Tolongamɛke le Jehowa
1. Naa ɔtɛ a dui wa losanganya la distrikɛ, ndo lande na kakokawɔ mɛtɛ?
1 Isaya akafunde ate: ‘Jehowa ekɔ Nzambi k’elombwelo. Wanɛ tshɛ watolongamɛka le nde wekɔ l’ɔngɛnɔngɛnɔ.’ (Is. 30:18b) Ɛkɔndɔ efula wa lo Bible mɛnyaka woho wakalanya Nzambi atunyi ande ndo wakandatshungola ekambi ande wa kɔlamelo. Wetshelo akɔna wakondja atɛmɔdi waki Jehowa ɛlɔ kɛnɛ oma lo ɛkɔndɔ ɛsɔ? Woho akɔna wakokaso ndjalɔngɔsɔla kakianɛ dikambo dia ‘lushi la woke ndo la wɔma laki Jehowa’? (Joe. 2:31, 32) Losanganya laso la distrikɛ lele l’ɔtɛ a dui ɔnɛ: “Etshungwelo kaya suke!” layototshutshuya dia sho ndjasɛdingola ndo kana yimba la ambola asɔ. Lɔ layotokimanyiya nto dia sho nongamɛka le Jehowa.
2. Woho akɔna wakokaso mɛnya lowando lo kɛnɛ kendana la losanganya laso la distrikɛ?
2 Onde wɛ amboyalɔngɔsɔla dia mbɔtɔ ndo kondja wahɔ lo nshi yakɔ shato ya losanganya lɔsɔ? Ɛnyɛlɔ, onde wɛ ambɔlɔmbaka owandji ayɛ w’olimu dikimɔ dia wɛ mbɔtɔ lo losanganya lakɔ? Tɔfɔnyake ɔnɛ nde ayokosha dikimɔ naka wɛ hɔlɔmbi. Dja dikambo diakɔ lo dɔmbɛlɔ, oma lâsɔ ko wɛ ndjɔlɔmba dikimɔ. (Neh. 2:4, 5) Aha paka ambotshikala nshi ngana tsho ko sho ndjoyalɔngɔsɔla lo kɛnɛ kendana la lɔkɛndɔ, la kɛnɛ kayototɔlɛ lɛkɔ, pango ndo awui akina w’ohomba. Ndjalɔngɔsɔla dimɛna ngasɔ, mɛnyaka dia tekɔ la lowando l’efula lo diangɔ dialɛso lo mɛsa wa Jehowa. Dikumanyi pombaka mbidja yimba dia kimanyiya wanɛ wele l’ohomba w’ekimanyielo dia ndjalɔngɔsɔla lo kɛnɛ kendana la losanganya la distrikɛ, djekoleko esombe wa lo etshumanelo.—Ngal. 6:10.
3. Waonga akɔna wahomba ekambi waki Jehowa kɛnɛmɔla l’osomba wasalema losanganya?
3 Dionga di’ɔlɔlɔ tombolaka Nzambi: Dionga diaso di’ɔlɔlɔ ekɔ tshondo y’esambishelo le anto akina etena katshumanaso leemba l’anto lo losanganya la distrikɛ. Kɛsɔ tɔlɔmbaka dia sala na? Lo dihole dia losanganya, anto akina pombaka ngɛnangɛna waonga aso w’Okristo wele oko: solo dia lotutsha, memakana, ndjakimɛ ndo ekanelo k’ɔlɔlɔ. (Ngal. 5:22, 23; Fil. 4:5) Sho tshɛ pombaka kɛnɛmɔla woho wa ngandji ka “hatshi akambu wa fumbosonyi, hayangi paka lulangu landi, hadia akambu wa kolo.” Oyadi ekakatanu wayotokomɛ, sho pombaka ‘sala akambo tshɛ dia lotombo la Nzambi.’—1 Kor. 10:31; 13:5.
4. Ngande wakoka ambutshi kimanyiya anawɔ dia vɔ monga la lɔkɛwɔ l’ɔlɔlɔ latombola Jehowa?
4 L’ɔkɔngɔ wa losanganya la distrikɛ lɔmɔtshi, jɛra y’ɔtɛlɛ ɔmɔtshi akâmbe heyama lo menda lɔkɛwɔ ndo ɛnamelo ka anaso ko nde akɛnya nsaki kande ka “nongolaka Ɛmɛnyi wa Jehowa l’ɔtɛlɛ ande.” Ɔsɔ ekɔ dikambo di’ɔngɛnɔngɛnɔ mɛtɛ! Kɛsɔ mɛnyaka ohomba w’ambutshi mbetshaka anawɔ ndo mbalamaka dimɛna. Kema dimɛna di’ambutshi tshika anawɔ lo ahole wohangiwɔ aha la mbalama. Paka namaka ana dimɛna. (Tuk. 29:15) Lɔkɛwɔ l’ɔlɔlɔ lele la ana latombole Jehowa ndo langɛnyangɛnya otema ande!—Tuk. 27:11.
5. Ngande wakokaso tombola Jehowa oma l’ɔlɔtɔ aso ndo oma l’ɔlɔngɔswɛlɔ aso wa divo?
5 Ɔlɔtɛlɔ ndo ɔlɔngɔswɛlɔ wa divo wa dimɛna: Ɔmɔmɔ la l’atei aso koka mbisha lonya dia ɛnamelo kaso ka l’osanga lo losanganya monga dimɛna, lo mbewɔ weho w’ɛlɔtɔ ndo ɔlɔngɔswɛlɔ wa divo wa kɔlɔ, wa kawotake, ndo wele bu kɔmba. Dikambo sɔ diekɔ ohomba oyadi etena katatatshu otsha l’osomba wayosalema losanganya, etena kalɔngɔsɔlaso dihole diayosalema losanganya, etena keso lo losanganya ndo etena katatakalola oma l’osomba wosalemi losanganya. Oko weso ekambi waki Nzambi, sho pombaka ndjakiyanya ntondo dia lokombo ndo lokumu la Jehowa, koko aha dia wahɔ wakiso hita. Ewandji wa nkumbo pombaka ndjashikikɛ dia kana ase nkumbo yawɔ wekɔ la ɛnamelo k’ɔlɔlɔ ndo kɔmba wonya tshɛ.—1 Tim. 2:9.
6. Lande na kahombaso monga l’ɛnamelo k’ɔlɔlɔ oyadi kânga etena katatasembola ekolo?
6 Ekɔ ohomba sho monga la ɛnamelo k’ɔlɔlɔ etena katatasembola ekolo. Etena katshɔso dia tɔlɛ dihole dimɔtshi, ekɔ ohomba sho monga l’ɔlɔtɔ w’ɔlɔlɔ wa woho walɔtaso lo losanganya. Ndɔtaka tshapa yaso ya losanganya toshaka diaaso dia sambisha lo tshakitudi.—2 Kor. 6:3, 4.
7. Ngande wakokaso mbisha lonya dia losanganya la distrikɛ mbeta dimɛna ndo l’ɔngɛnɔngɛnɔ? (Enda lo “Waohwelo wendana la losanganya la distrikɛ.”)
7 Isaya akafunde ate: “[Jehowa] atulangaka nyuhumuya lukulu l’olo, ndu atukumbulaka nyuka ketshi.” (Is. 30:18a) Lowando lele laso lo kɛtshi ndo ngandji ka mamba kaki Jehowa pombaka totshutshuya dia mbotombola oma lo lɔkɛwɔ laso ndo oma lo ɔlɔtɔ aso etena kayotosangana lo losanganya la distrikɛ. Losanganya la distrikɛ lele l’ɔtɛ a dui ɔnɛ: “Etshungwelo kaya suke!” latombole Nzambi kaso ndo latokimanyiya dia sho nongamɛka le nde!
[Kiombo ya lo lɛkɛ 5]
Waohwelo wendana la losanganya la distrikɛ
◼ Ekongelo ka wenya: Losanganya layomɛka lo eshidi 9:30 nshi yakɔ shato. Nkuke yayodihɔmaka lo eshidi 8:00 wa pindju. Minitɛ ngana tsho la ntondo ka losanganya tatɛ, ɔnɔmbɔdi ayodjasɛka lo lɔyɛnga etena kadjawɔ mishiki wa Diolelo wadihola losanganya. Sho tshɛ pombaka mbidjasɛ lo ahole aso etena kɛsɔ dia ekongelo tatɛ lo yoho ya dimɛna. Lushi la tanu losanganya ayokomɛka lo eshidi 5:15 wa dikɔlɔ, Lushi la samalo lo eshidi 5:05 wa dikɔlɔ, ndo Lushi la lomingu lo eshidi 4:10 wa dikɔlɔ.
◼ Ahole wa mbidjasɛ: Ohɔ dia paka wanɛ woye la yɛ mbala ɔtɔi kana wele la yɛ lo luudu lâmɛ mbahombayɛ namɛ ahole wa mbidjasɛ.
◼ Olelo wa la midi: Wakatotɛ dia ekɔ ɔlɔlɔ dia onto la onto ndjaka la yangɔ ya ndɛ y’osadi koko y’ɔlɔlɔ efula, ɛnyɛlɔ: mapa, oyoko, abɔtɛ, alowa la ekate. Ashi wa nnɔ, tshayi, kana eloko pombaka mbidjama lo diangɔ diahakoke mbolɛ dia mbewɔ aksida. Hakoke ndja la wanu lo losanganya la woke. Naka onto tshɛ ndja la yangɔ ya ndɛ kana ya nnɔ, kete dikambo sɔ ayoshimba diaha tosomba diangɔ sɔ le wanɛ wasondja mbo ya ndɛ. (Diewoyelo: Wanɛ wasondja mbo ya ndɛ hawokoke mbɔtɔ lɛnɛ asalema losanganya oyadi wonya akɔna tshɛ.—Joa. 2:13-17.) Wanɛ wayokamba la waa babola dia katɛ mbo ya ndɛ lo dihole dia losanganya pombaka kondja lotshungɔ oma le anangɛso wendana la dikambo sɔ dia mbeya lɛnɛ akokawɔ ndjikitsha. Tɛdikɔ pombaka mbɔsama diaha aksida monga.—Luka 10:38-42.
◼ Weshasha: Akuta efula tshɔka dia kongɛ losanganya la distrikɛ. Sho kokaka mɛnya lowando laso lo kimɔka weshasha wa la lolango lo Mbalasa kaso ka Diolelo kana lo losanganya la woke dia sukɛ olimu wa l’andja w’otondo.
◼ Aksida ndo awui wa wanyandja: Wanɛ wakamba lo departɛma di’esakelo ka wanyandja wekɔ la lonyangu nɛ dia anto mbaelɛka mbala efula kânga lo awui wa totshitshɛ. Naka onto ambondama la hemɔ ka wanyandja lo dihole dia losanganya, nyote ɔnɛ lashana ahole lele suke la nyu, ko nde ayewoya mbala kakɔ ɔtɔi wanɛ wakamba lo departɛma sɔ. Lâsɔ anto aso wa tomanamana wele lo losanganya wendana la olimu ɔsɔ wayoya ndjenda woke woke wa dikambo diakɔ ndo wayosha ekimanyielo kahombama.
◼ Osangwelo wa awui: Ndoko ehomɔ ɔtɔi ka sangola awui kahomba kɔhama lo kiɔkɔ y’atɔtɔ kana lo ekongelo ka sɔnɔrizasiɔ ka lo losanganya la woke ndo pombaka kamba la dihomɔ sɔ lo yoho yahatofukutanya anto akina.
◼ Wɔsɛlɔ wa fɔtɔ: Lam’alangayɛ, naka wate munde fɔtɔ wonya wa losanganya, kete tokambake la angadimu.
◼ Telefɔnɛ: Sho pombaka ndjidima diaha yɔ mbekola yimba y’anto akina.
◼ Pudipudi: Akɛnama dia mbala efula, wanɛ watosombaka mbo ya ndɛ le asondji, mbikashaka mposo kana akatshi wa diangɔ sɔ lo sɛkɛ. Lâsɔ sɛkɛ di’otondo ndjololanɛka la akatshi, mposo, kana ɛlɔndɔ wa ponde la mindo nkina. Naka onto ambolanga somba yangɔ ya ndɛ oma le wanɛ watosondjaka diangɔ (ɛnyɛlɔ: bɔmbɔ, biskwiti, abɔtɛ, oyoko, kana ema kekina), kete nde pombaka tokasha akatshi, kana mposo ya diangɔ sɔ lo daala koko aha lo sɛkɛ. Naka tambɛna onto ambokasha dikatshi, lohoso kana ɔlɔndɔ wa ponde lo sɛkɛ, kete sho pombaka tɔngɔna ko tokasha lɛnɛ akashawɔ mindo. Lam’alanganyu, nyu anangɛso la akadiyɛso, nyɛsɔ todje welo wa lânde dia tshika dihole diaso diasalema losanganya pudipudi. Onto tshɛ la l’atei w’ampokami pombaka mbeya ohomba wa pudipudi. Naka onto tshɛ sala kɛnɛ kahombande sala, kete sɛkɛ dia losanganya diayotshikala pudipudi. Sho nangaka kɛnɛmɔla waonga wa Nzambi ka ekila katɛmɔlaso.—1 Pet. 1:15, 16; Etum. 19:10; Euh. 23:14.
◼ Lɛnɛ ohangiso: 1) Tohangiyake anto efula oleki lofulo laketawɔ kanga luudu. 2) Naka wɛ aya bu l’ohomba wa luudu, lam’alangayɛ ewoya dikambo sɔ aha la tshimbatshimba. 3) La ntondo ka wɛ mbahɛ, talɔmbi kanga luudu kana ɔnangɛso lendana la ohangelo wa lo Mbalasa ka Diolelo dia tɛdikɔ tshɛ tɔsami. 4) Aha wɛ kamba lo yoho ya kɔlɔ la diangɔ diakawakitsha dikambo dia angɛndangɛnda. Dionga diahombaso monga ladiɔ ele wɛdimo ndo kanɛ anto akina. 5) Pudipudi kakatana la omamemelo le Nzambi. Kotshikake pango kayɛ nshi tshɛ kɔmba, ndo pudipudi. Dikambo sɔ mendanaka ndo la Mbalasa ka Diolelo, kakokawɔ pangiya anangɛso la akadiyɛso w’oma lo tshumanelo dia tale. 6) Kɛnɛmɔla elowa wa nyuma lo yoho yasɛnayɛ la anto akina, oyadi le ɔnɛ lokohangiyisha kana le anangɛso akina wa Akristo wakoka panga la yɛ dihole diakɔ diamɛ.—Ngal. 5:22, 23.