Onde Sho Mbeyaka Shɛngiya Yele la Pudipudi?

¹ Ngandji kokaso Nzambi k’Ekila katɛmɔlaso pombaka totshutshuya dia sɛna wolo lo kɛnɛ kendana la pudipudi, ɔlɔngɔswɛlɔ aso wa demba ndo ɔlɔtɔ aso. Dibuku Notre ministère mbutaka lo lɛkɛ 130-131 ɔnɛ: “Oma l’esambishelo kaso ka lo sɛkɛ, sho mbeyamaka dimɛna le anto tshɛ l’ahole wadjasɛso. Nama luudu laso pudipudi ndo kɔmba, oyadi l’etei kana l’andja, ekɔ tshondo y’esambishelo le asukanyi aso. . . . Waomi ndo ambutshi w’apami pombaka mbidja yimba djekoleko lo kɛnɛ kendana la pudipudi ka luudu ndo ka sɛkɛ, lo mbeya dia luudu, sɛkɛ kana lokombo lele kɔmba mbishaka esambishelo ka dimɛna le anto akina. Ewandji wa nkumbo pombaka mbeya dia, sala ɔsɔku kamɛ ndo nɔmbɔla nkumbo yawɔ l’akambo wa lo nyuma mɛnyaka dia vɔ wekɔ lo nɔmbɔla nkumbo yawɔ lo yoho ya dimɛna. (1 Tim. 3:​4, 12) Wadi vɔ lawɔ wekɔ l’ɔkɛndɛ wa kokɛ diangɔ, djekoleko dia l’etei ka luudu. (Tito 2:​4, 5) Ana wambohokwama dimɛna ndjaetɛka vamɛ pudipudi ndo mbishaka lonya dia nama toshambrɛ tawɔ pudipudi ndo kɔmba. . . .

² “Yoho yalɔngɔsɔlaso divo ndo ɔlɔtɔ aso pombaka mbɔtɔnɛ l’atɔndɔ waki Nzambi. Naka hatokokaki ndɔta lo yoho ya kɔlɔ kana y’epakapaka la ntondo k’ewandji ɛmɔtshi wa weke, kete sho pombaka ndeka mbidja yimba lo dikambo sɔ etena kakambɛso Jehowa olimu, lo tɛkɛta lo dihole diande oyadi l’esambishelo kana lo lɔyɛnga! Yoho yaso ya nɔngɔsɔla divo kana ya ndɔta koka monga la shɛngiya lo kanyi yele l’anto lo kɛnɛ kendana l’ɔtɛmwɛlɔ wa mɛtɛ waki Jehowa. Hatonga mɛtɛ ɔlɔlɔ sho ndɔta yoho ya kɔlɔ kana yɛnya dia hatokanɛ anto akina. (Mika 6:8; 1 Kor. 10:​31-33; 1 Tim. 2:​9, 10) Lâsɔ, etena kasambishaso kana kɔtɔso lo nsanganya dia tɛmɔla Nzambi, oyadi lo nsanganya ya l’etshumanelo, ya totshitshɛ kana ya weke, hatohombe mbohɛ kɛnɛ kata Afundelo lo dikambo dia pudipudi ka lo demba ndo di’ɔlɔtɔ wa la shunganyi dia tombolaka Jehowa nshi tshɛ.

³ “Woho akɔ wamɛ mbahombaso ndɔtaka lam’atshɔso dia tembola Bɛtɛlɛ. . . . Tatohɛke dia lokombo Bɛtɛlɛ nembetshiyaka “Luudu la Nzambi,” diakɔ diele, ɔlɔtɔ aso, yoho yalɔngɔsɔlaso demba, kana lɔkɛwɔ lahomba monga laso etena kembolaso Bɛtɛlɛ, pombaka monga oko lɔnɛ longa laso wonya wɔtɔso lo nsanganya lo Mbalasa ka Diolelo.”