Diaaso dia ndeshama lo nyuma ndo dia ngɛnangɛna
1. Ngande wakotsha Jehowa ehomba wa lo nyuma w’ekambi ande?
1 La ngandji tshɛ, Jehowa kotshaka ehomba wa lo nyuma w’ekambi ande. Etena kele andja w’otondo wekɔ lo diɛnɛ la ndjala ka lo nyuma, sho tekɔ lo ndeshama dimɛna. (Is. 65:13) Yoho mɔtshi yatolesha Jehowa lo nyuma ele lo tshimbo ya nsanganya ya distrikɛ yasalema ɔnɔnyi l’ɔnɔnyi. Onde wɛ ekɔ lo ndjalɔngɔsɔla dia mbɔtɔ lo tenyi tshɛ dia Losanganya la distrikɛ layaye lele l’ɔtɛ a dui ɔnɛ: “Nyuma kaki Nzambi kekɔ lo tɔlɔmbɔla”? Dambo dia woke dia lo nyuma diambɔlɔngɔswama dikambo diaso.
2. Kakɔna kahombama dia ndjalɔngɔsɔla la ntondo dikambo dia losanganya la distrikɛ?
2 Toyalɔngɔsɔlɛ la ntondo: “Tukanyi ta kanga kolamelu, tatûkundjiyaka diango efula. (Tuk. 21:5) Ɔnkɔnɛ, etena keyɛ lo ndjalɔngɔsɔla dia mbɔtɔ lo nshi yakɔ shato ya losanganya, tengengake dia sawola la owandji ayɛ w’olimu naka wɛ ayonga l’ohomba wa nɔmba dikimɔ. Naka wɛ ayonga l’ohomba wa pango, onde wɛ amboyalɔngɔsɔla lo dikambo sɔ? Ayonga nto ohomba wɛ nɔngɔsɔla yangɔ ya tɔlɛka la midi kâmɛ la ananyɔ lo dihole dia losanganya. Yalɔngɔsɔla dia komaka la wonya ko tana dihole dia mbidjasɛ ndo memba osambo wa mbɔtwɛlɔ kâmɛ la anto akina ndo ndjela dɔmbɛlɔ dia mbɔtwɛlɔ.
3. Weho akɔna w’ahɔndɔ wahombaso nɔngɔsɔla dia ndɔta?
3 Sho nangaka ndjashikikɛ dia ahɔndɔ wayotɔlɔta wekɔ amɛna ndo tɔkɔmba. (1 Tim. 2:9, 10) Losanganya la distrikɛ toshaka diaaso dia dimɛna efula dia sambisha anto. Monga la ɛnamelo ka dimɛna l’osomba wasalema losanganya ndo ndɔta tshapa yaso ya losanganya totshikitanyaka la anto wele kema ambetawudi ndo wanɛ watenda tshikalaka la diambo di’efula.
4. Kakɔna kayotokimanyiya sho la nkumbo yaso dia ndeka kondja wahɔ lo losanganya?
4 Tohokame la yambalo tshɛ: Lo mɛtɛ, sho hatolange pandja kânga lofusa ɔtɔi l’oma lo dambo dia lo nyuma diambɔlɔngɔswama sɔ! (Tuk. 22:17, 18) Tayelaka avɛsa wadiama lo Bible yaso ndo mbɔsaka nɔtɛ ya tomondo ayotokimanyiya diaha yimba yaso mbekekɔ wonya wa losanganya. Oma lâsɔ, la dikɔlɔ sho kokaka kɛtshanya la anto akina akambo w’ohomba wakatoki lo losanganya. Akɛnama lo ɛnɔnyi wetshi ɛnɛ dia akɛnda amɔtshi wakasawolaka kana wakakɛnyaka wonya wa losanganya kana wakatomanɛka mesajɛ lo telefɔnɛ. Naka tekɔ l’ana, kânga wanɛ waya topalanga, ayonga dimɛna sho mbidjasɛ kâmɛ la wɔ ndo mpokamɛka losanganya kâmɛ la nkumbo yaso lo dihole dia mbatshika dia vɔ todjasɛ la asekawɔ akina.
5. Ngande wakokaso fudia ɔngɛnɔngɛnɔ aso etena keso lo losanganya?
5 Tɔngɛnɛngɛnɛ lɔngɛnyi lele lam’asaso: Mbo ya ndɛ ndekaka monga ɔlɔ naka tekɔ lo ndjilɛ kâmɛ la angɛnyi aso. (Tuk. 15:17) Woho akɔ wâmɛ mbele lɔngɛnyi la l’anangɛso l’akadiyɛso ndekaka tɔngɛnyangɛnya etena keso lo losanganya. Omalɔkɔ, etena kahatatatɛ losanganya, ayonga dui di’ɔngɛnɔngɛnɔ naka sho mbɔsa yɛdikɔ ya mbisha anto akina mɔyɔ ndo sawola la wɔ! (Osam. 133:1) Etena katɔlɔmba ɔnɛ lalɔmbɔla dia sho mbɔsa ahole la ntondo ka mishiki tatɛ, sho pombaka pembola asawo aso mbala kakɔ ɔtɔi ndo mbidjasɛ dia ndjela etatelo ka losanganya.
6. Kɔndɔla dui dimɔtshi diakakokomɛ diɛnya woho wakokaso sambisha anto wele l’osomba wasalema losanganya.
6 Tokambe l’oseka diaaso tshɛ dia sambisha: Nsanganya ya weke toshaka mbala tshɛ waaso w’amɛna efula wa sambisha. Anto wasondja diangɔ dia ndɛ mumbolaka Ɛmɛnyi wa Jehowa efula wɔtɔ lo losanganya watshɔ toyanga yangɔ ya ndɛ l’ɔkɔngɔ wa losanganya kɛnɛ kalembetshiya ɔtɛ a dui wa losanganya wele lo totshapa tɔlɔtshiwɔ. Dui sɔ diakâkimanyiya dia sambisha akambo wa mɛtɛ. Anto amɔtshi wakambola awui asɔ wakelamɛ lo losanganya ndo vɔ wakaye.
7. Lande na kahombaso mbɔtɔ lo losanganya la distrikɛ layaye?
7 Wenya efula waketshama dia nɔngɔsɔla losanganya, ahole wayolosalema, adepartɛma wotshikitanyi ndo asawo. Welo ɛsɔ tshɛ wakadjama la ngandji dia nɔngɔsɔla dambo dia lo nyuma nɛ mɛnyaka woho wakotshɛ Jehowa la ngandji tshɛ ekambi ande ehomba awɔ. Onto tshɛ la l’atei aso asale la wolo dia monga lawɔ ndo ndeshama lo nyuma! Etena kasalaso ngasɔ, otshikitanyi la andja ɔnɛ, ‘tayoda ekoko w’ɔngɛnɔngɛnɔ l’ɔtɛ wa eongelo k’ɔlɔlɔ k’etema aso.’—Is. 65:14.
[Kiombo ya lo lɛkɛ 4]
Waohwelo wendana la Losanganya la distrikɛ
◼ Ekongelo ka wenya: Nshi yakɔ shato, losanganya layomɛka lo eshidi 9:20 wa pindju. Nkuke yayodihɔmaka lo eshidi 8:00 wa pindju. Etena katatɛ mishiki wa Diolelo, sho tshɛ pombaka mbidjasɛ lo ahole aso dia ekongelo tatɛ lo yoho ya dimɛna. Lushi la tanu ndo la samalo, losanganya layokomɛka lo eshidi 4:55 wa dikɔlɔ, ndo Lushi la lomingu lo eshidi 4:00 wa dikɔlɔ.
◼ Ahole wa mbidjasɛ: Ohɔ dia paka wanɛ woye la yɛ mbala ɔtɔi kana wele la yɛ lo luudu lâmɛ mbahombayɛ namɛ ahole wa mbidjasɛ.
◼ Olelo wa la midi: Sho nɔmbaka anto tshɛ dia ndjaka la yangɔ ya ndɛ y’osadi, koko ya dimɛna, ɛnyɛlɔ: mapa, oyoko, abɔtɛ, alowa la ekate. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hakoke ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete hatototshɔ dia tosomba diangɔ sɔ le wanɛ wasondja mbo ya ndɛ. (Diewoyelo: Wanɛ wasondja mbo ya ndɛ hawokoke mbɔtɔ lo dihole diasalema losanganya oyadi wonya akɔna tshɛ.—Joa. 2:13-17.) Wanɛ wayokamba la waa babola dia katɛ mbo ya ndɛ lo dihole dia losanganya pombaka kondja lotshungɔ oma le anangɛso wendana la dikambo sɔ dia mbeya lɛnɛ akokawɔ ndjikitsha. Tɛdikɔ pombaka mbɔsama diaha aksida monga.—Luka 10:38-42.
◼ Weshasha: Sho kokaka mɛnya lowando laso lo kimɔka weshasha wa la lolango lo Mbalasa kaso ka Diolelo kana lo losanganya la woke dia sukɛ olimu wa l’andja w’otondo.
◼ Aksida ndo awui wa wanyandja: Wanɛ wakamba lo departɛma diendana la esakelo ka wanyandja wekɔ la lonyangu nɛ dia anto mbaelɛka mbala efula kânga lo awui wa totshitshɛ. Naka onto ambondama la hemɔ ka wanyandja lo dihole dia losanganya, nyote ɔnɛ lashana ahole lele suke la nyu, ko nde ayewoya mbala kakɔ ɔtɔi wanɛ wakamba lo Departɛma diendana la esakelo ka wanyandja. Lâsɔ anto aso wa tomanamana wele lo losanganya wendana la olimu ɔsɔ wayoya ndjenda woke woke wa dikambo diakɔ ndo wayosha ekimanyielo kahombama.
◼ Osangwelo wa awui: Ndoko ehomɔ ɔtɔi ka sangola awui kahomba kɔhama lo kiɔkɔ y’atɔtɔ kana lo ekongelo ka sɔnɔrizasiɔ ka lo losanganya la woke ndo pombaka kamba la dihomɔ sɔ lo yoho yahatofukutanya anto akina.
◼ Wɔsɛlɔ wa fɔtɔ: Lam’alangayɛ, naka wate munde fɔtɔ wonya wa losanganya, kete tokambake la angadimu. Lam’alanganyu, tanyelɛke anto wanda waa foto lo dihole dia losanganya. Naka nyambowaɛna lo dihole dia losanganya, kete tanyâlɔmbake dia vɔ nyonda foto.— Joa. 2:13-17.
◼ Telefɔnɛ: Sho pombaka ndjidima diaha yɔ mbekola timba t’anto akina.
◼ Pudipudi: Akɛnama dia mbala efula, wanɛ watosombaka mbo ya ndɛ mbikashaka mposo kana akatshi wa diangɔ sɔ lo sɛkɛ. Lâsɔ sɛkɛ di’otondo ndjololanɛka la akatshi, mposo, kana ɛlɔndɔ wa ponde la mindo nkina. Naka onto ambolanga somba yangɔ ya ndɛ oma le wanɛ watosondjaka diangɔ (ɛnyɛlɔ: bɔmbɔ, biskwiti, abɔtɛ, oyoko, kana ema kekina), kete nde pombaka tokasha akatshi, kana mposo ya diangɔ sɔ lo daala koko aha lo sɛkɛ. Naka tambɛna onto ambokasha dikatshi, lohoso kana ɔlɔndɔ wa ponde lo sɛkɛ, kete sho pombaka tɔngɔna ko tokasha lɛnɛ akashawɔ mindo. Lam’alanganyu, nyu anangɛso la akadiyɛso, nyɛsɔ todje welo wa lânde dia tshika dihole diaso diasalema losanganya pudipudi. Onto tshɛ la l’atei w’ampokami pombaka mbeya ohomba wa pudipudi. Naka onto tshɛ sala kɛnɛ kahombande sala, kete sɛkɛ dia losanganya diayotshikala pudipudi. Sho nangaka kɛnɛmɔla waonga wa Nzambi ka ekila katɛmɔlaso.—1 Pet. 1:15, 16; Etum. 19:10; Euh. 23:14.
◼ Lɛnɛ ohangiso: 1) Tohangiyake anto efula oleki lofulo laketawɔ kanga luudu. 2) Naka wɛ aya bu l’ohomba wa luudu, lam’alangayɛ ewoya dikambo sɔ aha la tshimbatshimba. 3) La ntondo ka wɛ katɛ, tambudi kanga luudu kana ɔnangɛso lendana la ohangelo wa lo Mbalasa ka Diolelo tɛdikɔ tshɛ tɔsami. 4) Aha wɛ kamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga ladiɔ ele wɛdimo ndo kanɛ anto akina. 5) Pudipudi kakatana la omamemelo le Nzambi. Kotshikake pango kayɛ wonya tshɛ kɔmba ndo pudipudi. Dikambo sɔ mendanaka ndo la Mbalasa ka Diolelo, kakokawɔ pangiya anangɛso la akadiyɛso w’oma lo tshumanelo dia tale. 6) Kɛnɛmɔla elowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka panga la yɛ dihole ɔtɔi.—Ngal. 5:22, 23.