“Ofundelo w’Oshika w’Ɛtɛkɛta w’Akambo wa Mɛtɛ”
Tekɔ la diɛsɛ dia monga l’ekanda l’ɛtɛkɛta ɛmɔtshi watɛkɛtama l’ɛtshi kaso ka nkɛtɛ. Dui sɔ mbɔtɔnɛka l’ɛtɛkɛta wa prɔfɛsiya wata dia “antu dikumi w’uma l’eteketa tshe wa wedja wayukimela usi Juda otoi,” mbut’ate wayosangana kâmɛ l’Akristo w’atshikadi w’akitami w’esɔ dia kambɛ Jehowa. (Zek. 8:23) Lo ɛlɔmbwɛlɔ k’Olui-Walɔmbɔla, biro ka Filialɛ kaso mbetshaka wenya efula ndo kambaka la wolo ndo la falanga efula dia tosha ‘mbo ya ndɛ ya lo nyuma lo tena diayɔ.’
Kânga mbele ɛtɛkɛta efula l’atei awɔ tɛkɛtamaka l’asawo aso wa lushi la lushi, tɔtɔi t’ɛtɛkɛta toto mbele la ekanda wambofundamaka lɔkɔ. Diɔ diakɔ diele, ɛtɛkɛta akɔ bu la lokongɛ la dimɛna ndo tɔtɛkɛta ta lɔkɔ koka tshikitana lo ndjela dihole la dihole. Ɔnkɔnɛ, ekɔ tshondo y’okakatanu dia funda ekanda l’ɛtɛkɛta aso wa lôtɔ. Koko, Olui-Walɔmbɔla ekɔ lo tosha dihomɔ di’ohomba efula diatokimanyiya dia funda ekanda wele la nɛmɔ efula.
Tena dimɔtshi, wandja mbeyaka mbɔtɔ kânga mbeso la nsaki ka kadimola “ɛtɛkɛta w’amɛna ndo ofundelo w’oshika w’ɛtɛkɛta w’akambo wa mɛtɛ.” (Ond. 12:10, NW) Naka opandjudi ɔmɔtshi ambolanga mbisha lokanyi lande lo kɛnɛ kendana la tshɛkɛta kana dindja diafɔnyande, kete nde mbeyaka fundɛ biro ka Filialɛ. Koko, la ntondo ka nde ntsha dui sɔ, nde pombaka tayashikike dia kana kanyi yande yekɔ shikaa lo dikambo dialangande fundɛ biro. Ayoleka dimɛna nde tasawudi ntondo l’ɔnango ɔmɔtshi lele la eokelo k’ɔlɔlɔ k’ɔtɛkɛta akɔ kana l’omendji w’otshimbedi l’etena kayondembola etshumanelo. Ndeka dimɛna sala ngasɔ lo dihole dia sawola dikambo sɔ l’ose nkumbo ka Bɛtɛlɛ ɔmɔtshi.
Okadimwelo w’ekanda aso l’ɛtɛkɛta efula wa lôtɔ nɔmbaka dia tonga tɔtɛkɛta tɔmɔtshi ta teokrasi. Ndo paka oma l’ɔsɛdingwelo wa dimɛna ndo lo kana yimba efula mbayɔtshiyamaka tɔtɛkɛta tɔsɔ l’ekanda oko lo Tshoto y’Etangelo kana l’Olimu Aso wa Diolelo. Dia nama kâmɛ l’atei w’ekambi waki Nzambi, sho nɔmbaka tshumanelo tshɛ ndo djekoleko dikumanyi dia kamba la tɔtɛkɛta tɔsɔ ndo aha vɔ tonga tɔtɛkɛta t’eyoyo. Nyoyashikikɛ dia tɔtɛkɛta takamba lanyu mbɔtɔnɛka la tɔtɛkɛta ta teokrasi tele l’ekanda aso.