Ekongelo Ka Losanganya L’olimu

Lomingu la Ngɔndɔ ka Divwa 9

Osambo 209

Min. 13: Waewoyelo. Waewoyelo w’oma l’Olimu Aso wa Diolelo. Kamba l’alako wa lo lɛkɛ 8 dia sala bɛnyɛlɔ dihende diɛnya woho wa mbisha anto Tshoto y’Etangelo ya Ngɔndɔ ka Divwa 15 ndo Réveillez-vous! wa Ngɔndɔ ka Divwa 22. L’ɛnyɛlɔ tshɛ, ɛnya toho totshikitanyi ta mbekola wekamu naka onto ona dia komiya sawo lo mbuta ate: “Hangɛnangɛna Ɛmɛnyi wa Jehowa.”​—⁠Enda lo biukubuku Woho wa Tatɛ ndo Tetemala Sawola l’Anto lo Bible, lɛkɛ 9-10.

Min. 17:“Tokimanyiya Anto Akina dia Vɔ Tombola Jehowa.”a Naka wonya wekɔ, kete tɛkɛta dui ɔtɔi kana awui ahende w’ohomba w’oma lo dibuku Comment raisonner à partir des Écritures, lɛkɛ 200-202.

Min. 15: Lande Na Kamboshisha Anto Mbetawɔ? Ɔkɛtshanyelo l’ampokami. Mbala efula sho pomanaka l’anto wele la mbetawɔ ka tshitshɛ. (2 Tes. 3:⁠2) Dia sho mbasambisha akambo wa mɛtɛ wendana la Jehowa, sho pombaka ntondo nyanga dia mbeya tokanyi tele lawɔ lo dikambo dia Nzambi. Tende akambo anɛi wele lo dibuku Comment raisonner, lɛkɛ 169-170, wakoka shimba anto di’aha vɔ monga la mbetawɔ. Lɔmba ampokami dia vɔ mbuta mbɔtwɛlɔ kahombawo kamba la tɔ lo dikambo la dikambo. Kɔndɔla dikambo dimɔtshi diendana la mbɔtwɛlɔ ka dimɛna kana kamba la mbɔtwɛlɔ kɛmɔtshi lo nyɛ yele lo Réveillez-vous! wa Ngɔndɔ ka k’Enanɛi 22, 1993, lɛkɛ 14-15.

Osambo 122 ndo dɔmbɛlɔ dia ndjihelo.

Lomingu la Ngɔndɔ ka Divwa 16

Osambo 163

Min. 10: Waewoyelo. Alapɔlɔ wa falanga. Keketsha anto tshɛ dia vɔ tovusola nɔtɛ yakawɔshi lo losanganya l’otshimbedi l’etshi dia nɔngɔsɔla Losanganya l’Olimu la mbala kayaye. Nyɔsɛdingole sawo diata ɔnɛ “Onde Sho Mbeyaka Shɛngiya Yele la Pudipudi”?

Min. 18: Kakɔna Kakatasale Ɔnɔnyi Wetshi? Dako oma le omendji w’olimu. Tɛkɛta awui w’ohomba w’oma l’alapɔlɔ w’etshumanelo wa l’ɔnɔnyi w’olimu 2002. Andola anto tshɛ l’akambo w’ɔlɔlɔ wakasalema. Kotola yambalo lo kɛnɛ kakatshe etshumanelo lo wɔtwɛlɔ wa lo nsanganya, lo wendelo w’eyoyo la woho walɔmbɔlawɔ wekelo wa Bible ndo l’olimu w’ombatshi mboka wa tshanda. Sha alako wakoka mbakimanyiya dia vɔ nyomoleka ndjalowanya. Ɛnya eyango w’eshika wakokawɔ ndjadjɛ l’ɔnɔnyi wayaye.

Min. 17:Ekakatanu Wele l’Ambutshi Wodia Ana Vamɛ. Ekumanyi kɛmɔtshi akɔnya ombutshi ɔtɔi kana ahende wodia ana vamɛ (kana atshukanyi wele olonganyi ɔmɔtshi bu Ɔmɛnyi wa Jehowa) dia vɔ mɛnya ekakatanu wahomana lawɔ dia mbodia, mpokola, ndo mbisha anawɔ ɛlɔmbwɛlɔ ka lo nyuma. Ngande wasalawɔ dia kotshaka ɛkɛndɛ wa nkumbo, ndo mbɔtɔka lo nsanganya ndo tombaka l’olimu w’esambishelo mbala la mbala? Tɛtɛ l’alako amɔtshi wele lo dibuku Sheke y’Ɔngɛnɔngɛnɔ wa lo Nkumbo, lɛkɛ 104-110. Oko wɛnyamidiɔ lo lɛkɛ 113-115, ɛnya woho wakoka anto akina mbisha lonya.

Osambo 149 ndo dɔmbɛlɔ dia ndjihelo.

Lomingu la Ngɔndɔ ka Divwa 23

Osambo 107

Min. 10: Waewoyelo. Lo kamba l’alako wa lo lɛkɛ 8, Ekumanyi kɛmɔtshi ɛnya woho wa mbisha anto Tshoto y’Etangelo ya Ngɔndɔ ka Dikumi 1 ndo okambi w’olimu ɔmɔtshi ɛnya woho wa mbisha anto Réveillez-vous! wa Ngɔndɔ ka Dikumi 8. L’ɔkɔngɔ w’ɛnyɛlɔ tshɛ, vusola nto ɛtɛkɛta wa mbɔtwɛlɔ wakawakambi lawɔ dia nomialomia nsaki k’onto.

Min. 10: Ehomba wa l’Etshumanelo.

Min. 25: “Nyoke Nzambi Wɔma ndo Nyôtombole.” (Eny.14:⁠7) Dako ndo ɔkɛtshanyelo l’ampokami dia mvusola ekongelo ka losanganya l’otshimbedi la l’ɔnɔnyi w’olimu wetshi. Lɔmba ampokami dia vɔ mbuta awui w’ohomba wakaweke ndo woho wakawakambe l’awui akɔ l’onto ndo l’onto kana lo nkumbo. (Wɛ kokaka tawasha totenyi ta vɔ tayalɔngɔsɔdi la ntondo.) Tɛkɛta dikambo dia tenyi dia losanganya nɛ: (1) “Tokimanyiya Eyoyo dia Vɔ Monga la Wɔma wa Nzambi.” Ngande wakokaso kimanyiya anto wakɔtɔ lo losanganya la Eohwelo dia vɔ pama ndo koma ekambi waki Jehowa wele l’ohetoheto? (2) “Mboka Jehowa Wɔma Kɛdikɛdi Mpetsha Kɛnɛ Kele Kɔlɔ.” (w87 15/4 16-18) Ngande wakoka Tukedi 6:​16-19 tokimanyiya dia sho mbewɔ akambo wahetsha Jehowa, oko lotamanya, lokeso, oweso wa lomombo la l’emunyi, tɔkɛnyɔ ta kɔlɔ, okambelo wa tshambandeko wa l’Internet? (3) “Nyoleke Ndjakakatanya la Wanɛ Wokanyu Ngandji.” Sho nangaka Jehowa, Yeso, ase nkumbo kaso, ase etshumanelo; lâsɔ ngande wele ndeka ndjakakatanya la wɔ tokokɛka oma l’andja ɔnɛ? (4) “Toke Jehowa Wɔma Koko Aha Anto.” Ngande wakakokimanyiya wɔma waha nyangiya Jehowa dia wɛ tondoya ɔsɔnyi etena kasambishayɛ, dia wɛ kamba l’atɔndɔ waki Nzambi lo dihole diakambayɛ olimu, la kalasa, kana dia wɛ shika tanga la ntondo ka tɔsɛngiya t’owandji ayɛ w’olimu wakotshutshuya dia wɛ mbetshaka nsanganya ya l’etshumanelo, ya weke kana ya totshitshɛ? (5) “Tosale Akambo Tshɛ dia Lotombo la Nzambi.” (Osam. 119:37; Heb. 4:13) Ngande wele wɔma wokaso Nzambi tosekɛka dia nɔ wanu lo yoho ya tshambandeko, menda filmɛ kana mbala abuku wɛnyawɔ anto etakataka, kana sala pɛkato kina lo woshɛshɛ? (6) “Totetemale Kɛndakɛnda lo Wɔma wa Jehowa.” Ngande wambokɔtshɔkɔla Jehowa lo woho wetawɔyɛ dia nyuma kande nɔmbɔla lɔsɛnɔ layɛ?​—⁠Osam. 31:19; 33:18; 34:​9, 17; 145:⁠19.

Osambo 171 ndo dɔmbɛlɔ dia ndjihelo.

Lomingu la Ngɔndɔ ka Divwa 30

Osambo 116

Min. 15: Waewoyelo. Ohola apandjudi dia vɔ kimɔ alapɔlɔ w’olimu wa Ngɔndɔ ka Divwa. Tɛkɛta dia ɔtɛ a dui: “Mbalasa ya Diolelo: Ekongelo ka Wokelo Ayɔ Kekɔ lo Tatshu Otsha la Ntondo.” L’ɔkɔngɔ wa nembetshiya awui wele l’odingɔ 4, keketsha anto tshɛ dia vɔ sukɛ ekongelo kɛsɔ l’otema ɔtɔi. Naka etshumanelo kanyu kakɔshi yɛdikɔ ya kimɔka ngɔndɔ tshɛ lofulo lɔmɔtshi la falanga lo kɛnɛ kendana la Falanga ya Wokelo wa Mbalasa ya Diolelo, kete ewoya etshumanelo kɛnɛ kasalema lo dikambo sɔ.

Min. 15: Kakɔna Katshikitanya Periodikɛ Yaso l’Ekanda Ekina? Dako ndo ɔkɛtshanyelo l’ampokami. Lo Ngɔndɔ ka Dikumi tayokahɛ anto Tshoto y’Etangelo la Réveillez-vous! Tɛkɛta dia mɛnya bonde kotshikitanyi periodikɛ yaso l’ekanda ekina: (1) Yɔ tombolaka lokombo la Jehowa. (2) Yɔ keketshaka anto dia monga la mbetawɔ le Yeso. (3) Yɔ mbewoyaka Diolelo diaki Nzambi. (4) Yɔ mɛnyaka dia Bible ekɔ dibuku diele la lowandji laheme tshɛ. (5) Yɔ nembetshiyaka okotshamelo wa prɔfɛsiya ya lo Bible. (6) Yɔ nembetshiyaka dimɛna akambo weta l’andja ɛlɔ kɛnɛ. (7) Yɔ mɛnyaka woho wa ndɔshana l’ekakatanu wa nshi nyɛ. (8) Yɔ tɛkɛtaka akambo wendana la weho w’anto tshɛ. (9) Yɔ hayɔtɔ l’akambo wa pɔlitikɛ. Sala bɛnyɛlɔ dihende dia tomondo, ɛnyɛlɔ tshɛ kɛnya woho wa kamba la dikambo dimɔtshi l’atei w’akambo woshilami dia tatɛ sawola l’anto.

Min. 15: “Tɔshi Diangɔ Diakamba Laso l’Elimu wa Teokrasi la Nɛmɔ.”b Ayoshama oma l’ekumanyi kɛmɔtshi. Dja ndo kɔmatɛrɛ yendana la kɛnɛ kasalema l’etshumanelo kanyu ndo kɛnɛ kakoka etshumanelo sala dia kamba l’ekanda aso dimɛna. Keketsha anto tshɛ dia nɔmbaka paka ekanda wewɔ mɛtɛ l’ohomba. Tatohɛkɛ diɛsɛ diele laso dia kimɔ falanga yaso dia sukɛ olimu wakambema l’andja w’otondo.

Osambo 21 ndo dɔmbɛlɔ dia ndjihelo.

Lomingu la Ngɔndɔ ka Dikumi 7

Osambo 129

Min. 10: Waewoyelo.

Min. 15: Amɛ Akambo wa Mɛtɛ la Kalasa. Kɔnya opandjudi ɔtɔi kana ehende w’ɛlɔngɔlɔngɔ kana w’esekaseka wɔtɔ kalasa ndo wambɛna di’ekɔ ohomba dia mbewɔ monga la diɔtɔnganelo diamboleka l’asekawɔ wa la kalasa wele bu ambetawudi. Ngande wayalɔngɔsɔlawɔ dia ndɔshanya l’ekakatanu ndo la tɔsɛngiya t’oma lo sɛlɛmɔnyi yendana la ngandji k’otamanya ka wodja, la mishiki ndo wɔtwɛlɔ wa l’elui wa la kalasa, tɔkɛnyɔ ta l’ɔkɔngɔ wa kalasa, ndo lɔkɛwɔ la mindo? Tɛkɛta nto dia kɛnɛ kasalawɔ dia sambisha la kalasa.

Min. 20: “Tewɔ dia Nyanga ‘Akambu w’Anyanya’ ”c L’ɔkɔngɔ wa nyu kɛtshanya odingɔ wa 4, dja ndo kɔmatɛrɛ yele lo dikatshi di’okotsha di’Olimu Aso wa Diolelo wa Ngɔndɔ ka Dikumi l’Ɔtɔi 1999 odingɔ wa 30-32. Etena kakɛtshanyanyu odingɔ 5, dja kɔmatɛrɛ yele lo kiombo ya Tshoto y’Etangelo ya Ngɔndɔ ka Dikumi 1, 1994, lɛkɛ 8. L’odingɔ 6, nyadia odingɔ 18 wa lo dikatshi di’okotsha di’Olimu Aso wa Diolelo wa Ngɔndɔ ka Dikumi l’Ɔtɔi 1999. Tokambe l’atɔndɔ ndo la tokanyi tɔsɔ etena kafundɛso angɛnyi kana asekaso ambetawudi kana kawaewoyaso akambo wakete l’esambishelo.

Osambo 105 ndo dɔmbɛlɔ dia ndjihelo.

[Nɔte ka l’ɛse ka dikatshi]