Mukanda W’oma Le Olui-walɔmbɔla
TEKƆ l’ɔngɛnɔngɛnɔ heyama dia nyofundɛ mukanda ɔnɛ! Tambonyokaloya losaka lo ngandji la yimba ya ndjahombia yatetemalanyu la mɛnya. Nyayɛna l’Annuaire ɔnɛ dia akambo w’ɔlɔlɔ efula wakasalema l’ɔnɔnyi w’olimu wetshi. Ɔnɔnyi wetshi aki etena kikina kakatetsha wenya efula l’olimu w’esambishelo ndo wa wetshelo dia kotola anto mbala kakɔ ɔtɔi woho wa vɔ sukana oya le Jehowa. Kema sho kondjaka kɛnɛmɔ etena kakambaso kâmɛ la Nzambi kaso ka lotombo ndo Shɛso ka l’olongo?—1 Kor. 3:9.
Oko walongamɛso kamba olimu wele la ntondo, tekɔ l’eshikikelo dia nyayotetemala la ndjela ohetoheto ndo mbetawɔ k’ekambi waki Nzambi, oko wɛnyishawɔ dikambo sɔ lo Bible. Ɛnyɛlɔ, ɔpɔstɔlɔ Paulo akasalaka tshɛ kakandakoke nsala dia ntɔla wahɔ wa Diolelo otsha la ntondo. Mɛnamaka dia lo ɔnɔnyi w’ekomelo wakinde l’Ɛfɛsɔ mbakandafunde mukanda ande wa ntondo otsha le Akristo wa l’etshumanelo ka la Kɔrɛtɔ. Lo kɛnɛ kendana l’ekongelo kakandasale l’etena kakɔ, nde akafundɛ ate: “Dimi layutshikala l’Efeso, edja ndu Pentekosta; ne dia suku dia wuki diambundjihwamela, dia dimi ntsha ulimu, [koko] atunyi efula [w]eko.”—1 Kor. 16:8, 9.
Paulo akayalɔngɔsɔla dia munda lɔkɛndɔ otsha la Makɛdɔniya polo la Kɔrɛtɔ. Koko nde akɛnyi dia etena kɛsɔ mbakinde la diaso dia tshikala yema l’Ɛfɛsɔ dia kamba olimu ɔmɔtshi w’ohomba efula. Paulo akeyaka woho wa tshikitola akambo; nde akɛnyi diaso dia dimɛna diakandakoke ntɔla wahɔ wa Diolelo otsha la ntondo l’Ɛfɛsɔ, ɔnkɔnɛ ndi akatshikitanya ekongelo ka lɔkɛndɔ lakandahombe ntshɔ. Soko dia woke di’olimu diakadihɔ la ntondo kande, ndo Paulo akakambe la diaso sɔ dia kamba olimu akɔ.
Dikambo sɔ diakalɔmbaka elimu efula, esambishelo ka lokumu l’ɔlɔlɔ ndo ekeketshelo k’etshumanelo ka l’Ɛfɛsɔ. Paulo akayotɛka dikumanyi dia l’etshumanelo ka l’osomba ɔsɔ ate: “Dimi kumbuka woma wa nyutela akambu tshe w’ololo, lakanyetshaka l’atei w’antu, ndu lu luudu la luudu, latela asi Juda ndu asi Ngirika dia nkadimula etema le [Nzambi], la dia mbetawo khumesu Jesu Kristu.”—Etsha 20:20, 21.
Anangɛso l’akadiyɛso wa ngandji, nyu lawɔ nyakakambe la waaso waki la ntondo kanyu. L’ɔnɔnyi w’olimu wetshi, lofulo la l’atei atei l’anto 798938 wakayalɔngɔsɔla dia kamba weho ɛmɔtshi w’olimu w’ombatshi mboka. Amɔtshi l’atei anyu wakande nkɛndɔ y’etale dia tokamba oko wa misiɔnɛrɛ. Nyekɔ lo tadianganya lokumu l’ɔlɔlɔ l’ohetoheto tshɛ ndo nyekɔ lo keketsha tshumanelo. Akina l’atei anyu wakeke ɛtɛkɛta ekina dia kimanyiyaka anto watɛkɛta ɛtɛkɛta akɔ lo ngelo yenyu. Akina wakayalɔngɔsɔla dia tosambisha lo bɛtshi dia nkɛtɛ diewɔ watasambisha kana lɛnɛ ele ohomba efula. Amɔtshi wakɛnyi dia soko dia woke di’olimu diambodihɔ l’ahole wa kalasa, w’olimu, kana l’ahole akina wakoka esambishelo tondja etombelo w’ɔlɔlɔ oko lo telefɔnɛ. Akambo weta l’andja mɛnyaka dia, ekambi waki Nzambi, oyadi akɛnda kana dikumanyi, wekɔ lo ndjasha tshɛ dia nyanga ndo dia tana waaso wa mbisha anto ewo k’awui wa mɛtɛ l’ahole tshɛ.
Nyonge l’eshikikelo dia Jehowa mɛnaka ndo ngɛnangɛnaka efula lo menda welo wadjanyu. Bible mbutaka ate: “[Nzambi] kema kolo, dia ndi mbuhela ulimu anyu la ngandji kakanyenya antu lu lukumbu landi.” (Heb. 6:10) Nyotetemale la nyanga waaso wakokanyu tɔla wahɔ w’ɔtɛmwɛlɔ wa pudipudi otsha la ntondo. Amɔtshi l’atei anyu mbeyaka monga l’akoka wa nyomoleka mfudia olimu awɔ. Sho tshɛ koka ndjatshutshuya dia nyomoleka monga l’etombelo w’ɔlɔlɔ l’olimu aso.
Hatotokotsha olimu aso w’esambishelo ko aha la vɔ tɔlɔsha. Nyohɔ dia oma l’ɔkɔngɔ wa Paulo tɛkɛta dia soko dia woke di’olimu diakadihɔ la ntondo kande, nde akafunde ate: ‘Andɔshi wekɔ efula.’ Le Paulo, andɔshi asɔ waki ase Juda l’ase Wedja, amɔtshi wakɔlɔshaka lo sɛkɛ ndo akina wakɔlɔshaka lo woshɛshɛ.—Etsha 19:24-28; 20:18, 19.
Ɛlɔ kɛnɛ tekɔ lo mɛna awui wa woho akɔ wâmɛ. Oko watatasukana otsha l’elanyelo k’andja ɔnɛ wa kɔlɔ, sho nongamɛka di’ɔlɔshɛlɔ wayonyomoleka monga efula. Satana ambodunganɛ la “kele ka wuki,” ndo ekambi waki Jehowa mbalekande mboka nkɛlɛ kakɔ. (Eny. 12:12) Tanyohɛke pondjo dia Satana mbele ‘omboledi w’andja ɔnɛ.’ Yeso akatɛ ambeki ande ate: ‘Otondonga wa l’andja ɔnɛ mbenyu, tshike ase andja ɔnɛ wotolanga asekawɔ. Kele oko wenyu kema wa l’andja ɔnɛ nɛ dia dimi lakanyɔsɔnɛ oma l’andja ɔnɛ, ase andja wekɔ lo nyohetsha.’—Joani 14:30; 15:19.
Tambɔsa yɛdikɔ dia hatokoke mbisha onto okina lotshungɔ la tɛwɔla mbetawɔ kaso otsha le Nzambi kana la mbɔladja olimu aso w’esambishelo. Sho mbeyaka shate anto watɔlɔsha ndo wɔtɔ toseke dikambo diaso wayotetemala la monga. Koko, tekɔ lo tetemala la sambisha lokumu l’ɔlɔlɔ la Diolelo kânga l’atei w’ekakatanu, tele l’eshikikelo dia Yeso ayolanya Satana l’andjelo ande tshɛ l’etena kakashikikɛ Jehowa. Atunyi kɔmbɔladia ɔpɔstɔlɔ Paulo; ndo ɛlɔ kɛnɛ vɔ hawokoke mbɔladia ekambi waki Jehowa. Kânga mbele Satana la nkɛlɛ ndo andja ɔnɛ la lohetsho, nyuma kaki Jehowa kekɔ lo kamba la wolo efula l’atei w’ekambi ande. Tekɔ l’ɔngɛnɔngɛnɔ heyama lam’ɛnaso dia lofulo l’apandjudi wa lokumu l’ɔlɔlɔ lambodɛ lo yɛdikɔ ya 6304645!
Tekɔ lo nyɔlɔmbɛ dia nyu tetemala la kamba la waaso wanyokimanyiya dia nyomoleka ntɔla wahɔ wa Diolelo dia lotombo diaki Jehowa otsha la ntondo. Nyeye dia tekɔ lo ndjakiyanya la ngandji tshɛ dia dikambo dianyu etena kakambaso olimu waki Jehowa Nzambi Nkum’olongo ‘dihɛka lo dihɛka.’—Zef. 3:9.
Anangɛnyu,
Olui-Walɔmbɔla w’Ɛmɛnyi wa Jehowa