Ekadimwelo lo wembola anyu

◼ Lande na ekɔ ohomba le ampokami dia vɔ nyanga kana mbadia avɛsa wonya wâlɔmba ɔtɛkɛtshi lam’atandasha sawo diande na?

Kɛnɛ kayoshikikɛ mbala yahomba ɔtɛkɛtshi nɔmba ampokami dia mbɔsa Bible yawɔ ko mbadia avɛsa wâlɔmbande dia mbadia, ele ɔtɛ a dui watandɔmbɔla la naka sawo diakɔ mendanaka l’ɔsɛdingwelo wa divɛsa la divɛsa di’etenyi kɛmɔtshi ka l’Ɔtɛkɛta waki Nzambi.

Ekɔ ohomba mbohɔka dia oyango ɔmɔtshi wadiema avɛsa ele dia shikikɛ ɔnɛ awui watama tomba oma lo Bible. Oyango okina ele dia sɛdingola djembetelo mɔtshi y’oma l’Afundelo yasukɛ kɛnɛ kata ɔtɛkɛtshi woho wa mbetawɔ k’ampokami tshɛ keketshama. Lam’ayowɛna vamɛ kɛnɛ kata Bible wonya wadiema divɛsa dimɔtshi di’ohomba, ampokami wayonga la eokelo ka dimɛna efula. Lâdiko wa wadielo w’avɛsa, ekɔ nto ohomba mbɔsaka nɔtɛ ndo tayelaka awui watama.

Kânga mbakoka Société mbidja avɛsa efula lo plan kɛmɔtshi, avɛsa akɔ ekɔ dia kimanyiya ɔtɛkɛtshi dia nde mbeya nɔngɔsɔla sawo diande. Avɛsa asɔ kokaka mbewoya awui w’ohomba wa lo sawo kana mbokimanyiya dia nshihodia atɔndɔ amɔtshi (principes) w’oma l’Afundelo ndo mpotɔ kɛnɛ kalangawɔ mɔmbɔla lo sawo diakɔ. Ɔtɛkɛtshi la dia mbeya shikikɛ avɛsa anɛ wele ohomba efula lo ɛɔmbwɛlɔ ka sawo diande ndo nɔmba ampokami dia mboyela wonya watandadia avɛsa akɔ ndo wâlembetshiyande. Avɛsa akina wasukɛ lokanyi la sawo kokaka mbadiema kana mbuta tsho akambo wele lɔkɔ ko mbeta, etena kɛsɔ, kema ohomba di’ampokami nyanga avɛsa akɔ.

Etena kadia ɔtɛkɛtshi avɛsa wakandasɔnyi dia mbadia, nde la dia mbawadia mbala kakɔ ɔtɔi oma lo Bible koko aha oma lo dikatshi dimɔtshi diakafundama lo mashinyi kana l’ɔrdinatɛrɛ. Lam’alɔmbande ampokami dia mbadia kamɛ la nde Bible, ɔtɛkɛtshi la dia mbuta hwe lokombo la dibuku, tshapita, ndo divɛsa kana avɛsa wahomba mbadiema. Naka nde momuya yema la ntondo lo mboka wombola ɔmɔtshi kana lo mbuta lo tshena pe bonde kahomba mbadiema divɛsa diakɔ, kete nde ayosha ampokami diaaso dia vɔ mbishola divɛsa diakɔ. Mbohola nto divɛsa diayanga la mbadiema ayokimanyiya ampokami dia vɔ mbodiohɔ. Koko, bu dimɛna mbuta lɛkɛ kana numɛlɔ ka dikatshi katanema divɛsa diakɔ, nɛ dia ampokami wekɔ la dikadimwelo dia Bible diotshikitanyi. Nyanga avɛsa dia mbadia etena kâlɔmba ɔtɛkɛtshi kimanyiyaka ampokami dia vɔ kondja wahɔ oma lo nkudu kele l’Ɔtɛkɛta waki Nzambi lam’alembetshiyama ɔtɛkɛta akɔ wonya watasalema sawo.​—⁠Heb. 4:⁠12.