Onde Diɔtɔnganelo di’Akristo Diekɔ Ohomba?
1 “Lohita ɔtɔi hatɔngɔna odika.” Awui asɔ wakate ofundji ɔmɔtshi wa lo ntambe ka 17 mɛnyaka tsho kɛnɛ kata Bible lo dikambo di’ohomba wele l’onto tshɛ wa monga l’ɔngɛnyi. (Tuk. 18:1) Diɔtɔnganelo diaso di’Akristo kotshaka ohomba ɔsɔ. Lo toho takɔna t’ɔlɔlɔ na?
2 L’Esambishelo: Ɔlɔlɔ ɔmɔtshi woleki tshɛ ele yoho nyɛ yatosukɛ ndo yatokeketsha anangɛso l’olimu wa lo sɛkɛ. Yeso akatome ambeki ande “ahendi ahendi” dia tosambisha. (Mako 6:7; Luka 10:1) Lo ndjela ɛnyɛlɔ kɛsɔ, etena katombaso l’anto akina l’olimu w’esambishelo, sho mɛnaka mɛtɛ ka kɛnɛ kele lo Undaki 4:9, 10. Lam’atatakambe olimu aso kâmɛ, mbetawɔ, okitanyiya, la ngandji kele l’asekaso toshaka dihonga ndo mvusolaka ohetoheto waki laso ntondo.
3 Oma l’Ekimanyelo ka Lânde: Nkumbo kaso k’anto l’ɔnango kekɔ nto kiɔkɔ y’ekeketshelo ndo y’ɛlɔmbwɛlɔ yatokimanyiya dia ndɔshana l’ɛhɛnyɔhɛnyɔ ndo dia shika tanga la ntondo k’ehemba. Asekaso Akristo mbeyaka kotola yambalo yaso lo avɛsa amɔtshi watɛkɛta awui wendana l’ekiyanu aso hita. Vɔ mbeyaka ndo sala dɔmbɛlɔ dikambo diaso, oko wasalaso dikambo diawɔ. (2 Kor. 1:11) Ndo aha la tamu, ɛnyɛlɔ kawɔ k’ɔlɔlɔ totshutshuyaka lo elimu w’ɔlɔlɔ ndo tokeketshaka.
4 Oma lo Nsanganya: Sho kondjaka ɛtshɔkɔ w’oma lo lɔngɛnyi laso l’Akristo etena kɔtɔso lo nsanganya ya l’etshumanelo mbala la mbala. (Heb. 10:24, 25) Nsanganya shɔ yekɔ l’awui efula wa lo nyuma, ndo otshwelo aso lo nsanganya yakɔ tokakatanyaka wolo l’asekaso ambetawudi. Nsanganya nyɛ toshaka diaaso dia mpokamɛ woho wakɛnɛmɔla anangɛso w’apami ndo akadiyɛso mbetawɔ kawɔ, oyadi oma lo lɔyɛnga kana oma l’atei w’ampokami. (Romo 1:12) Dimama diaso dia lɔngɛnyi keketalaka efula etena kembɔnaso l’oyango wa keketshana kana wa kimanyiyana la ntondo ndo l’ɔkɔngɔ wa nsanganya. Tena sɔ toshaka waaso wa sho kɔndɔlɛ asekaso awui wakatokomɛ shwamɛ wakeketsha mbetawɔ. Woho wasanganaso aha ndoko l’okakatanu sho l’anto walanga Jehowa, ɔtɛkɛta ande, olimu ande, ndo ekambi ande mongaka la shɛngiya y’ɔlɔlɔ lo kɛnɛ kendana la lonto laso.—Fil. 2:1, 2.
5 Tekɔ l’ohomba wa nsangana l’Akristo wasekaso. Otondonga aha vɔ, tshike totonga la pâ dia kɛndakɛnda lo mboka ka tshitshɛ katɔla otsha lo lɔsɛnɔ. Koko, oma lo ngandji ndo ekeketshelo kawɔ, sho kokaka tetemala kɛndakɛnda otsha l’andja w’oyoyo waki Jehowa wele la losembwe.—Mat. 7:14.