Tôngake la wɔma wa Jehowa lushi tshɛ
1 “Woma wa [Jehowa] weli etatelu ka yimba.” (Osam. 111:10) Vɔ tokeketshaka dia sala kɛnɛ kele ɔlɔlɔ ndo tokimanyiyaka dia sho mboka kɛnɛ kele kɔlɔ ɔkɔngɔ. (Tuk. 16:6) Wɔma ɔsɔ ekɔ dilɛmiɛlɔ di’oshika diele laso otsha le Otungi aso, vɔ totshutshuyaka di’aha sho mbonyangiya kana mbohindolɛ. Ɔsɔ ekɔ ɛngɔ kele laso ohomba ndo sho la dia kɛnɛmɔlaka wɔma ɔsɔ lushi tshɛ.—Tuk. 8:13.
2 Lushi tshɛ, yimba y’andja ɔnɛ waki Satana tɔsɛngiyaka la wolo tshɛ dia sho ndjela mboka ya kɔlɔ y’andj’akɔ. (Ef. 6:11, 12) Demba diaso diele bu kokele ndola l’akambo wa kɔlɔ ndo diɔ totomaka paka otsha lo kɔlɔ. (Ngal. 5:17) Diakɔ diele, dia kitanyiya wadjango waki Nzambi, dia monga l’ɔngɛnɔngɛnɔ, ndo dia kondja lɔsɛnɔ, sho pombaka mbôkaka wɔma lushi tshɛ.—Euh. 10:12, 13.
3 Lo Heberu 10:24, 25, vɔ tolakaka dia sanganaka kâmɛ dia sho keketshanaka ‘efula’ lo nshi nyɛ yasɛnaso. Wɔtwɛlɔ wa lo nsanganya wa mbala la mbala ekɔ ohomba efula naka sho nangaka mbika lo nshi y’ekomelo nyɛ. Wɔma wokaso di’aha nyangiya Nzambi totshutshuyaka dia mbɔtɔka lo nsanganya ndo ndjiɔsaka la nɛmɔ efula. Wanɛ woka Nzambi wɔma mbɔsaka wɔtwɛlɔ wa lo nsanganya oko diɛsɛ di’ekila.
4 Kitanyiya didjango diatotɛ dia sambisha lokumu l’ɔlɔlɔ la Diolelo ekɔ yoho kina ya mɛnya wɔma wokaso Nzambi. (Mat. 28:19, 20; Etsha 10:42) Oyango wa ntondo w’olimu aso w’esambishelo ele kimanyiya anto dia vɔ mboka Jehowa wɔma ndo sala lolango lande. Sho kotshaka dikambo sɔ lo salaka waendelo w’eyoyo, lo sala tshɛ dia tatɛ mbeka l’anto Bible lawakawɔ, ndo lo mbetshaka anto akina ɛlɛmbɛ tshɛ waki Nzambi. Woh’ɔsɔ mbayotɛnya wɔma wokaso Jehowa ndo ngandji ka wonyaso onto.—Mat. 22:37-39.
5 Wanɛ wahoke Nzambi wɔma hawɔngɛnangɛna awui wa lo nyuma, ndo vɔ ndjɔkɛnɛmɔlaka yimba kana dionga dia l’andja ɔnɛ diakonya anto lo nyɔi. (Ef. 2:2) Nyɛsɔ toyashikikɛ dia ‘kambɛ Nzambi olimu w’ekila la wɔma ndo la lokomba.’ (Heb. 12:28) Ngasɔ mbayotokondja ɛtshɔkɔ washa Nzambi anto watowokaka wɔma lushi tshɛ.