshi awɔ naka wekɔ la wembola.
Osambo 101 ndo dɔmbɛlɔ dia ndjihelo.