Onde Wɛ Ekɔ lo Mbeka Woho wa Mbadia la Funda?

¹ Di’onto mbeka dia kondja ewo ka mɛtɛ ka Nzambi ndo k’asangwelo ande, nɔmbamaka dia nde mbeya yema ya mukanda. Efula mɛnaka dia mbeya mbadia la funda ekɔ ehomɔ ka woke kadiholɛ anto mboka ka vɔ tɛmɔla Jehowa Nzambi woho wahombama. (Eny. 1:⁠3) Anto efula wakêke dia mbadia la funda oma lo kalasa ya wanɛ waheye mbadia la funda yalɔngɔswama lo efula ka tshumanelo diaso. L’ahole watanemayɔ, vɔ kambaka la biukubuku Eka Woho wa Mbadia la Funda (ay-OT) lo kalasa shɔ. Okambelo wa la biukubuku shɔ mɛnyaka dia yɔ yekɔ yoho ya dimɛna ya kimanyiya anto dia vɔ mbeya mbadia la funda lo tshenyi ya wonya.​—⁠1 Tim. 4:13; Mat. 24:⁠45.

² Woho wa Nɔngɔsɔla Kalasa ya Mbeya Mbadia la Funda: Tênde tuwuiwui tɔmɔtshi t’oma lo biukubuku shɔ tɛnya woho wa nɔngɔsɔla kalasa shɔ: “Oko woho wasalema lo Kalasa k’Olimu wa Teokrasi, oyadi apandjudi wambobatizama kana wahatabatizama, vɔ tshɛ kokaka fundja nkombo yawɔ lo kalasa kɛsɔ. Naka dikumanyi wambɛna dia ekɔ ohomba mbata kalasa ɔtɔi kana efula ya mbeya mbadia la funda, kete vɔ koka mbisha onto ɔmɔtshi lakoka ɔkɛndɛ wa ndjilɔmbɔlaka. . . . Anangɛso mbele mɛtɛ l’ɔkɛndɛ wa ndakanya. Koko, naka ndoko ɔnangɛsɔ lele l’akoka wa nɔmbɔla kalasa kɛsɔ, kete kadiyɛso kɛmɔtshi kakoka mbeyaka sɔnama dia ntsha olimu ɔsɔ. . . . Dikumanyi mbeyaka nɔmba kadiyɛso kɛmɔtshi dia nde nɔmbɔla kalasa k’akadiyɛso ato ndo/ kana kalasa k’ana w’apami l’ana wa wamato wahatabatizama. Lam’ele kadiyɛso ekɔ lo kamba olimu ɔsɔ wa ndakanya lo dihole di’ɔnangɛso, nde pombaka kanga kitambala l’ɔtɛ. L’ahole wakoka, ayonga dimɛna dia kalasa kɛsɔ nɔmbwamaka mbala hiende kana shato lo lomingu woho w’ambeki pama esadi esadi. Lam’asa wekelo la wekelo, pombaka mbisha ambeki adɛvɔara wa vɔ tosala la ngelo, ko ɔnɔmbɔdi ndjênda la ntondo ka tatɛ wekelo w’oyoyo. Wekelo tshɛ pombaka mbishama lo wonya wasungana le ambeki suke la tshɛ. Amɔtshi kahanyaka kalasa l’elui wa totshitshɛ ndo ndakanyaka la ntondo ka Wekelo wa Dibuku wa l’Etshumanelo. Akina kakitolaka kalasa ko ndakanyaka wonya wasalema Kalasa k’Olimu wa Teokrasi. Olui wa dikumanyi dia l’etshumanelo mbahomba shikikɛ wonya ndo dihole diayɔtɔka wanɛ weka dia mbeya mbadia la funda kalasa.”

³ Otungi aso Jehowa akatotonge la dikoka dia diambo efula dia mbeya mbadia la funda. Koko pombaka sala la wolo dia kondja akoka asɔ. Difuto dioleki woke dia mbeya mbadia la funda ekɔ dia monga l’akoka wa mbetawɔ Ɔtɛkɛta wa Nzambi ndo wa kitanyiya wetshelo waki Nzambi. ‘Pombaka wɛ mbowadiaka la dui di’ɔkɔkɛ la yanyi ndo l’otsho.’​—⁠Jas. 1:⁠8.