Tetawɔ dia Jehowa tosha lotshungɔ la mɛtɛ
“Ka washo lo ɛlɛmbɛ wa kokele wakimanyiya anto dia vɔ ntshungɔ.”—JAK. 1:25, NW.
ONDE WƐ KOKA NEMBETSHIYA?
Ɛlɛmbɛ akɔna watokimanyiya dia monga la lotshungɔ la mɛtɛ, ndo waa na wakondja wahɔ oma lɔkɔ?
Ahombaso nsala dia sho nkondja lotshungɔ la mɛtɛ?
Lotshungɔ lakɔka layokondja wanɛ watetemala nkitanyiya Jehowa?
1, 2. a) Kakɔna kɛnya di’anto bu la lotshungɔ la mɛtɛ ɛlɔ kɛnɛ, ndo lande na? b) Naa lotshungɔ lakongɛ ekambi waki Jehowa?
TEKƆ lo nsɛna l’andja wambolola tɔ l’anto wele la lokaki, wayasha l’akambo wa ngala ndo wɔnyɔla ɛlɛmbɛ. (2 Tim. 3:1-5) Dia ndɔshana l’awui asɔ, ewandji wa pɔlitikɛ wekɔ lo mbidja ɛlɛmbɛ efula, wekɔ lo mbisha apulushi kɛnɛ kahombama ndo wekɔ lo mbidja waa kamɛra l’ahole amɔtshi dia filmɛka kɛnɛ keeta. Lo wedja ɛmɔtshi, anto efula salaka la wolo dia ndjakokɛ lo monga la dihomɔ diele oko alarme lo mvudu yawɔ dia mbewoyaka wâle wakoka mbakomɛ, kana mbidja nkuke ndo adidishi wa mbolo lo mvudu yawɔ ndo mpele diele la kura. Anto efula mbewɔka mɛngɔla l’otsho kana ntshika anawɔ nkɛnya l’andja wa lokombo oyadi la yanyi kana l’otsho. Mbokɛmaka mɛtɛ di’anto efula bu la lotshungɔ la mɛtɛ ɛlɔ kɛnɛ.
2 L’ekambɔ k’Ɛdɛna, Satana akafune ɔnɛ Adama l’Eva wayonga la lotshungɔ la mɛtɛ naka vɔ tɔmbɔkwɛ Jehowa. Ande kashi ka kɔlɔ efula ndo ka woke kakate Satana lee! Lo mɛtɛ, etena kataleke anto mpindola ɛlɛmbɛ waki Nzambi wendana la lɔkɛwɔ, mbatawaleke mɛna shɔkɔ, ndo dui sɔ ndjongaka la shɛngiya kânga le Ɛmɛnyi wa Jehowa. Koko, tekɔ l’elongamelo ɔnɛ shɛngiya ya kɔlɔ ya pɛkato yanga komɛ ndo tayanga monga la ‘lotshungɔ la lotombo l’ana wa Nzambi.’ (Romo 8:21) Ngasɔ mbediɔ nɛ dia Jehowa ekɔ lo nkimanyiya ekambi ande dia vɔ ndjokondja lotshungɔ la mɛtɛ lɔsɔ. Lo ngande?
3. Ɛlɛmbɛ wa ngande wakasha Jehowa ekambi ande, ndo ambola akɔna wayangaso nsɛdingola lo sawo nɛ?
3 Dia nkimanyiya ekambi ande, Jehowa akasambiya Jakɔba dia nde mfunda ɔnɛ: “Onto laka washo l’ɛlɛmbɛ wa kokele wakimanyiya anto dia vɔ ntshungɔ ndo latetemala lɔkɔ, nde aya onto lakitanyiya ɔtɛkɛta, koko aha ɔnɛ loka ko mbohɛ ndo nde ayonga l’ɔngɛnɔngɛnɔ lo nsala dui sɔ.” (Jak. 1:25, NW) Dyookaneelo dy’Oyooyo kadimolaka etelo kɛnɛ ɔnɛ: “Dui dya kokele dyatosha locungɔ.” Lo mɛtɛ, anto wadjɛwɔ ɛlɛmbɛ ndjaɔsaka dia wɛkɔ lo shasa, koko aha oko wanɛ wele la lotshungɔ. Ko lâsɔ, ‘ɛlɛmbɛ wa kokele wakimanyiya anto dia vɔ ntshungɔ’ kɛdikɛdi na, ndo ngande watotshungolawɔ?
ƐLƐMBƐ WATOTSHUNGOLA
4. ‘Ɛlɛmbɛ wa kokele wakimanyiya anto dia vɔ ntshungɔ’ kɛdikɛdi na, ndo waa na wakondja wahɔ oma lɔkɔ?
4 ‘Ɛlɛmbɛ wa kokele wakimanyiya anto dia vɔ ntshungɔ’ kema Ɛlɛmbɛ wa Mɔsɛ waki l’oyango wa mɛnya ase Isariyɛlɛ ɔnɛ vɔ waki atshi wa pɛkato ndo wakayokotshamaka le Kristo. (Mat. 5:17; Ngal. 3:19) Ko ɛlɛmbɛ akɔna wakatɛkɛta Jakɔba lanɛ? Vɔ wekɔ “elembe wa Kristu,” welamɛ nto ɔnɛ “[e]lembe a mbetawo” ndo ‘ɛlɛmbɛ w’anto wele la lotshungɔ.’ (Ngal. 6:2; Romo 3:27; Jak. 2:12) Ɔnkɔnɛ, ‘ɛlɛmbɛ wa kokele’ kɛdikɛdi oseka dui tshɛ diatɔlɔmba Jehowa dia sho nsala. Oyadi Akristo w’akitami kana “ekoko ekina,” vɔ tshɛ kondjaka wahɔ oma l’ɛlɛmbɛ ɛsɔ.—Joa. 10:16.
5. Lande na kele ɛlɛmbɛ wakimanyiya anto dia vɔ ntshungɔ bu wotsho?
5 Otshikitanyi l’ɛlɛmbɛ wa lo wedja efula, ‘ɛlɛmbɛ wa kokele’ watɛkɛtaso lanɛ bu wolo kana wotsho nɛ dia vɔ mpikama lo atɔndɔ wa lo Bible. (1 Joa. 5:3) Ekɔ ngasɔ nɛ dia Yeso akate ate: “Lokoho lami leko ololo, la ushiko ami weko usadi.” (Mat. 11:29, 30) Ndo nto, ‘ɛlɛmbɛ wa kokele’ bu l’ohomba wa listɛ l’alanya nɛ dia vɔ mpikama lo ngandji ndo wekɔ lo timba ndo l’etema w’anto, koko aha lo pase di’ave.—Adia Heberu 8:6, 10.
WOHO WATOTSHUNGOLA ‘ƐLƐMBƐ WA KOKELE’
6, 7. Oyango akɔna wele l’ɛlɛmbɛ ndo wadjango wakadjɛ Jehowa ekambi ande, ndo kakɔna katokimanyiya ɛlɛmbɛ akɔ dia sho nsala?
6 Ɛlɛmbɛ wakadjɛ Jehowa ekambi ande wekɔ dia wahɔ ndo dia ekokelo kawɔ. Ɛnyɛlɔ, ɛlɛmbɛ wele lo demba diaso wele l’oyango wa dikokɛ. Anto hawoyakiyanya lo mbuta ɔnɛ ɛlɛmbɛ ɛsɔ wekɔ wotsho, koko vɔ mbâkitanyiyaka nɛ dia vɔ mbeyaka dia kɛnɛ kâlɔmba demba diawɔ ekɔ dia wahɔ awɔ. Woho akɔ wâmɛ mbele, ɛlɛmbɛ ndo wadjango waki Jehowa wekaso oma ‘l’ɛlɛmbɛ wa kokele’ waki Yeso wekɔ dia wahɔ aso.
7 Lâdiko dia tokokɛ, ɛlɛmbɛ ɛsɔ tokimanyiyaka nto dia sho nkotsha nsaki yaso y’amɛna aha la sho ndjasalɛ kɔlɔ ndo dui sɔ tokimanyiyaka dia sho nɛmiya lotshungɔ lele l’anto akina. Ɔnkɔnɛ, dia sho monga la lotshungɔ la mɛtɛ, mbuta ate dia sho monga l’akoka wa nsala kɛnɛ kele ɔlɔlɔ, sho la dia monga la tokanyi t’amɛna tɔtɔnɛ la lonto ndo l’atɔndɔ waki Jehowa. L’ɛtɛkɛta ekina, sho pombaka mbeka dia nanga kɛnɛ kalanga Jehowa ndo mpetsha kɛnɛ kahetshande nɛ dia ɛlɛmbɛ washa lotshungɔ koka tokimanyiya dia sho nsala dui sɔ.—Am. 5:15.
8, 9. Wahɔ akɔna wakondja wanɛ wakitanyiya ɛlɛmbɛ waki Nzambi washa lotshungɔ? Sha ɛnyɛlɔ.
8 Oko weso anto wele kema kokele, sho mongaka l’okakatanu dia mbahemɛ nsaki ya kɔlɔ. Koko naka sho nkitanyiya ɛlɛmbɛ washa lotshungɔ, kete tayotshungɔ oma l’akambo wa kɔlɔ ntatɛ oma ko kakianɛ. Tɔshi ɛnyɛlɔ kaki Jay. Kânga mbakandatatɛ mbeka Bible, nde kotshika mbekelo ka nɔka mfɔka ndo dinɔnɔ dikina dia wolo. Koko, lam’akandayeya dia mbekelo kɛsɔ nyangiyaka Nzambi, nde akɔshi yɛdikɔ ya kitshika. Onde nde akahombe ntetemala ndjela nsaki yande ya demba, ko kana nde akahombe nkitanyiya Jehowa? Nde akɔshi yɛdikɔ ya mbokambɛ kânga mbakinde l’okakatanu dia ntshika mbekelo kɛsɔ. Ngande wakandayoyaoka l’ɔkɔngɔ wa nde ntshika mbekelo kɛsɔ? Nde akayota l’ɔkɔngɔ ate: “Laya l’ɔngɛnɔngɛnɔ w’efula ndo loyaoka dia lambotshungɔ.”
9 Lo ndjela kɛnɛ kakôkomɛ, Jay akɛnyi dia lotshungɔ lasha andja ɔnɛ tshutshuyaka anto dia vɔ ndjasha lo “akambu wa dimba,” wâkonya ɛhɔmbɔ wa pɛkato, koko lotshungɔ lasha Jehowa ekambi ande mbatshutshuyaka dia vɔ monga la “tukanyi ta nyuma” tâtshungola ndo tâkonya lo ‘lɔsɛnɔ ndo lo wɔladi.’ (Romo 8:5, 6) Ko oma lende akakondja Jay wolo wa mbahemɛ nsaki yande ya kɔlɔ? Oma le Nzambi. Nde mbutaka ate: “Lakekaka Bible, lakalɔmbaka dia nkondja nyuma k’ekila ndo lakayangaka alako oma le Akristo wambotshunda lo nyuma mbala la mbala.” Awui asɔ koka tokimanyiya ndo sho lawɔ dia ntshungɔ. Lo woho akɔna?
TOKE WASHO L’ƆTƐKƐTA WA NZAMBI
10. “Mbika washo” l’ɛlɛmbɛ waki Nzambi kɛdikɛdi na?
10 Jakoba 1:25 mbutaka ɔnɛ: ‘Onto laka washo l’ɛlɛmbɛ wa kokele wakimanyiya anto dia vɔ ntshungɔ ndo latetemala lɔkɔ, ayonga l’ɔngɛnɔngɛnɔ lo nsala dui sɔ.’ Tshɛkɛta ya lo Grɛkɛ yokadimɔmi ɔnɛ “mbika washo” nembetshiyaka “menda ɛngɔ kɛmɔtshi tɛɛ dia kiɛna dimɛna,” ndo dui sɔ nɔmbaka dia mbidja welo. Ɔnkɔnɛ, naka sho nangaka di’ɛlɛmbɛ waki Nzambi washa lotshungɔ monga la shɛngiya lo timba ndo l’etema aso, kete sho pombaka salaka wekelo wa lotshimola wa Bible, nɔmbaka efula ndo kanaka yimba la kɛnɛ kekaso.—1 Tim. 4:15.
11, 12. a) Ngande wakatɔtɔmiya Yeso ohomba wa mbɔtɔnganyiya lɔsɛnɔ laso l’akambo wa mɛtɛ? b) Oko wadiɛnya ɛnyɛlɔ kele l’odingɔ kengo, wâle akɔna wahomba djekoleko ɛlɔngɔlɔngɔ ndo esekaseka mbewɔ?
11 Ndo nto, sho pombaka ‘ntetemala’ nkitanyiya kɛnɛ kele l’Ɔtɛkɛta wa Nzambi, mbuta ate mbɔtɔnganyiya nsɛnɔ yaso l’akambo wa mɛtɛ wekaso. Yeso akɛnya ohomba wa dui sɔ etena kakandatɛ anto amɔtshi wakawetawɔ ate: “Naka nyu nyayutshikala lu diui diami, kete ambeki ami mete mbenyu. Nyu nyayeya akambu wa mete, ku akambu wa mete wayunyutshungula.” (Joa. 8:31, 32) Dibuku dimɔtshi mbutaka ɔnɛ ‘mbeya’ yatɛkɛtama lanɛ nembetshiyaka nto “monga l’ɔngɛnɔngɛnɔ l’ɔtɛ wa kɛnɛ ‘kambeya’ onto nɛ dia tɔ kekɔ la nɛmɔ kana ohomba efula le nde.” Ɔnkɔnɛ, sho koka mbuta ɔnɛ sho ‘mbeyaka’ akambo wa mɛtɛ paka naka tekɔ lo nkamba la wɔ lo nsɛnɔ yaso. Lo nsala ngasɔ mbakokaso mbuta ɔnɛ “diui dia [Nzambi]” diekɔ lo nkamba olimu le so ndo diekɔ lo ntshikitanya lonto laso dia sho ndeka mbokoya Shɛso lele l’olongo.—1 Tes. 2:13.
12 Onto l’onto ayambola ate: ‘Onde dimi mbeyaka akambo wa mɛtɛ ndo mbakitanyiyaka? Ko kana lâkatetemala nkombola lotshungɔ lasha andja ɔnɛ?’ Lo mbohɔ kɛnɛ kakôkomɛ etena kakinde eke osekaseka, kadiyɛso kɛmɔtshi kakodiama oma le ambutshi w’Akristo akate ate: “Nyeye di’etena kodiama onto lo akambo wa mɛtɛ, Jehowa ôkongaka nshi tshɛ woho wende. Koko lo wedi ami, lakadjaka sawosawo dia mbêya. Paka kɛnɛ kakahetshaka Jehowa mbakamasalaka. Dimi kombetawɔ pondjo dia kɛnɛ kakamasalaka koka mbonyangiya. No dimi kombɔlɔmbaka etena kakimi la ntondo k’ekakatanu. Lakayaɛkɛka lo yimba yami hita ndo lamboshihodia kakianɛ dia laki enginya.” Diɛsɛ ko kadiyɛso kɛsɔ akayɛna dia kɛnɛ kakandasalaka komonga dimɛna ndo nde akayosalaka etshikitanu ɛmɔtshi. Kakianɛ, nde okamba oko ombatshi mboka wa pondjo.
NYUMA K’EKILA KOKA TOKIMANYIYA DIA SHO NTSHUNGƆ
13. Ngande watokimanyiya nyuma k’ekila dia sho ntshungɔ?
13 Lo 2 Koreto 3:17, sho mbadiaka ɔnɛ: ‘Wanɛ wele la nyuma k’ekila kaki Jehowa wekɔ la lotshungɔ.’ Ngande watokimanyiya nyuma k’ekila dia sho monga la lotshungɔ? Yoho mɔtshi ele tɔ tokimanyiyaka dia sho monga la waonga watosha lotshungɔ la mɛtɛ wele oko: ‘Ngandji, ɔngɛnɔngɛnɔ, wɔladi, solo dia lotutsha, lɔsɛngɔ, ɔlɔlɔ, mbetawɔ, memakana ndo ndjakimɛ.’ (Ngal. 5:22, 23) Waonga asɔ, djekoleko ngandji, tokimanyiyaka dia sho monga la lotshungɔ la mɛtɛ lele bu l’anto wa l’andja ɔnɛ. Koko kɛnɛ katâmbiya ele, l’ɔkɔngɔ w’ɔpɔstɔlɔ Paulo nshila elowa wa nyuma, nde akakotsha ate: ‘Ndoko ɔlɛmbɛ walɔshana l’akambo asɔ.’ Kakɔna mɛtɛ kakandalange mbuta? Nde akalange mbuta ɔnɛ elowa wa nyuma kaki Nzambi hawokelekami lo ɛlɛmbɛ ɛmɔtshi wakoka nshimba onto dia nde mbakɛnɛmɔla. (Ngal. 5:18) Jehowa nangaka dia sho ntetemala nkɛnɛmɔla waonga wele oko waki Kristo asɔ lo yɛdikɔ y’efula ndo pondjo pondjo.
14. Lande na kataso ɔnɛ wanɛ walɔmbwama la yimba y’andja ɔnɛ wekɔ lo lɔhɔmbɔ?
14 Wanɛ walɔmbwama la yimba y’andja ndo wayasha dia nkotsha nsaki yawɔ ya kɔlɔ ya demba mbeyaka mfɔnya dia vɔ wekɔ la lotshungɔ. (Adia 2 Petero 2:18, 19.) Ko tete le vɔ wekɔ lo ndjakesa. Ewandji wa pɔlitikɛ mbidjaka dɛmbɛlɛmbɛ l’oyango wa mbashimba diaha vɔ nkotsha nsaki yawɔ ya kɔlɔ. Diakɔ diakafunde ɔpɔstɔlɔ Paulo ate: “Elembe kumbidjama dikambu di’untu ololo, keli wakadjama dikambu di’andjaki w’elembe la akanga w’uhedia.” (1 Tim. 1:9, 10) Ndo nto, vɔ wekɔ ɛhɔmbɔ wa pɛkato lo woho wayashawɔ ‘lo etsha wa demba’ wayowakonya lo nyɔi. (Ef. 2:1-3) Lo yoho mɔtshi, anto asɔ fɔnaka la tɔ̂nɔna tatɔ̂tɔ yema yema lo dɔnga di’owe, aha la mbeya ɔnɛ mposa katɔ k’owe kayotikonya lo nyɔi.—Jak. 1:14, 15.
NSANGANYA TOKIMANYIYAKA DIA SHO NTSHUNGƆ
15, 16. Lande na kele nsanganya yaso yekɔ ohomba, ndo lotshungɔ lakɔna lele la so?
15 Etena kayaso lo nsanganya y’Akristo, sho bu oko anto waya dia ndjohomana la djui mɔtshi y’anto wokana la so. Sho taya ase etshumanelo k’Akristo nɛ dia Jehowa akatokotola. (Joa. 6:44) Kakɔna kakôtshutshuya dia nde nsala dui sɔ? Onde l’ɔtɛ wakiso anto w’ɔlɔlɔ wawoka wɔma? Ndoko, aha ngasɔ. Ko kakɔna mɛtɛ kakɛnyi Nzambi le so? Nde akɛnyi dia sho taki la ngandji ndo la nsaki ka nkitanyiya ɛlɛmbɛ ndo ɛlɔmbwɛlɔ kande. Etena kɛnɛ kayaso l’atei w’etshumanelo kande, Jehowa ekɔ lo tosukɛ lo tosha mbo ya ndɛ ya lo nyuma, ambototshungola oma l’awui wa kashi, oma lo dikanyiyakanyiya di’ɛtɛmwɛlɔ wa kashi ndo ambotêtsha dia sho monga la waonga w’amɛna wele oko wa Kristo. (Adia Efeso 4:22-24.) Etombelo wambonga la dui sɔ ele, taya la diɛsɛ dia monga l’atei w’ekambi ande wa l’andja w’otondo ‘wele la lotshungɔ.’—Jak. 2:12.
16 Tokane yimba la dui nɛ: Etena keso kâmɛ l’anto woka Jehowa ngandji la etema awɔ tshɛ, onde sho mbokaka wɔma? Etena kasawolaso lo Mbalasa ka Diolelo, onde sho mbɛwɛwaka diangɔ diaso wonya tshɛ la kanyi y’ɔnɛ wayotovadiɔ? Ndoko kânga yema tshitshɛ. Sho ndjaokaka dia tekɔ lo ekokelo ndo lo lotshungɔ. Ko onde, woho wayaokaso l’atei awɔ ɔsɔ mbayaokaso ndo lale anto akina wele bu Ɛmɛnyi wa Jehowa? Ondo bu. Koko, teye dia lotshungɔ lele la so kakianɛ l’atei w’ekambi waki Nzambi ekɔ tsho dɛtɔ dia kɛnɛ kayoyosalema l’andja w’oyoyo.
‘LOTSHUNGƆ LA LOTOMBO L’ANA WA NZAMBI’
17. Ngande wendana otshungwelo w’anto la ‘woshwelo w’ana wa Nzambi’ na?
17 Etena kakandatɛkɛta lo kɛnɛ kendana la lotshungɔ layosha Jehowa ekambi ande wa la nkɛtɛ, Paulo akafunde ate: ‘Nɛ dia ditongami diekɔ lo nongamɛ l’asolo walomɔlomɔ woshwelo wa lotombo l’ana wa Nzambi.’ Oma lâsɔ, nde akakotsha ate: ‘Ditongami diɔ lawɔ diayotshungɔ oma lo lɔhɔmbɔ l’ɛhɔndɛlɔ ndo diayonga la lotshungɔ la lotombo l’ana wa Nzambi.’ (Romo 8:19-21) Tshɛkɛta ‘ditongami’ yele lo divɛsa nɛ nembetshiyaka anto wele l’elongamelo ka ndjɔsɛna lanɛ la nkɛtɛ ndo wayoyokondja wahɔ oma lo ‘woshwelo’ w’ana wa Nzambi, mbuta ate Akristo w’akitami. Woshwelo ɔsɔ wayotatɛ etena kayokimanyiya Akristo w’akitami Yeso dia ndanya anto tshɛ wa kɔlɔ ko mbisha “ului a wuki w’antu” lɔsɛnɔ la pondjo.—Eny. 7:9, 14.
18. Lotshungɔ lakɔna kayokondja anto w’okitanyiya, ndo lotshungɔ lakɔna kayonga lawɔ l’ekomelo?
18 Lo mɛtɛ, anto wayokondja lotshungɔ la mɛtɛ, mbuta ate vɔ wayotshungɔ oma lo tɔsɛngiya taki Satana la ɛdiɛngɛ ande. (Eny. 20:1-3) Ɔsɔ mɛtɛ ayonga etshungwelo ka woke. L’ɔkɔngɔ wa lâsɔ, oma lo tshimbo y’olambo wa tshungo waki Yeso, anto 144000 wayotshungola anto tshɛ polo lam’ayowokoma kokele. (Eny. 5:9, 10) L’ɔkɔngɔ wa vɔ mɛnya kɔlamelo yawɔ kânga l’atei w’ehemba, anto wayonga la lotshungɔ la kokele lakalɔngɔsɔla Jehowa dikambo diawɔ oma k’etatelo, mbuta ate ‘lotshungɔ la lotombo l’ana wa Nzambi.’ Tohokanyiya yema! Sho hatotonga nto l’okakatanu dia nsala kɛnɛ kalanga Jehowa nɛ dia tayokoma kokele ndo tayonga l’akoka wa mbokoya waonga ande lo yoho ya kokele.
19. Akambo akɔna wahombaso ntetemala nsala naka sho nangaka ntshikala lo mboka katɔla otsha lo lotshungɔ la mɛtɛ?
19 Onde sho nangaka ndjonga la ‘lotshungɔ la lotombo l’ana wa Nzambi’? Naka eelo, kete tetawɔ dia nɔmbwamaka ‘l’ɛlɛmbɛ wa kokele wakimanyiya anto dia vɔ ntshungɔ,’ tekake Bible l’etete, tɔsɛnake lo yoho yɔtɔnɛ l’akambo wa mɛtɛ, tɔlɔmbake Jehowa nyuma kande ndo tosalake la wolo dia nkondja wahɔ oma lo mbo ya ndɛ ya lo nyuma yatosha Jehowa oma lo tshimbo y’etshumanelo. Aha sho mbetawɔ dia Satana tokesa woho wakandakese Eva dia sho mfɔnya ɔnɛ ɛlɛmbɛ waki Nzambi wekɔ lo todja lo shasa. Ekɔ mɛtɛ dia Satana ekɔ la lokeso l’efula. Koko oko wayotodiɛna lo sawo diayela, hatohombe mbetawɔ dia ‘nde tokesa nɛ dia sho mbeyaka toho ta mayɛlɛ takamba la nde dia tokesa.’—2 Kor. 2:11.
[Esato wa lo lɛkɛ 9]
Onde dimi lâkatetemala nkombola lotshungɔ lasha andja ɔnɛ?
[Esato wa lo lɛkɛ 9]
Onde dimi sɛnaka lo yoho yɔtɔnɛ l’akambo wa mɛtɛ?