Katohokame la yambalo tshɛ dia sho nkondja wetshelo
1. Lande na kahombaso mpokamɛ la yambalo tshɛ dia nkondja wetshelo lo Losanganya la distrikɛ?
1 Kema edja, Losanganya la distrikɛ la 2013 layanga ntatɛ. Welo efula wakadjama dia nɔngɔsɔla losanganya lɔsɔ dia lɔ salema dimɛna l’andja w’otondo. Onde wɛ amboshila ndjalɔngɔsɔla dia monga lo nshi yakɔ shato ya losanganya lɔsɔ? Eelo mɛtɛ nsanganya ya weke kokaka monga l’awui amɔtshi wekola yimba, diakɔ diele nɔmbamaka dia sho mbidja welo dia ndjela ekongelo ka losanganya lɔsɔ la yambalo tshɛ. Lam’ele tenyi dia losanganya lɔsɔ mongaka etale ndeka tenyi dia nsanganya ya l’etshumanelo, ekɔ ohomba sho dihokamɛ la yambalo tshɛ. Ndo nto, lɔkɛndɔ l’otsha lɛkɔ ndo awui akina mbeyaka tɔlɛndja demba. Kakɔna kayotokimanyiya dia sho mpokamɛ losanganya lɔsɔ la yambalo tshɛ dia nkondja wetshelo?—Euh. 31:12.
2. Ngande wakokaso nɔngɔsɔla etema aso dia ndjoyela ekongelo ka Losanganya la distrikɛ?
2 La ntondo ka losanganya ntatɛ: Sitɛ kaso k’Ɛtɛrnɛtɛ, www.jw.org, kekɔ la ekongelo ka losanganya lɔsɔ, mbidja ndo ɛtɛ w’asawo tshɛ ndo divɛsa ɔtɔi kana avɛsa ahende wasukɛ sawo. Naka tekɔ l’akoka wa mbɔtɔ l’Ɛtɛrnɛtɛ dia menda awui asɔ la ntondo, kete vɔ wayotokimanyiya dia sho nɔngɔsɔla etema aso dia ndjoyela losanganya lakɔ dimɛna. (Ez. 7:10) Onde hanyokoke mbɔsa etena ka takɛtshanyisha akambo asɔ la ntondo, lo Ɔtɛmwɛlɔ anyu wa lo nkumbo wa la dikɔlɔ?
3. Kakɔna kayotokimanyiya dia sho ndjela Losanganya la distrikɛ la yambalo tshɛ?
3 Wonya wa losanganya: Naka kokaka, kete ayoleka dimɛna wɛ tatshwe lo nkomba la ntondo ka losanganya ntatɛ. Ndo nto, wɛ mbeyaka nyima telefɔnɛ kayɛ diaha tɔ kofukutanya wonya wayowokelelɛka, kayowokotomɛka mesajɛ kana kayowokobipɛka wonya wa losanganya. Ko naka wɛ nangaka ntshika telefɔnɛ kayɛ hwe, kete paka wɛ kidja l’adidimu diaha tɔ mfukutanya anto akina wonya wayokelɛ onto ɔmɔtshi. Ndo nto, naka wɛ ayokamba l’ehomɔ kekina kasawolawɔ l’anto, kete kosale la wolo diaha tɔ mfukutanya anto akina. Ewɔ ndɛ kana nnɔ wonya wa losanganya. (Und. 3:1) Kendake ɔtɛkɛtshi tɛɛ. Etena kalɔmbande dia mbadia divɛsa dimɔtshi, foola Bible kayɛ dia wɛ ndjela wadielo. Kɔsake ndo yema ya nɔtɛ ya tomondo.
4. Ngande wakoka ambutshi nkimanyiya anawɔ dia mpokamɛ losanganya la yambalo tshɛ dia nkondja wetshelo?
4 Ambutshi vɔ lawɔ pombaka nkimanyiya anawɔ dia vɔ mpokamɛ la yambalo tshɛ dia vɔ nkondja wetshelo. Tukedi 29:15 mbutaka ɔnɛ: “Ona lahalakema, atutshaka nyangu sonyi.” Ɔnkɔnɛ, ekɔ ohomba di’ase nkumbo tshɛ mbidjasɛ kaamɛ di’ambutshi ndjashikikɛ ɔnɛ anawɔ wekɔ lo ndjela losanganya la yambalo tshɛ, lo dihole dia vɔ sawolaka, fundanɛka mesajɛ kana tetetaka tsho. Oyadi ana wahatakoke nshihodia oseka dui tshɛ diatama lo losanganya, vɔ kokaka mbetshama diaha vɔ ndala ndjɔ ndo dia mbidjasɛ ki.
5. Lande na kele ekɔ ohomba sho mboholaka akambo wa lo losanganya, ndo ngande wakokaso nsala dui sɔ?
5 Lushi tshɛ l’ɔkɔngɔ wa losanganya: Totshimbatshimbake amboleka l’ɔkɔngɔ wa losanganya. Sala tshɛ dia wɛ ndalaka esadi. Mvusola kɛnɛ kakayetshami ayokokimanyiya diaha wɛ kiohɛ esadi. Ndo nto, ekɔ ohomba mbɔsa minitɛ kaanga yema tshitshɛ dia nkɛtshanya lo nkumbo awui waketshi lo losanganya. Naka wɛ ekɔ lo ndɛ yangɔ wɛ l’ɔngɛnyi ayɛ, lande na kahayatondja nɔtɛ yayɛ dia wɛ nkahana la nde akambo w’ohomba wakakɔngɛnyingɛnyisha lo losanganya? Etena kayonyokalola la ngelo l’ɔkɔngɔ wa losanganya, onde hanyokoke mbɔsa yema ya wenya etena kasalanyu Ɔtɛmwɛlɔ wa lo nkumbo wa la dikɔlɔ dia nyu nkɛtshanya woho wakokanyu nkamba l’akambo wakanyoki lo losanganya lo nkumbo kanyu? Nyu kokaka nto tshungolaka etena lomingu tshɛ dia nsɛdingola etenyi kɛmɔtshi ka mukanda w’oyoyo wayotondjama.
6. Lande na kele ekɔ ohomba dia sho mbɔtɔ nshi yakɔ shato ya lo Losanganya la distrikɛ? Lembetshiya.
6 Yangɔ ya ndɛ y’osadi kimanyiyaka dia diangɔ dia wotsho diakatale nkamba dimɛna lo demba diaso. Ngasɔ mbediɔ ndo lo kɛnɛ kendana la mbo ya lo nyuma yayotɔlɛ lo Losanganya la distrikɛ. Ɔnkɔnɛ, nyɛsɔ sho tshɛ tosale kɛnɛ tshɛ keso l’akoka wa nsala dia nkondja wahɔ lo nshi yakɔ shato tshɛ ya lo Losanganya la distrikɛ, lo pokamɛka la yambalo tenyi tshɛ dia losanganya l’oyango wa sho ndjokamba l’awui akɔ.