Onga la Yimba y’Ɔlɔlɔ nɛ di’Ekomelo Kaya Nsuke
1 Ɔtɛkɛta wa Nzambi mbutaka mbala la mbala ɔnɛ lushi laki Jehowa layoya “uku uvi,” mbut’ate la shashimuya ndo aha la londjo. (1 Tes. 5:2; Mat. 24:43; 2 Pet. 3:10; Eny. 3:3; 16:15) “Okone,” Yeso akate ate: “Dieli la nyu dia ndjalongosola ne dia On’a untu ayuya lu unya wahanyalungamela.” (Mat. 24:44) Ngande wakokaso nsɛnaka lo nyuma lam’ele ekomelo kaya nsuke? Ɔtɛkɛta wa Nzambi tokimanyiyaka ɔnɛ: “Nyuyali la yimba y’ololo.”—1 Pet. 4:7.
2 Monga la yimba y’ɔlɔlɔ nembetshiyaka mɛna akambo oko awaɛna Jehowa. (Ef. 5:17) Dionga sɔ tokimanyiyaka dia sho shamɛ ndjaɔsa oko “angendangenda ndo ambitshanyimi” l’atei w’anto wa lo dikongɛ nɛ di’akambo. (1 Pet. 2:11) Diɔ tokimanyiyaka dia mbeya kɛnɛ kele mɛtɛ ohomba, kɛnɛ kahombaso mbetsha lo dihole dia ntondo ndo woho wa mbɔsa tɛdikɔ t’ɔlɔlɔ.—Fil. 1:10.
3 Yadjɛ Eyango wa lo Nyuma: Ndjadjɛ eyango wa lo nyuma ndo mbakotsha tokimanyiyaka dia monga la yimba y’ɔlɔlɔ. Onde wɛ ekɔ l’eyango wa lo nyuma watayawese nshi nyɛ? Onde wɛ salaka la wolo dia mbadiaka Bible lushi tshɛ, mbɔtɔka lo nsanganya y’Akristo tshɛ, mbadiaka numɛlɔ tshɛ ka Tshoto y’Etangelo ndo ka Réveillez-vous!, kana ndeka sambisha efula? Naka wɛ amboyadjɛ eyango wele amɛna , kete tetemala mbayela l’eshikikelo tshɛ ndo naka wɛ nɔmba Jehowa dia nde tshɔkɔla weolo ayɛ, kete wɛ koka mamba lo menda etombelo wayoyokondja.
4 Ekumanyi kɛmɔtshi akambola wadi l’omi waki wêke esadi wa tshukana lo kɛnɛ kendana l’eyango awɔ wa lo nyuma. Wombola akɔ akawaɛnya dia naka vɔ sala dia monga la lɔsɛnɔ laha kawotake ndo naka vɔ kitshakitsha abasa awɔ, kete vɔ koka kamba olimu w’ombatshi mboka. Vɔ wakayadjɛ oyango wa kamba olimu ɔsɔ. Vɔ wakafute abas’awɔ ndo wakakitshakitsha elimu wakawaɔsɛka wenya ndo wolo awɔ. L’ɔkɔngɔ w’ɔnɔnyi ɔtɔi, vɔ wakakotsha oyango awɔ. Etombelo akɔna wakonge la dikambo sɔ na? Omi mbutaka ate: “Otondoyalaka sho kondjadjɛ eyango ɛsɔ, tshike sho bu la woho wa lɔsɛnɔ lele laso ɛlɔ kɛnɛ. Tekɔ l’ɔngɛnɔngɛnɔ efula. Taya la lɔsɛnɔ la ki ndo la dimɛna efula. Lɔ laya ohomba ndo l’oyango wa mɛtɛ.”
5 Etena keso lo kongɛ lushi laki Jehowa, nyɛsɔ totetemale nsɛnaka lo nyuma lo monga la yimba y’ɔlɔlɔ, lo ndjasha tshɛ dia salaka lolango la Nzambi.—Tito 2:11-13.