Tokoya Losembwe Laki Jehowa
1 “[Jehowa] atulangaka [“losembwe,” NW].” (Osam. 37:28) Ɔnkɔnɛ, kânga mbakandɔshi yɛdikɔ ya ndanya andja ɔnɛ wa kɔlɔ, nde akalɔngɔsɔla dia ɔhɛmwɛlɔ mbishama ntondo. (Mako 13:10) Dui sɔ mbishaka anto diaaso dia vɔ kadimola etema ndo dia vɔ ndjoshimbamɛ. (2 Pet. 3:9) Onde sho ndjâtshutshuyaka dia mbokoya losembwe laki Jehowa? Onde fɔnu ndo asui wahɛnyahɛnya tshunda di’anto totshutshuyaka dia sho mbewoya anto akina elongamelo ka Diolelo? (Tuk. 3:27) Woho walangaso losembwe ayototshutshuya dia sho sambisha l’ohetoheto.
2 Tosambisha Aha la Shɔnɔdi: Lo mbewoya anto tshɛ sangwelo diaki Nzambi aha la shɔnɔdi, sho mɛnyaka dia ‘tekɔ la losembwe.’ (Mika 6:8) Sho pombaka ndɔshana la nsaki ya kɔlɔ yakotɔ laso ya kanɛka anto akina kɔlɔ oma l’ɛnamelo kawɔ. (Jak. 2:1-4, 9) Jehowa “nangaka antu tshe nshimbamela ndu nkuma lu ewu ka mete.” (1 Tim. 2:4) Ɔtɛkɛta wa Nzambi w’akambo wa mɛtɛ kokaka tshutshuya anto dia sala etshikitanu wa diambo efula lo nsɛnɔ yawɔ. (Heb. 4:12) Naka sho mbeya dikambo sɔ, kete tayotshutshuyama dia sawola l’anto tshɛ l’eshikikelo, oyadi wanɛ wakatonaka tohokamɛ lo nshi yakete.
3 Kadiyɛso kɛmɔtshi kakakambaka lo makashinyi akokaka kidiya kɛmɔtshi kakayaka mbala la mbala dia ndjosomba diangɔ wɔma l’ɔtɛ w’ɛnamelo kande. Koko, lam’akandakondja diaaso di’ɔlɔlɔ, nde akahembe mbosambisha awui wendana la Paradiso kakalake Nzambi. Pami kɛsɔ akokadimola mbala kakɔ ɔtɔi ate nde hetawɔ ɛkɔndɔ w’anyanya ndo ɛlɛmbɛ wendana l’ɔlɔtɔ ndo la lɔkɛwɔ ndo akate dia nde nɔɔka didjoyadjoya. Koko kadiyɛso kopekɔ. Lushi lɔmɔtshi pami kɛsɔ akambola kadiyɛso kɛnɛ kakandakanyiyaka lo dikambo dia divo diande di’etale. Ɔnkɔnɛ, la yewo tshɛ nde akolembetshiya kɛnɛ kata Bible lo dikambo sɔ. (1 Kor. 11:14) La wedi a pindju, kadiyɛso akambe heyama nɛ dia pami kɛsɔ akatonya ndɛdu ndo tokitshakitsha divo diande. Nde akalɔmbɛ dia tatɛ mbeka Bible, ko ɔnangɛso ɔmɔtshi akangɛnangɛna dia mbeka la nde, nde akahame lo wekelo ko akayoyakimɔka ndo akayobatizamaka. L’ɛnyɛlɔ ka pami kɛsɔ, anto efula wakambɛ Jehowa ɛlɔ kɛnɛ wekɔ la lowando lo monga aha la shɔnɔdi, lo welo wadjawɔ dia sambisha anto losango la Diolelo.
4 Kem’edja nto, Jehowa ayanga ndjonya anto wa kɔlɔ oma lo nkɛtɛ k’otondo. (2 Pet. 3:10, 13) L’etena kambotshikala kɛnɛ, nyɛsɔ tokoya losembwe laki Jehowa lo mbisha anto tshɛ diaaso dia vɔ ndjoka etena kayoya elanyelo k’andja wa kɔlɔ ɔnɛ waki Satana.—1 Joa. 2:17.