Mukanda w’oma le Olui-walɔmbɔla

LO MIKANDA efula wakatomɛ Paulo tshumanelo, nde akatomɛ mɔyɔ lo mbuta ate: “Ngandji ka mamba kayali le nyu, ndu ki k’uma le [Nzambi] Shesu, la Khumesu Jesu Kristu.” Ɛtɛkɛta ɛsɔ mɛnyaka hwe kɛnɛ kakombolɛso ɔm’ɔmɔ la l’atei anyu.​—⁠Ef. 1:⁠2.

Ande lowando lele laso lo ngandji ka mamba kakatɛnya Jehowa oma l’olambo wa tshungo waki Yeso Kristo lee! Diɛsɛ la olambo wa tshungo mbotetawɔma le Nzambi. Otondonga oma lo welo aso eto tshike hatokokaki kondja diɛsɛ sɔ pondjo, oyadi tekɔ lo mbeka Bible la etete, tekɔ lo sambisha lokumu l’ɔlɔlɔ, kana tekɔ lo kamba elimu ekina w’ɛlɔlɔ. Edimanyielo ka pɛkato la elongamelo kaso ka lɔsɛnɔ la pondjo, kema difuto di’oma lo welo wadjaso, koko ekɔ losha lɛnya ngandji ka mamba ka Jehowa lo tshimbo ya Yeso Kristo.​—⁠Romo 11:⁠6.

Paulo akafundɛ anyande ambetawudi ate: “Shu . . . tambunyosengasenga shati: tanyulungulaki ngandji ka mamba ka [Nzambi] anyanya; ne dia ndi akati ati: L’etena k’ololo, lakakuhukama; lu lushi la panda, dimi lakakukimanyia. Ulungi, kakiane eko etena k’ololo; enda, kakiane eko lushi la panda.” Ɔsɔ akikɔ “etena k’ololo” ka la ntondo ka elanyelo ka Jerusalɛma lo ntambe ka ntondo. Akanga w’etema ɛlɔlɔ wakokaka Jehowa ngandji wakakondja panda ka lo nyuma. Kɛsɔ akakimanyiya wanɛ tshɛ waki la kɔlamelo dia vɔ pandja nsɛnɔ yawɔ, lo ndawɔ oma la Jerusalɛma la ntondo ka elanyelo kayɔ lo ɔnɔnyi wa 70 T.D.​—⁠2 Kor. 6:​1, 2.

Ɛlɔ kɛnɛ, sho lawɔ tekɔ lo nsɛna lo “etena k’ololo” la lo “lushi la panda.” Anto tshɛ wetawɔma le Jehowa oko ekambi ande ndo wakondja panda ka lo nyuma wekɔ la elongamelo ka ndjohandja nsɛnɔ yawɔ lo “lushi la wuki la [Jehowa]” laya k’onyɔ.​—⁠Zef. 1:⁠14.

Oyelo wa lushi la Jehowa toshaka ɔkɛndɛ w’ohomba efula. Sho pombaka mbewola anto dia lushi lakɔ ndo kimanyiya akanga w’etema ɛlɔlɔ dia vɔ kondja wahɔ oma lo ngandji ka mamba ka Jehowa dia ndo vɔ lawɔ ndjokondja panda. Paulo akɛnya ohomba w’ɔkɛndɛ ɔsɔ lam’akandafunde ate: “Fono keko le mi, naka dimi halasambisha lukumu l’ololo!” Nde akɛnya nsaki kande nto lo mbuta ate: “Dimi leko la dibasa le . . . akanga yimba ndu le akanga dinginya. Okone dimi la pusa efula [ka sambisha] lukumu l’ololo.”​—⁠1 Kor. 9:16; Romo 1:​14, 15.

Jehowa ayoyokoya la so naka sho minya yimba l’olimu w’ohomba efula ɔsɔ wa mbewola anto. Sho mbeyaka dimɛna kɛnɛ kakatɛ Jehowa omvutshi Ezekiyɛlɛ ate: “On’a untu, dimi lambukudja undakanyi wa khumbu ka Isariyele. Okone ulungi aui w’uma l’unyo ami, uwaewuli la aui ami. Naka dimi lambutela untu a kolo nti: mete we ayovo, ndu naka we hutedi untu a kolo kuyanga mbewula uma lu mbuka kandi ka kolo, untu ako a kolo ayuvo lu kolo kandi, keli dimi layukolomba dikila diandi.”​—⁠Ezek. 3:​17, 18.

Nshi y’ekomelo nyɛ yekɔ wolo mbikikɛ. Ɔnkɔnɛ, ekɔ tshondo y’okakatanu dia monga la wɛdimo lo kɛnɛ kendana la ɛkɛndɛ wa lo nkumbo, elimu wa l’emunyi, ɛkɛndɛ wa l’etshumanelo la esambishelo. Lâdiko dia lâsɔ, efula ka l’atei anyu wekɔ lo ndɔshana la hemɔ, ɔkɔmwɛlɔ, lotshundu, ndo tena dimɔtshi la ɔlɔshamelo. Efula ka l’atei anyu wekɔ la “wetshu wa wulu.” Sho nangaka nyɛnya nsaki kele laso otsha le nyu, lo yoho yɔtɔnɛ la kɛnɛ kakate Yeso ɔnɛ: “Nyuyi le mi, nyu tshe watukambaka ndu weli la wetshu wa wulu, ku dimi layunyusha mumuya.” (Mat. 11:28) Sho mandolaka ɔm’ɔmɔ la l’atei anyu lasala la wolo tshɛ dia tetemala kambɛ Jehowa la kɔlamelo l’atei w’ekakatanu wa weke kana wa totshitshɛ.

Lo andja w’otondo, yɛdikɔ ya l’atei atei y’anto 4762 wekɔ lo batizama lomingu tshɛ. Ɔsɔ ekɔ ɔtshɔkɔ wa Jehowa ndo etombelo w’oma lo ohetoheto anyu l’olimu w’esambishelo la wa mbetɛ anto ambeki. L’ɔnɔnyi w’olimu wetshi, tshumanelo di’eyoyo 1375 diakatema. Sho nɔmbaka ndo tekɔ l’eshikikelo shate dibuku d’oyoyo nɛ Bible etshatɔ mɛtɛ?, diatanema lo ɛtɛkɛta ndekana 120, diayokimanyiya miliyɔ y’anto dia vɔ kondja wahɔ oma lo ngandji ka mamba ndo ki k’oma le Jehowa lo “lushi la panda.”

Nyeye dia Olui-walɔmbɔla nyôkaka ngandji ndo nɔmbaka dikambo dianyu. Sho nyoshaka losaka nto lo alɔmbɛlɔ wasalanyu lo dikambo diaso.

Anangɛnyu,

Olui-walɔmbɔla w’Ɛmɛnyi wa Jehowa