Ekadimwelo Lo Wembola Anyu

◼ Awui akɔna wahombaso monga la yewo etena kasambishaso anto wele lo lokanu?

L’andja w’otondo, anto suke la miliyɔ enanɛi wekɔ lo lokanu, ndo amɔtshi l’atei awɔ mɛnyaka wahɔ lo lokumu l’ɔlɔlɔ. (1 Tim. 2:⁠4) Bɛtɛlɛ kɛmɔtshi nongolaka ekanda suke la 1400 ngɔndɔ tshɛ oma le anto wele lo lokanu kana oma le ase nkumbo yawɔ walɔmba ekanda kana di’onto ɔmɔtshi tshɔ dia towaenda. Kânga mbele efula k’anto wele lo lokanu mɛnyaka nsaki ka l’otema ɔtɔi, kɛnɛ keta mɛnyaka dia amɔtshi l’atei awɔ mɛnyaka nsaki ka dungi pende l’oyango wa kondja wahɔ oma le ekambi waki Nzambi. Diakɔ diele, anto tshɛ pombaka menda awui wayela anɛ ɔlɔlɔ etena kasambishawɔ anto wele lo lokanu.

L’ahole efula anto wele lo lokanu sambishamaka oma lo tshimbo ya mikanda. Nɔmbamaka la wolo tshɛ di’aha akadiyɛso fundɛ apami wele lo lokanu mikanda, oyadi kânga l’oyango wa mbasha ekimanyielo ka lo nyuma. Dikambo sɔ pombaka salema paka oma le anangɛso wakoka. Akadiyɛso wakoka koka mbishama ɔkɛndɛ wa fundɛ wamato wele lo lokanu wɛnya wahɔ wa l’otema ɔtɔi l’akambo wa mɛtɛ wa lo Bible. Hawokoke tomɛ anto wele lo lokanu akuta kana weshasha kânga mbakokawɔ nɔmba diangɔ sɔ.

Naka onto ɔmɔtshi lele lo lokanu ambɛnya wahɔ, kete pombaka mbisha etshumanelo katanema lo dihole diele lokanu lakɔ lokombo ndo adrɛsɛ w’onto akɔ. Mbala efula anangɛso wele l’etshumanelo kɛsɔ mbeyaka woho wa kandola weho w’akambo wotshikitanyi wakoka tomba. Naka etshumanelo heyama lo dihole sɔ, kete pombaka mbewoya Bɛtɛlɛ awui akɔ.

Kema kɔlɔ di’anangɛso woshawɔ ɔkɛndɛ ɔsɔ sala losanganya kâmɛ l’ase lokanu l’oyango wa sala wekelo l’efula ka l’atei awɔ mbala ɔtɔi. Koko, etena kasalema awui wa lânde walɔmba di’apandjudi sangana kâmɛ l’anto wele lo lokanu, awui asɔ hawohombe salema l’etei ka lokanu. Ndo nto, kema dimɛna di’apandjudi tshɔ dia tembola onto lele lo lokanu aha la tayalɔngɔsɔdi dimɛna la ntondo ndo monga la diɔtɔnganelo diamboleka efula l’anto wele lo lokanu.

Tonge la “yewu uku elui, ndu memakana uku fudu ya binga” etena katshɔso dia tosambisha anto wele lo lokanu lokumu l’ɔlɔlɔ.​—⁠Mat. 10:⁠16.