Andjelo Wekɔ lo Tokimanyiya
1 “Nyulungi, dimi leko la nyu nshi tshe, edja ndu ekumelu k’andja.” Ɛtɛkɛta ɛsɔ wekɔ mɛtɛ l’ekeketshelo le wanɛ tshɛ wakitanyiya didjango diaki Yeso diata ɔnɛ: ‘Ɔnkɔnɛ, nyotshu ndo nyetɛ anto ambeki.’ (Mat. 28:18-20) Yoho mɔtshi ya shikaa yele Yeso kâmɛ l’Akristo wa mɛtɛ ele lo tshimbo ya andjelo ande. (Mat. 13:36-43) Ekɔ mɛtɛ ɔlɔ mbewoya “lukumu l’ololo la pundju” kâmɛ la ditongami dia lo nyuma dia kɔlamelo sɔ!—Eny. 14:6, 7.
2 L’Olimu Aso w’Esambishelo: Bible mɛnyaka dia andjelo wekɔ lo tomama dia “nkambela wane wayukita panda ulimu.” (Heb. 1:14) Lo ntambe ka ntondo, w’andjelo wakakimanyiya dia nɔmbɔla ambeki waki Yeso otsha le anto wakoka. (Etsha 8:26) Ɛlɔ kɛnɛ, ekambi waki Nzambi wekɔ lo tetemala la mɛna djembetelo y’ɛlɔmbwɛlɔ k’andjelo. Lo waaso efula, lam’atshɔ Ɛmɛnyi wa Jehowa dia tembola anto, anto mbutaka dia vɔ waki lo nɔmba Nzambi dia kondja ekimanyielo. Kâmɛ la w’andjelo, sho mongaka l’ɔngɛnɔngɛnɔ efula lam’awetawɔ anto asɔ losango la Diolelo!—Luka 15:10.
3 La Ntondo k’Ɔlɔshamelo: Danyɛlɛ nde l’ɛlɔngɔlɔngɔ esato wa anyande ase Hɛbɛru, l’ɔpɔstɔlɔ Petero ndo l’anto akina efula wakahomana l’ekakatanu wa welo efula ndo vɔ wakɛnyi woho wakâkokɛ Jehowa oma lo tshimbo y’andjelo wele la “khudu k’utamanya.” (Osam. 103:20; Dan. 3:28; 6:21, 22; Etsha 12:11) Kânga mbele lo tena dimɔtshi sho mbeyaka ndjaoka dia sho ndoko l’ekimanyielo lam’alɔshanaso l’okakatanu, sho koka keketshama oma l’ɛnyɛlɔ kaki okambi waki Elisha lam’akandeye dia “wane weli lasu, ndeka waku weli la wo efula.” (2 Khum. 6:15-17) Kânga wambotokakitola la wolo tshɛ la nkumbo kaso k’Akristo, sho hatohombe shisha elongamelo. Ɔtɛkɛta wa Nzambi toshikikɛka ɔnɛ: “Ondjelo waki [Jehowa] atudingaka wane watuwukaka woma.”—Osam. 34:7.
4 Kem’edja nyemba ya andjelo yayoya dia ndjonya wanɛ tshɛ walɔsha lowandji laki Kristo. (Eny. 19:11, 14, 15) Etena keso lo kongɛ lushi lakɔ, nyɛsɔ totetemale la tombola Jehowa aha la mboka wɔma, l’eshikikelo tshɛ di’alembe wa l’olongo wele lo ɛlɔmbwɛlɔ kaki Kristo wayotosukɛ la wolo tshɛ.—1 Pet. 3:22.