Tokotsha Ehomba Aso wa lo Nyuma
1 Losanganya la distrikɛ laso layaye lele l’ɔtɛ a dui ɔnɛ “Apandjudi wa Diolelo Wele l’Ohetoheto” layotosha diaaso dia dimɛna efula dia kotsha ehomba aso wa lo nyuma. L’ɛnyɛlɔ ka mbo ya ndɛ ya l’emunyi ya dimɛna efula, ekongelo kɛsɔ kayotolesha dimɛna lo nyuma “la aui wa mbetawo.” (1 Tim. 4:6) Tɔ kayotokimanyiya dia sho ndeka ndjasukanya la Jehowa. Ndo sho koka nongamɛ dia nongola alako ndo ekeketshelo kayotokimanyiya dia ndɔshana l’ekakatanu wa lo nsɛnɔ yaso. Jehowa toshikikɛka ate: “Dimi layuketshaka ndu layukenyaka mbuka ka we nkendakenda. Dimi layukulakaka, layukendaka.” (Osam. 32:8) Tekɔ mɛtɛ l’ɔngɛnɔngɛnɔ dia kondja ɛlɔmbwɛlɔ kande koludi la ngandji lo nsɛnɔ yaso! Tɔsɛdingole awui amɔtshi wahombaso tsha dia kondja wahɔ efula oma l’ekongelo ka losanganya lɔsɔ.
2 Sho Pombaka Nɔngɔsɔla Etema Aso: Onto tshɛ l’atei aso ekɔ l’ɔkɛndɛ wa nama otema ande wa didjidji. (Tuk. 4:23) Kɛsɔ nɔmbaka dia sho ndjaekiya ndo mbeya ehomba aso hita. Losanganya ekɔ etena kahombaso kana yimba lo diokanelo diasaso la Jehowa ndo etena kahombaso ‘sɛdingola ɛlɛmbɛ wa kokele wakoka totshungola.’ Dia nɔngɔsɔla etema aso dia ‘mbetawɔ dia dui monɛma lɔkɔ,’ sho pombaka sɛngasɛnga Jehowa dia nde tɔsɛdingola dimɛna woho wa mbishola ‘dikambo dia kɔlɔ’ tshɛ dieso l’ohomba wa engwelo ndo dia tɔlɔmbɔla otsha “lu mbuka ka pundju.”—Jak. 1:21, 25; Os. 139:23, 24.
3 Tohokame ndo Tokane Yimba: Yeso akandola Mariya nɛ dia nde akahokamɛka awui ande dimɛna, nde akate ate: “Mariya ambosonola leke l’ololo, lo haluyosama uma le ndi.” (Luka 10:39, 42) Naka tayonga la yimba ya woho ɔsɔ, kete hatotetawɔ dia efukutanu mbekola yimba yaso. Sho pombaka mbidjasɛ ndo monga la yambalo etena kasalema losanganya. Sho pombaka mbewɔ dia tɛkɛta kana mbeteta tshanana ndo sho pombaka menda dimɛna di’aha fukutanya anto akina la telefɔnɛ, la motorɔla, kana la kamɛra.
4 Lam’ahokamɛso asawo, ekɔ ohomba mbɔsa nɔtɛ ya tomondo yakoka tokimanyiya dia mɛna woho watɔmbwama sawo. Sho pombaka kakatanya kɛnɛ kokaso la kɛnɛ kambotoshilaka la mbeya. Kɛsɔ mbayotokimanyiya dia shihodia ndo dia kimɛ awui akɔ. Lam’avusolaso awui wakatafundji, sho pombaka sala dikambo sɔ la kanyi ya kamba l’awui akɔ. Onto tshɛ la l’atei aso koka ndjambola ate: ‘Ngande wendana dikambo sɔ la diɔtɔnganelo diasami la Jehowa? Etshikitanelo akɔna wahombami sala lo lɔsɛnɔ lami na? Woho akɔna wakokami kamba l’awui anɛ lo woho wasɛnami l’anto akina? Ngande wakokami kamba lawɔ l’esambishelo?’ Kɛtshanya l’anto akina awui walekaso ngɛnangɛna. Lam’ayototsha akambo asɔ tayokondja ekimanyielo ka momba awui waki Jehowa ‘l’atei w’etema aso.’—Tuk. 4:20, 21.
5 Tokambe l’Awui Wekaso: L’ɔkɔngɔ wa nde mbɔtɔ lo losanganya lɔmɔtshi la distrikɛ, pami kɛmɔtshi akate ate: “Losanganya lɔnɛ lakendanaka l’onto tshɛ, lɔ lakatshutshuya onto tshɛ dia sɛdingola otema ande ndo w’ase nkumbu kande, ndo mbasha ekimanyielo k’oma l’Afundelo koludi la ngandji kahombama. Lɔ lakakeketsha dia nyomoleka shihodia ɔkɛndɛ ami wa kimanyiya etshumanelo lo yoho y’efula.” Ondo anto efula wa l’atei aso wakayaoke woho akɔ wamɛ. Koko, aha kondja tsho ekeketshelo oma lo losanganya kete ambokoka. Yeso akate ate: “Naka nyu mbeyaka akambu ane, nyu nyayuyala la otshoko lam’ayunyuwatsha.” (Joa. 13:17, sho mbɛnganyisha alɛta ango.) Sho pombaka kamba l’akambo wendana laso shɔamɛ. (Fil. 4:9) Ɔsɔ mbele yoho yakoka tokimanyiya dia kotsha ehomba aso wa lo nyuma.
[Kiombo ya lo lɛkɛ 5]
Tokane Yimba l’Awui Wekaso:
■ Ngande wendana awui wokaso la diɔtɔnganelo diasaso la Jehowa?
■ Ngande wahombawɔ monga la shɛngiya lo woho wasɛnaso l’anto akina?
■ Ngande wahombaso kamba la wɔ lo lɔsɛnɔ laso ndo l’olimu w’esambishelo?