Ngande Wakokaso Monga la Nkumbo Yele Nge lo Nyuma?

¹ Nkumbo y’Akristo sunganaka mandɔma lo woho ‘wamamemawɔ Nzambi l’atei wa mvudu yawɔ.’ (1 Tim. 5:⁠4) Koko lo menda efula ka tɔsɛngiya ta kɔlɔ takoka nɛndja mbetawɔ kawɔ, ekɔ ohomba efula di’ase nkumbo kamba la wolo dia monga la lonyuma la nge. Woho akɔna na?

² Ewandji Walɔmbɔla oko Kristo: Ewandji wa nkumbo pombaka mbokoya Yeso Kristo lo woho wɛmbawɔ ɔkɛndɛ awɔ wa keketsha ase nkumbo yawɔ. Lâdiko dia kɛnɛ kakandasale dia mɛnya ngandji katokande, mbut’ate woho wakandetawɔ nyɔi oko olambo dikambo diaso, Yeso ekɔ lo tetemala ‘la ndesha ndo la nama’ etshumanelo. (Ef. 5:​25-29) Ambutshi woludi la ngandji ndjelaka ɛnyɛlɔ k’ekokelo ka la ngandji kɛsɔ lo kotshɛka ase nkumbo yawɔ ehomba wa lo nyuma lushi la lushi. Kɛsɔ nembetshiyaka di’ambutshi la dia nɔmbɔlaka wekelo wa lo nkumbo lomingu tshɛ, nɔmbɔlaka ɔkɛtshanyelo wa shikaa w’akambo wa lo nyuma naka kokaka, ndo salaka dia kandolaka ekakatanu kam’atombawɔ.​—⁠Euh. 6:​6, 7.

³ L’Olimu w’Esambishelo: Ase nkumbo tshɛ pombaka mbeya dia sambisha anto akina awui wendana la Jehowa ndo asangwelo ande ekɔ etenyi kɛmɔtshi k’ohomba k’ɔtɛmwɛlɔ awɔ. (Is. 43:​10-12) Ambutshi, naka nyu nangaka dia ananyu monga Ɛmɛnyi wa Jehowa wele la kɔlamelo, kete nyu pombaka tatɛ k’ɔlɔmɔ dia nɔngɔsɔla etema awɔ lo dikambo di’olimu w’esambishelo. Nyosawole la wɔ dia mbaɛnya bonde kele ekɔ ohomba ndjahombia dia kamba olimu w’esambishelo ndo ndjashaka lɔkɔ lomingu tshɛ. (Mat. 22:​37-39) Oma lâsɔ, nyoyalɔngɔsɔlɛ dia tombaka la wɔ mbala la mbala l’esambishelo.

⁴ Nyoleke keketsha ase nkumbo dia vɔ shihodia ohomba w’olimu w’esambishelo lo mbɔsaka wonya oma lo wekelo wa lomingu la lomingu wa lo nkumbo dia nɔngɔsɔla ndo sala mbɔtwɛlɔ kɛmɔtshi ka dimɛna oko kɛnyɔ. Nyosha ɔna l’ɔna wetshelo wendana l’olimu w’esambishelo ndo nyakimanyiya dia vɔ pama lo ndjela ɛnɔnyi ndo akoka awɔ. L’ɔkɔngɔ wa nyu sambisha kamɛ, sawola l’ana dia mbeya nganɛ wakawɛnyi ɔlɔlɔ w’otema waki Jehowa. Kɔndɔlɛwɔ akambo amɔtshi wakeketsha mbetawɔ. Lo yɛdikɔ yayoleka nkumbo ‘nongamɛ ɔnɛ Nkumadiɔndjɔ ekɔ ɔlɔlɔ’, mbayowoleka mamema Jehowa ndo mbayowokeketshama dia shika tanga ‘l’akambo wa kɔlɔ tshɛ.’​—⁠1 Pet. 2:​1-3.

⁵ Lo Nsanganya: Ekɔ mɛtɛ ɔlɔ efula etena kakimanyiyana ase nkumbo dia vɔ tshɛ mbɔtɔka lo nsanganya ya l’etshumanelo, djekoleko naka ɔmɔtshi ambɔlɛmba, kana ambɔkɔmɔ! Kadiyɛso kɛmɔtshi keke dikɛnda akate ate “lam’akalola papa oma l’olimu, nde nɛmbaka.” “Koko lam’awotɛmi dikambo dimɔtshi dia dimɛna diayɔtɛkɛtama lo losanganya la la dikɔlɔ sɔ, kɛsɔ mbokeketshaka dia nde ntshɔ. Ndo lam’ayaokami dia lambɔlɛmba, nde keketshakami dia ntshɔ lo nsanganya.”​—⁠Heb. 10:​24, 25.

⁶ Nyosale Akambo Kamɛ: Ase nkumbo pombaka kambaka kamɛ, ɛnyɛlɔ elimu wa la ngelo. Pombaka nto monga la wonya wa tɔkɛnyɔ kana wa nanolaka demba. Yema ya wɛngɔ wa nkumbo k’otondo, la weho ekina wa tɔkɛnyɔ, kana tshɔ tenda ewotɔ ekɔ tena di’ɔngɛnɔngɛnɔ diahohamɛ.​—⁠Und. 3:⁠4.

⁷ Nkumbo y’Akristo yele nge lo nyuma tondoyaka ekakatanu wa lushi la lushi wakoka nɛndja lonyuma lawɔ. Lo ndjasukanya la Jehowa, vɔ mɛnaka dia nde mbashaka nkudu kande.​—⁠Ef. 6:⁠10.