Tshapita ya Tanu
Lotshungɔ Lele l’Atɛmɔdi wa Jehowa
1, 2. (a) Woho akɔna wa lotshungɔ lakasha Nzambi pami la womoto la ntondo? (b) Shila ɛlɛmbɛ ɛmɔtshi wakalɔmbɔlaka olimu waki Adama l’Eva.
ETENA kakatonge Jehowa pami la womoto la ntondo, vɔ waki la lotshungɔ la woke efula oleki lɔnɛ lele l’anto ɛlɔ kɛnɛ. Paradiso, mbut’ate Ekambɔ k’Ɛdɛna k’olangala efula mbaki edjaselo kawɔ. Ndoko hemɔ kakakoke fukutanya ɔngɛnɔngɛnɔ wa lɔsɛnɔ lawɔ, nɛ dia vɔ waki la timba ndo l’alemba wa kokele. Vɔ komonga l’elongamelo ka mvɔ, oko wakayongaka anto l’elongamelo kɛsɔ l’ɔkɔngɔ. Ndo nto, vɔ komonga oko waa rɔbo koko waki la woshasha wa diambo efula wa sala kɛnɛ kalangawɔ, mbut’ate dikoka dia mbɔsa tɛdikɔ tawɔ hita. Koko, dia vɔ tetemala monga la lotshungɔ la ngasɔ, vɔ wakahombe kitanyiya ɛlɛmbɛ waki Nzambi.
2 Tɔshi ɛnyɛlɔ k’ɛlɛmbɛ wakadje Nzambi lo kɛnɛ kendana la diangɔ diakatongama. Lo mɛtɛ, ondo ɛlɛmbɛ ɛsɔ komonga ɛlɛmbɛ wakafundama lofundama, koko Adama l’Eva wakatongama woho wele takawakoke monga l’okakatanu dia mbakitanyiya. Ndjala akâsokoyaka dia vɔ ndɛ; mposa k’ashi akatomaka dia vɔ nnɔ ndo wodjelo wa wonya akatomaka dia vɔ ndala. Jehowa akawasha nto olimu ɔmɔtshi. Olimu ɔsɔ waki mɛtɛ ɔlɛmbɛ nɛ dia vɔ wakahombe nshikikɛ kɛnɛ kakawahombaka sala. Vɔ wakahombe mbota ana, monga ewandji wa weho wa diangɔ efula diele la lɔsɛnɔ la nkɛtɛ, ndo nanula elelo wa Paradiso edja ndo tɔ kokanɛ lo nkɛtɛ k’otondo. (Etatelu 1:28; 2:15) Ɔsɔ aki mɛtɛ ɔlɛmbɛ wa dimɛna efula ndo waki la wahɔ le wɔ! Ɔlɛmbɛ ɔsɔ akawasha olimu w’ɔngɛnɔngɛnɔ efula ndo akawasha diaaso dia kamba l’akoka awɔ lo yɛdikɔ yoleki tshɛ ndo lo yoho ya dimɛna efula. Ndo nto, vɔ waki la lotshungɔ la mbɔsa tɛdikɔ tendana la woho wakawakoke kotsha olimu awɔ. Kakɔna kakawakoke nɔmba nto na?
3. Ngande wakakoke Adama l’Eva mbeka dia kamba la lotshungɔ lawɔ la lomba dia mbɔsa tɛdikɔ?
3 Lo mɛtɛ, kânga mbakawasha Adama l’Eva diɛsɛ dia mbɔsa tɛdikɔ, dui sɔ konembetshiya dia yɛdikɔ tshɛ yakawakoke mbɔsa yakahombe monga l’etombelo w’ɔlɔlɔ. Vɔ wakahombe kamba la lotshungɔ lawɔ la mbɔsa tɛdikɔ lo ndjela elelo wadja ɛlɛmbɛ ndo atɔndɔ waki Nzambi. Ngande wakawakoke mbeya ɛlɛmbɛ l’atɔndɔ asɔ na? Ele lo mpokamɛ Otungi awɔ ndo lo sɛdingola elimu ande. Nzambi akasha Adama l’Eva yimba yakahombamaka dia vɔ mbeya kitanyiya kɛnɛ kakawekaka. Lam’ele wakatongama anto wa kokele, nsaki kawɔ ka lôtɔ kakahombe mbatshutshuya dia kɛnɛmɔla waonga waki Nzambi l’etena tshɛ kakawɔsaka tɛdikɔ. Otondonga vɔ waki mɛtɛ la lowando lo kɛnɛ kakâsalɛ Nzambi ndo otowolanga mbɔngɛnyangɛnya, tshike vɔ wakahombe menda ɔlɔlɔ dia kotsha dikambo sɔ.—Etatelu 1:26, 27; Joani 8:29.
4. (a) Onde ɔlɛmbɛ wakawasha Adama l’Eva waha ndɛ olowa w’oma l’otamba ɔmɔtshi kombashaka lotshungɔ? (b) Lande na kele ɔlɛmbɛ ɔsɔ komonga kɔlɔ?
4 Nzambi aki la shadiya dia mbâhemba dia menda omamemelo awɔ otsha le nde oko wakinde Onto lakawasha lɔsɛnɔ ndo dia menda kana vɔ wayonga suke dia nɛnya elelo wakandawadjɛ. Jehowa akadjɛ Adama ɔlɛmbɛ ɔnɛ: “Olekaki elua w’etamba tshe wa l’ekambo uku alangaye. Keli, tolekaki elua w’uma l’utamba wa ewu k’akambu w’ololo ndu k’akambu wa kolo, ne dia lushi layuyole, we ayuvo.” (Etatelu 2:16, 17) L’ɔkɔngɔ w’etongelo k’Eva, wakawewoya nde lawɔ ɔlɛmbɛ ɔsɔ. (Etatelu 3:2, 3) Onde ɔlɛmbɛ ɔsɔ kombashaka lotshungɔ? Kema. Vɔ takiwɔ la shadiya ya ndɛ olowa w’oma l’otamba ɔtɔi ɔsɔ nɛ dia waki la weho ekina tshɛ wa mbo ya ndɛ y’ɔlɔlɔ. (Etatelu 2:8, 9) Ɔlɛmbɛ ɔsɔ komonga kɔlɔ nɛ dia vɔ wakahombaka mbeya dia Nzambi mbele kanga nkɛtɛ lam’ele nde mbakayitonge. Ɔnkɔnɛ, nde aki la lotshungɔ la mbidja ɛlɛmbɛ wɔtɔnɛ la sangwelo diande ndo wele la wahɔ le anto.—Osambu 24:1, 10.
5. (a) Ngande wakashisha Adama l’Eva lotshungɔ la dimɛna efula laki lawɔ? (b) Kakɔna kakayɔhɛnaka lotshungɔ laki la Adama nde l’Eva, ndo shɛngiya yakɔna yele la dikambo sɔ le so?
5 Ko kakɔna kakatombe na? Oma lo lokaki lande, ondjelo ɔmɔtshi akakambe la lotshungɔ lande lo yoho ya kɔlɔ ndo akayokomaka Satana, kitshimudi ate “Otunyi.” Nde akakese Eva lo mbêtawoya dikambo dimɔtshi diahɔtɔnɛ la lolango laki Nzambi. (Etatelu 3:4, 5) Adama akete l’Eva wedi ko akasekola ɔlɛmbɛ waki Nzambi. Lo mbɔsa kɛnɛ kakiwɔ komonga la dikimɔ, vɔ wakashisha lotshungɔ lawɔ la dimɛna efula. Vɔ wakayokomaka fumbe ka pɛkato ndo oko akawatɛ Nzambi, nyɔi akayoyelaka oma lâsɔ. Sango diakawatshikɛ anawɔ ko pɛkato mbut’ate eongelo kɛnama oma lo dionga diôtɔ laso diatosokoya paka otsha lo kɔlɔ. Pɛkato akela nto wɔdu wa demba wele lo kiɔkɔ ya hemɔ, lotshundu l’osombe ndo ya nyɔi. Nsaki ka sala kɔlɔ kamboleka pama l’ɔtɛ wa tɔsɛngiya taki Satana mamboyotondja tshunda di’anto wele la lohetsho, diayakimɔ l’awui wa ngala, w’ɛhɛnyɔhɛnyɔ, ndo l’ata wambodiaka miliyɔ efula y’anto. Dui sɔ tshikitana mɛtɛ la lotshungɔ lakasha Nzambi anto l’etatelo!—Euhwelu k’Elembe 32:4, 5; Jobo 14:1, 2; Romo 5:12; Enyelo 12:9.
Lɛnɛ Akoka Anto Tana Lotshungɔ
6. (a) Lende akoka tanema lotshungɔ la mɛtɛ? (b) Woho akɔna wa lotshungɔ lakatɛkɛtaka Yeso?
6 Lo menda awui wa kɔlɔ wasalema nshi nyɛ, kema dikambo dia diambo di’anto wekɔ lo nyanga dia monga la lotshungɔ l’efula. Ko lende akoka tanema lotshungɔ la mɛtɛ na? Yeso akate ate: “Naka nyu nyayutshikala lu diui diami, keti ambeki ami mete mbenyu. Nyu nyayeya akambu wa mete, ku akambu wa mete wayunyutshungula.” (Joani 8:31, 32) Lotshungɔ lɔsɔ kema woho wa lotshungɔ latolongamɛka anto lam’anyawɔ owandji ɔmɔtshi kana lam’akɔshawɔ woho ɔmɔtshi wa lowandji ko mbela woho okina. Koko, lotshungɔ lɔsɔ mbayoyokandola ekakatanu wele l’anto. Lotshungɔ lakatɛkɛtaka Yeso ele lotshungɔ l’oma lo lɔhɔmbɔ la pɛkato. (Joani 8:24, 34-36) Diakɔ mbele, naka onto ambokoma ombeki wa mɛtɛ waki Yeso Kristo, kete otshikitanu wa woke salemaka lo lɔsɛnɔ lande, mbut’ate nde kondjaka lotshungɔ.
7. (a) Lo yoho yakɔna yambototshungɔ oma lo pɛkato tatɛ oma ko kakianɛ? (b) Dia kondja lotshungɔ lɔsɔ, ahombaso sala?
7 Dui sɔ hadiolembetshiya ɔnɛ ɛlɔ kɛnɛ, Akristo wa mɛtɛ waya bu nto lo shɛngiya y’oma lo nsaki kaso ka lôtɔ ka sala awui wa kɔlɔ. Lam’ele vɔ wakahowɔ pɛkato, vɔ wekɔ lo tetemala ndɔshana la nsaki kakɔ. (Romo 7:21-25) Koko, naka onto ekɔ lo mbɔtɔnganyiya lɔsɛnɔ lande mɛtɛ la wetshelo waki Yeso, kete nde hatotetemala monga ɔhɔmbɔ wa pɛkato. Pɛkato hatoyala nto oko owandji wôfundɛ awui wa nde kitanyiya aha la kanyiya. Nde hatɔsɛna nto yoho ya lɔsɛnɔ yele bu l’oyango ndo yahɛnyahɛnya nkum’otema kande. Nde ayonga la nkum’otema ka pudipudi lo washo wa Nzambi dikambo diɛsɛ oma lo mbetawɔ kande l’olambo wa Kristo, nde ambokondja edimanyielo ka pɛkato yakandasale ntondo. Nsaki ka ntsha pɛkato mbeyaka nyanga dia mbâhemɛ, koko naka nde tona dia ndjela nsaki yakɔ dikambo nde ekɔ lo mbohɔ wetshelo wa pudipudi waki Kristo, kete nde mɛnyaka dia nde aya kema ɔhɔmbɔ wa pɛkato nto.—Romo 6:12-17.
8. (a) Lotshungɔ lakɔna latosha Lokristo la mɛtɛ? (b) Dionga diakɔna diahomba monga laso otsha le mandji ya lɛɛta?
8 Tende lotshungɔ lele laso oko weso Akristo. Takatshungɔ oma l’etombelo wa kɔlɔ wa wetshelo wa kashi, oma lo lɔhɔmbɔ la dikanyiyakanyiya ndo la pɛkato. Akambo wa mɛtɛ wa diambo wendana la eongelo kele la wanɛ wambovɔ ndo la eolwelo wambototshungola oma lo wɔma wa wokoka wa nyɔi. Woho wamboteya dia kem’edja mandji y’ana w’anto wele kema kokele yayolanyema ko pɛnama la Diolelo diaki Nzambi dia losembwe totshungolaka oma lo eongelo k’anto waha l’elongamelo. (Danyele 2:44; Mateu 6:10) Koko, lotshungɔ lɔsɔ hatoshimbe dia monga la dilɛmiyɛlɔ otsha le mandji ya lɛɛta ndo hatosha dikimɔ dia pindola ɛlɛmbɛ awɔ.—1 Petero 2:16, 17; Tito 3:1, 2.
9. (a) Ngande watokimanyiya Jehowa la ngandji tshɛ dia sho monga la lotshungɔ loleki lɔnɛ lakoka monga l’anto ɛlɔ kɛnɛ? (b) Ngande wakokaso mbɔsa tɛdikɔ ta lomba?
9 Jehowa hatotshike dia shamɛ shikikɛ yoho ya lɔsɛnɔ yoleki dimɛna yahombaso ndjela. Nde mbeyaka woho wakatatongama, kɛnɛ katela ɔngɛnɔngɛnɔ wa mɛtɛ ndo kɛnɛ kakoka tela ɛlɔlɔ wa pondjo. Nde mbeyaka tokanyi ndo lɔkɛwɔ lakoka ndanya diɔtɔnganelo di’ɔlɔlɔ diele lam’asa onto la Nde kana lam’asa onto la anyande anto kana tokanyi ndo lɔkɛwɔ lakoka shimba onto akɔ dia nde mbɔtɔ l’andja w’oyoyo. Jehowa tewoyaka akambo asɔ tshɛ la ngandji oma l’ekimanyielo ka Bible ndo k’ɔlɔngɔswamelo ande wɛnama. (Mako 13:10; Ngalatiya 5:19-23; 1 Timote 1:12, 13) Ɔnkɔnɛ, sho mbele l’ɔkɛndɛ wa kamba la lotshungɔ lakatosha Nzambi lɔsɔ dia mbeya kɛnɛ kahombaso sala. Otshikitanyi l’Adama, naka sho ndjela kɛnɛ katetsha Bible, kete tayɔsa tɛdikɔ ta lomba. Tayɛnya dia kɛnɛ kalekaso ndjakiyanya lo lɔsɛnɔ laso ele dia monga la diɔtɔnganelo di’ɔlɔlɔ lam’asaso la Jehowa.
Amɔtshi Nyangaka Woho Okina wa Lotshungɔ
10. Naa woho ɔmɔtshi wa lotshungɔ wayanga Ɛmɛnyi wa Jehowa ɛmɔtshi dia likondja?
10 Mbala mɔtshi, akɛnda kana epalanga ɛmɔtshi wele Ɛmɛnyi wa Jehowa mbeyaka kombola woho okina wa lotshungɔ. Vɔ mbeyaka kotwama efula l’awui wa l’andja ɔnɛ, ndo lam’ayowoleka kanyiya dikambo di’awui akɔ, mbayowoleka monga ndo la nsaki k’efula ka sala awui wambokokanɛ l’andja ɔnɛ wahakoke Akristo mbâsala. Ondo anto asɔ bu l’oyango wa nnɔ nɔnɔ dia wolo, nnɔ wanu wa tshambandeko ndo sala monanyi kana loseka. Koko vɔ tatɛka mbekesanɛ l’anto amɔtshi wele kema Akristo wa mɛtɛ ndo tatɛka la kombola dia sala awui wangɛnyangɛnya anto akɔ. Vɔ mbeyaka tatɛ mbokoya yoho yatɛkɛtawɔ ndo lɔkɛwɔ lawɔ.—3 Joani 11.
11. Tena dimɔtshi, waa na watotshutshuya dia ndjakimɔ l’awui wa kɔlɔ?
11 Tena dimɔtshi, shɛngiya ya sala awui wahɔtɔnɛ la lɔkɛwɔ l’Okristo mbeyaka ndja oma le onto ɔmɔtshi layata di’okambi wa Jehowa mbende. Dui sɔ diakakomɛ Akristo amɔtshi wa ntondo ndo dui diakɔ diamɛ koka salema ndo lo nshi yaso nyɛ. Mbala efula, weho w’anto asɔ nangaka sala akambo wafɔnyawɔ ɔnɛ ayowaela ɔngɛnɔngɛnɔ, ko tete le akambo akɔ hawɔtɔnɛ l’ɛlɛmbɛ waki Nzambi. Vɔ tshutshuyaka anto akina dia ngɛnyangɛnya demba. Vɔ ‘mbalakaka lotshungɔ, etena kele vamɛ wekɔ ɛhɔmbɔ w’awui wa kɔlɔ.’—2 Petero 2:18, 19.
12. Naa etombelo wa kɔlɔ waya oma lo lɔkɛwɔ lahɔtɔnɛ l’ɛlɛmbɛ ndo l’atɔndɔ waki Nzambi?
12 Etombelo w’oma lo woho wa lotshungɔ la ngasɔ mongaka nshi tshɛ kɔlɔ, nɛ dia lɔ tshutshuyaka onto dia sekola ɛlɛmbɛ waki Nzambi. Ɛnyɛlɔ, awui wa mindo wa dieyanelo koka fukutanya yimba y’onto, mbosha hemɔ, nyɔi, diemi di’aha la lolango, ndo kânga mbodiakɛ diwala diande. (1 Koreto 6:18; 1 Tesalonika 4:3-8) Nnɔ nnɔ dia wolo kokaka konya onto ɛkɛlɛkɛlɛ, ndanya woho watondɔtɛkɛtaka, mbolanya washo, mbosha lomba tshimba, mbosha pâ l’ɔhɛngɛlɔ, mbɛnya tɔngɛdi ndo mbokonya lo nyɔi. Dui sɔ koka ndjokonya onto fumbe ka nnɔ nɔ sɔ ndo mbosokoya l’awui w’epetenge l’oyango wa nde kotsha nsaki kande ka kɔlɔ. Etombelo wa ngasɔ mongaka ndo le ambidjɔki wa wanu. (Tukedi 23:29-35) Wanɛ wayasha lo weho w’akambo asɔ mbeyaka fɔnya dia wekɔ la lotshungɔ, koko l’ɔkɔngɔ diko vɔ ndjɛnaka dia waya ɛhɔmbɔ wa pɛkato. Ɔnkɔnɛ, teye dia pɛkato ekɔ owandji wa kɔlɔ efula! Naka sho kana yimba kakianɛ lo dikambo sɔ, kete diɔ koka tokimanyiya dia ndjakokɛ oma l’etombelo wa kɔlɔ ɛsɔ.—Ngalatiya 6:7, 8.
Kiɔkɔ y’Ekakatanu
13. (a) Mbala efula ngande waya nsaki yakonya onto l’akambo wa kɔlɔ? (b) Dia mbeya waa na wele ‘angɛnyi wa kɔlɔ,’ kanyi yaki onto akɔna yahombaso monga la yɔ? (c) Etena kakadimolayɛ wembola wa l’odingɔ 13, ka epole ɔsɛkɛ lo kanyi yaki Jehowa.
13 Tokanyiya yema oma lɛnɛ atatɛ ekakatanu ɛsɔ mbala efula. Bible nembetshiyaka ɔnɛ: “Keli untu l’untu atuhimbamaka lam’akutwamandi ndu lam’ahimbamandi la saki kandi ndame ka kolo. Ku saki kako, lam’atshoto diemi, to kayuta kolo; ku kolo, lam’ulato, to kayuta nyoi.” (Jakoba 1:14, 15) Ko kakɔna katondja weho wa nsaki ya ngasɔ na? Kɛnɛ kɔtɔ lo yimba. Mbala efula, diɔtɔnganelo dia l’anto wahakitanyiya atɔndɔ wa lo Bible mbatongaka lo kiɔkɔ ya dikambo sɔ. Lo mɛtɛ sho tshɛ mbeyaka dia sho pombaka mbewɔ ‘lɔngɛnyi la kɔlɔ.’ (1 Koreto 15:33) Ko woho akɔna wa lɔngɛnyi lele kɔlɔ na? Jehowa akanande lo dikambo sɔ na? Naka sho kana yimba lo wembola ndo l’avɛsa wayela anɛ, kete tayokimanyiyama dia monga la tokanyi t’ɔlɔlɔ.
Onde naka anto amɔtshi mɛnamaka dia vɔ nɛmiyamaka, kete lâsɔ vɔ wekɔ angɛnyi w’ɔlɔlɔ? (Etatelu 34:1, 2, 18, 19)
Onde asawo ndo tɔsɛkɛsɛkɛ tawɔ mɛnyaka dia ekɔ dimɛna sho monga angɛnyi awɔ? (Efeso 5:3, 4)
Ngande wayaoka Jehowa naka tambɔsɔna dia mbɔtɔ lɔngɛnyi l’anto wahawoke ngandji? (2 Ekondo 19:1, 2)
Naka tekɔ lo kamba kana tekɔ lo mbɔtɔ kalasa kamɛ l’anto wele bu ambetawudi, lande na kahombaso menda ɔlɔlɔ? (1 Petero 4:3, 4)
Wendelo wa televiziɔ la waa filmɛ, okambelo wa l’ɛtɛrnɛtɛ, ndo wadielo w’abuku la tojurunalɛ ekɔ weho ekina wakokaso mbɔtɔ lɔngɛnyi l’anto akina. Woho akɔna w’akambo w’oma lo dihomɔ sɔ wahombaso mbewɔ? (Tukedi 3:31; Isaya 8:19; Efeso 4:17-19)
Weho w’angɛnyi wasɔnaso ɛnyawɔ Jehowa lo kɛnɛ kendana la weho w’anto weso? (Osambu 26:1, 4, 5; 97:10)
14. Naa lotshungo la woke lakongɛ wanɛ wakitanyiya Ɔtɛkɛta wa Nzambi la kɔlamelo tshɛ ɛlɔ kɛnɛ?
14 Andja w’oyoyo waki Nzambi waya kasuke. Oma lo tshimbo ya lowandji la Diolelo diaki Nzambi dia l’olongo, anto wayotshungɔ oma lo tɔsɛngiya taki Satana ndo ta dikongɛ diande di’otondo di’akambo dia kɔlɔ. Yema yema, etombelo tshɛ w’oma lo pɛkato wayonyɛma oma le anto wele l’okitanyiya. Ɔnkɔnɛ, vɔ wayokoma kokele lo yimba ndo lo demba, ndo tayonga l’akoka wa sɛna pondjo pondjo lo Paradiso. Ditongami tshɛ diayonga la lotshungɔ lɔtɔnɛ dimɛna la ‘nyuma ka Jehowa.’ (2 Koreto 3:17) Onde ekɔ dikambo dia tshundju dia shisha ɛlɔlɔ ɛsɔ tshɛ nɛ dia diɔnyɔ di’alako w’oma l’atei w’Ɔtɛkɛta waki Nzambi ɛlɔ kɛnɛ? Etena kakambaso la tshundju tshɛ la lotshungɔ laso l’Akristo ɛlɔ kɛnɛ, nyɛsɔ tɛnya hwe ɔnɛ kɛnɛ kalangaso ele dia ‘ngɛnangɛna lo lotshungɔ la lotombo l’ana wa Nzambi.’—Romo 8:21.
Ovuswelo
• Lotshungɔ la ngande laki la pami ndo la womoto la ntondo? Lo na otshikitanyilɔ la lɔnɛ lele l’anto ɛlɔ kɛnɛ?
• Lotshungɔ lakɔna lele l’Akristo wa mɛtɛ? Ngande wotshikitanyilɔ la kɛnɛ kɔsa ase andja ɔnɛ oko lotshungɔ?
• Lande na kele ekɔ ohomba efula mbewɔ angɛnyi wa kɔlɔ na? Otshikitanyi l’Adama, tɛdikɔ taki onto akɔna tahombaso mbetawɔ lo kɛnɛ kendana l’akambo wa kɔlɔ?
[Esato wa lo lɛkɛ 46]
Ɔtɛkɛta wa Nzambi tewolaka ɔnɛ: ‘Tanyokesamake. Lɔngɛnyi la kɔlɔ latolanyaka ditshelo di’ɔlɔlɔ’