Olimu Walɔmba dia Monga la Ndjakitshakitsha
1 Ɔtɛkɛta wa Nzambi tɔlɔmbaka dia monga ‘l’etema wa memakana, di’aha kaloya kɔlɔ lo kɔlɔ, koko dia tshɔkwana.’ (1 Pet. 3:8, 9) Dako sɔ mendanaka l’olimu w’esambishelo. Lo mɛtɛ, olimu w’Okristo mbeyaka monga oko ohemba wendana la ndjakitshakitsha kaso.
2 Ndjakitshakitsha ekɔ dionga diatokimanyiya dia sho mbikikɛ akambo wahatɔngɛnyangɛnya. Etena katatasambisha, sho pomanaka l’anto wahateye, teya di’amɔtshi l’atei awɔ hawotɔngɛnangɛna awui wawaɛmbɛso. Dia sho tetemala sambisha l’atei w’anto wa ngasɔ paka sho monga la ndjakitshakitsha. Lo mbilo kɛmɔtshi kele l’anto wa wendjudi, akadiyɛso amɔtshi ahende w’ambatshi mboka wakasambishaka lushi tshɛ lo soko la soko ɛnɔnyi ehende w’etondo aha la kânga onto ɔtɔi mbetawɔ dia sawola la wɔ! Koko, vɔ wakatetemala sambisha ndo ɛlɔ kɛnɛ tshumanelo dihende diekɔ lo mbilo kɛsɔ.
3 Kɛnɛ Kahombaso Sala Naka Onto Lasambishaso Bu la Dilɛmiɛlɔ: Ndjakitshakitsha ayotokimanyiya dia mbokoya Yeso naka anto akina wekɔ awui wolo ndo bu la dilɛmiɛlɔ. (1 Pet. 2:21-23) Lo soko dimɔtshi, wakasha kadiyɛso kɛmɔtshi ɛtɛkɛta wa lɔlɛngɔ, ntondo wad’aki kanga lokombo mbakatatɛ oma lâsɔ k’omɛnde lele kokomɛ tsho lo tɛnga kadiyɛso kɛsɔ koko akasha lotshungɔ dia vɔ mbotondja oma lo lokombo. Kadiyɛso kɛsɔ akamɔnamɔna tsho ko nde mbatɛ dia nde ekɔ l’elongamelo ka ndjosawola la wɔ etena kekina. Dikambo sɔ diakambiya atshukanyi asɔ woho ɔnɛ wele lam’akaye kadiyɛso kekina dia ndjowaenda, vɔ wakohokamɛ ndo lam’akandawaelɛ dia ndjɔtɔ lo losanganya lɔmɔtshi lo Mbalasa ka Diolelo, vɔ waketawɔ. Kadiyɛso kakashama sɔnyi ntondo oma le wɔ akâlongola ndo akayotetemalaka la mbasambisha. Sho lawɔ mbeyaka nɛndja weho w’anto asɔ wele la wendjudi lo monga la ‘memakana ndo la dilɛmiɛlɔ di’efula.’—1 Pet. 3:15; Tuk. 25:15.
4 Tewɔ Lotamanya: Ewo ka Bible kele laso hatotshutshuya dia mbɔsa anto akina oko sho mbâleka kana mbaɔnyɔla. (Joa. 7:49) Ɔtɛkɛta wa Nzambi tolakaka di’‘aha tɛnga kânga onto.’ (Tito 3:2) Naka tayonga l’etema wa ndjakitshakitsha oko Yeso, kete tayokeketsha anto akina. (Mat. 11:28, 29) Sawo dia la ndjakitshakitsha tshutshuyaka anto dia nyomoleka ngɛnangɛna losango laso.
5 Eelo, ndjakitshakitsha tokimanyiyaka dia tetemala sambisha lo mbilo kele l’ekakatanu. Dionga sɔ koka kotola anto wele la wendjudi ndo anto akina oya lo losango la Diolelo. Lâdiko dia lâsɔ, dionga sɔ ngɛnyangɛnyaka Jehowa, “[l]atushaka wane wayakitshakitsha ngandji ka mamba.”—1 Pet. 5:5.