Woho Watotshungola Akambo wa Mɛtɛ
1 Lo diaaso dimɔtshi, Yeso akatɛ ase Juda waki la mbetawɔ le nde ate: “Nyu nyayeya akambu wa mete, ku akambu wa mete wayunyutshungula.” (Joa. 8:32) Nde akatɛkɛta dikambo dia lotshungɔ loleki lɔnɛ l’ana w’anto, lotshungɔ lakoka anto tshɛ kondja, oyadi as’ɛngɔnyi kana ase wola, ambewi wa mikanda kana wanɛ waha ambewi wa mikanda. Yeso aketsha akambo wa mɛtɛ wahomba tshungola anto oma lo lɔhɔmbɔ la pɛkato ndo la nyɔi. Oko wakadilembetshiya Yeso: “Untu tshe latutshaka [pɛkato], eko fumbi ka [pɛkato].” (Joa. 8:34) Tekɔ lo kongɛ mɛtɛ l’asolo walomɔlomɔ etena “[k]ayutshungwama [anto tshɛ wele l’okitanyiya] uma lu lohombo la ehondelo, dia mboto lu ndjadjasela ka lutumbu la ana a [Nzambi]”!—Romo 8:21.
2 Akambo wa mɛtɛ wendana la Yeso ndo l’olimu wayondokamba lo ekotshamelo ka sangwelo diaki Nzambi mbayela lotshungɔ lɔsɔ. Akambo wa mɛtɛ asɔ mendanaka nto l’ewo kendana l’olambo wa tshungo wakandakimɔ lo wahɔ aso. (Romo 3:24) Kânga ɛlɔ kɛnɛ, naka tayetawɔ ndo tayokitanyiya akambo wa mɛtɛ wa lo Bible, kete tayotshungɔ lo yɛdikɔ mɔtshi oma lo wɔ̂ma, asui, ndo oma lo weho tshɛ wa ditshelo diakoka tokonya lo wâle.
3 Lotshungɔ oma lo Wɔ̂ma ndo oma l’Oshishelo w’Elongamelo: Sho hatohombe shisha elongamelo lo menda akambo weta l’andja ɔnɛ nɛ dia sho mbeyaka lande na kele akambo wa kɔlɔ wekɔ l’andja ɔnɛ ndo sho mbeyaka dia kem’edja akambo asɔ wayanga minyama oma lanɛ la nkɛtɛ. (Osam. 37:10, 11; 2 Tim. 3:1; Eny. 12:12) Lâdiko dia lâsɔ, akambo wa mɛtɛ totshungolaka oma lo wetshelo wa kashi wendana l’eongelo kele l’anto wambovɔ. Sho mbeyaka di’anto wambovɔka hawokoke totshela kɔlɔ, ndo ɔnɛ aha lo sui dia pondjo mbewɔ ndo sho mbeyaka nto dia Nzambi hadiake anto w’ɔlɔlɔ dia vɔ tshɔ otsha le nde l’olongo.—Und. 9:5; Etsha 24:15.
4 Akambo wa mɛtɛ asɔ wakakeketsha pami kɛmɔtshi nde la wadɛnde etena kakavu ɔnawɔ ɔmɔtshi l’aksida. Nyango akate ate: “Nyɔi kande ambototshika la kandji l’asolo, kandji kele tɔ kayoshila paka lam’ayotowɛna nto lam’ayondolɔ. Koko sho mbeyaka dia kandji kaso kekɔ ka lo tshanda mɔtshi tsho.”
5 Lotshungɔ l’oma lo Ditshelo Diakoka Tokonya lo Wâle: Akambo wa mɛtɛ w’oma lo Bible koka tshikitanya ekanelo ndo lonto laki onto, mbut’ate mbotshungola oma l’ekakatanu ɛmɔtshi wakoka onto mbewɔ. (Ef. 4:20-24) Monga la losembwe ndo l’etete l’olimu koka kimanyiya onto di’aha monga wola wamboleka. (Tuk. 13:4) Monga la ngandji ka ndjahombia tokimanyiyaka dia ndowanya diokanelo diele lam’asaso l’anto akina. (Kol. 3:13, 14) Kitanyiya lowandji l’Okristo kitshakitshaka ekakatanu wa l’atei wa nkumbo. (Ef. 5:33–6:1) Mbewɔ wodjwelo wa wanu, awui wa mindo wa dieyanelo, ɔnwɛlɔ wa fɔka, ndo omposaposa wa nɔnɔ dia wolo tokimanyiyaka dia monga l’alemba w’amɛna.—Tuk. 7:21-23; 23:29, 30; 2 Kor. 7:1.
6 Ɔlɔngɔlɔngɔ ɔmɔtshi wakayasha l’ɔnwɛlɔ wa nɔnɔ dia wolo l’edja k’ɛnɔnyi divwa w’etondo, aki la pâ dia tshika etshelo kɛsɔ. Lushi lɔmɔtshi nde akahomana la kadiyɛso kɛmɔtshi kakatasambishaka lo toshinga. Nde aketawɔ mbɔsa periodikɛ, ndo kadiyɛso akawotɛ dia nde ayoya dia ndjowenda lakande. Vɔ wakatatɛ mbeka Bible. Oma l’ɔkɔngɔ wa ngɔndɔ hiende, pami kɛsɔ akatshike nɔnɔ dia wolo tshɛ, ndo oma l’ɔkɔngɔ wa ngɔndɔ enanɛi ya wekelo wa Bible, nde akabatizama. Ɔnango l’okilande ɔmɔtshi la womoto wakɔshi yɛdikɔ ya tatɛ mbeka Bible lam’akawɛnyi dia nde ambotshika nɔnɔ dia wolo tshɛ.
7 Tokimanyiya Anto Akina dia Vɔ Kondja Lotshungɔ: Wanɛ wamonga edja efula fumbe ya wetshelo wa kashi mbeyaka monga l’okakatanu dia shihodia lotshungɔ lasha Ɔtɛkɛta wa Nzambi. Dia minanda etema awɔ, ombetsha pombaka monga l’etete ndo ndjalɔngɔsɔla dimɛna. (2 Tim. 4:2, 5) Ɔnɛ kema etena ka kɔmɔla anya l’olimu aso wa ‘sambisha awui washa lotshungɔ le anto wambotshungama.’ (Is. 61:1) Lotshungɔ l’Okristo lekɔ oshinga wolo efula. Naka onto ambolikondja, kete nde ambokondja lɔsɛnɔ la pondjo.—1 Tim. 4:16.