Ekadimwelo Lo Wembola Anyu
◼ Kakɔna kahombaso mbohɔka etena kakambaso la telefɔnɛ ya l’anya?
Telefɔnɛ shɔ kokaka tokimanyiya dia sawola l’anto akina suke la dihole tshɛ dieso. Kânga mbakoka tokimanyiya telefɔnɛ shɔ, sho pombaka sɛna wolo di’aha okambelo wa la yɔ kana wetelo w’anto lo telefɔnɛ l’etena kahasungana ndjekola yimba yaso oma l’olimu aso kana nsanganya yaso y’Akristo. Ngande wakoka salema dikambo sɔ?
Tokanyiya kɛnɛ kakoka tomba naka etena keso lo sambisha onto ko wambotelɛ lo telefɔnɛ kaso kana wambotobipɛ. Kakɔna kayɔfɔnya onto lasambishaso na? Kanyi yakɔna yayotshikala la nde lo wɔɔngɔ naka tambotokemɛ sawo dia kadimola lo leeta na? Tatosalake kânga dikambo ɔtɔi diakoka shimba anto akina dia pokamɛ losango la Diolelo. (2 Kor. 6:3) Omalɔkɔ, naka tekɔ lo tɛngɔla la telefɔnɛ yaso, sho pombaka ndjidima di’aha yɔ pembola sawo diaso kana di’anto akina etena keso l’olimu w’esambishelo.
Ngande wahombaso sala naka tekɔ lo konga anto akina wonya wasambishawɔ? Naka takayatshungwe yema y’etena dikambo di’esambishelo, shi kete sho pombaka mbidja yimba yaso tshɛ l’olimu akɔ? Lo menda dilɛmiɛlɔ diashaso olimu aso w’ekila, ekɔ ɔlɔlɔ sho ndjoyasha l’awui aso wele bu ohomba efula kana awui akina l’etena kekina koko aha lo wonya w’esambishelo. (Romo 12:7) Koko, dikambo sɔ halange mbuta dia hatokoke kamba la telefɔnɛ dia sambisha kana mbewoya onto lushi layotoyosawola la nde nto.
Lo yoho ya lânde, sho pombaka ndjalama lo kɛnɛ kendana l’okambelo wa la telefɔnɛ lam’atatakɛndjakɛndja, nɛ di’eyangelo ɛmɔtshi wakasalema mɛnyaka dia dikambo sɔ ndeka mbidja wanɛ watakɛndjakɛndja lo wâle. Sho pombaka nɛmiya ɔlɛmbɛ tshɛ washimba dia kamba la telefɔnɛ wonya watatakɛndjakɛndja.
Sho ndjaka lo nsanganya y’Akristo, ya weke ndo ya totshitshɛ dia ndjɔtɛmɔla Jehowa ndo dia ndjetshama oma le nde. Naka sho ngɛnangɛnaka waaso asɔ w’ekila, shi kete hatotokamba la telefɔnɛ yaso di’aha yɔ fukutanya yambalo yaso ndo y’anto akina lo waaso asɔ? Naka ekɔ dikambo dimɔtshi dialɔmba dia paka kadimola ko wony’akɔ, kete sho pombaka tomba l’andja wa dihole dia losanganya. Naka bu, lasɔ sho pombaka nɔngɔsɔlaka akambo aso hita kana akambo aso wa l’emunyi lo wenya ekina koko aha wenya w’ɔtɛmwɛlɔ mbut’ate lo wenya wa nsanganya kana w’esambishelo.—1 Kor. 10:24.
Okambelo aso wa la telefɔnɛ ya l’anya wɛnyake nshi tshɛ nɛmɔ diashaso anto akina ndo ɔnɛ sho ngɛnangɛnaka awui wa lo nyuma efula.