Kamba l’awui wêke ka mbeta dia memula nsaki

¹ Onde wɛ nangaka kondjaka tokanyi t’ɔlɔlɔ tayokokimanyiyaka dia mbetɛka olimu ayɛ w’esambishelo dimɛna ndo memulaka nsaki k’anto oya lo losango l’oma lo Bible? Lâsɔ, kambaka l’awui wêke ka mbeta l’andja kana l’ɛtshi kanyu ka nkɛtɛ dia wɛ tatɛ sawola l’anto. Wɛ kokaka kamba l’awui wêke katomba l’ɛtshi kanyu ka nkɛtɛ, lo wodja anyu kana lo wedja ekina. Awui asɔ tatshikitanaka lushi tshɛ. (1 Kor. 7:31) Tɔshi bɛnyɛlɔ diayela nɛ.

² Ekakatanu wendana l’ekondjelo ndo shɔkɔ ya lo lɔsɛnɔ ekɔ akambo wakiyanya mɛtɛ anto. Lâsɔ, wɛ kokaka mbuta wate:

◼ “Onde wɛ atoke kɛnɛ katawɔ ɔnɛ [ta dikambo diotombi] eshinga wa diangɔ wotadɛ nto?” Kana wɛ kokaka tɛkɛta dikambo dia wola w’elimu naka dihole dimɔtshi di’ɔsawɔ anto l’elimu diambonya ase olimu efula wa lɛkɔ. Oyadi woho akɔna walangayɛ tatɛ la sawo, wɛ kokaka tetemala lo mimbola wombola ɔmɔtshi l’atei a wɛnɛ: “Onde wɛ atayambolaka bonde kele lɔsɛnɔ aya wolo nganɛ?” kana “Onde wɛ fɔnyaka di’ayongaka nshi tshɛ wolo tana kɛnɛ ka ndjasɛnya?”

³ Sango yendana l’awui wa ngala, oko mpokoso yakomɛ ase nkumbo mɔtshi kana ambeki la kalasa, kokaka monga yoho kina ya tatɛ sawo. Wɛ kokaka mumbola wate:

◼ “Onde wɛ akadia lo jurunalɛ dikambo dia [ta mpokoso kakɔ kotombi]?” Oma lâsɔ mbola wombola ɔmɔtshi l’atei a wɛnɛ, “Oko le yɛ, lande na kambolola awui wa ngala efula nganɛ l’andja?” kana “Onde wɛ fɔnyaka dia tayokoka sɛna lo wɔladi lushi lɔmɔtshi?”

⁴ Sango yendana la dola dia weke, adidimu wa nkɛtɛ, ata w’ase ngelo walɔma l’atshuku efula wa nkɛtɛ, kokaka nto memula nsaki y’anto. Ɛnyɛlɔ, wɛ kokaka mimbola wate:

◼ “Onde Nzambi kele lo kiɔkɔ ya [ta mpokoso kɛmɔtshi kambotomba]?” Kana wɛ kokaka tɛkɛta dikambo dia ta kana ofukutanu ɔmɔtshi wêke ka ntomba ndo mbuta wate: “Naka onto tshɛ nangaka wɔladi, bonde kahekɔwɔ mbidja wɔladi akɔ na?”

⁵ Onaka woho wa mbeya awui wêke ka mbeta wakoka kamba layɛ dia tatɛ la sawo. Wɛ kokaka tana alako w’amɛna efula lo biukubuku Woho wa Tatɛ . . . lɛkɛ 2 polo 7 l’ɔtɛ wa dui wata ɔnɛ: “Akambo Weta l’Andja.” Koko, ewɔ dia ntambɛ l’asawo wendana l’ase pɔlitikɛ kana l’elui ɛmɔtshi w’anto. Lo dihole dia sala ngasɔ, kotola yambalo y’anto oya l’Afundelo ndo oya lo Diolelo diaki Nzambi diele ehomɔ kâmɛ kayokandola ekakatanu w’anto lo pondjo.