Waewoyelo

◼ Ekanda wayotosha anto Ngɔndɔ ka samalo: Dibuku Créateur kana Ɔngɛnɔngɛnɔ wa lo nkumbo. Ngɔndɔ k’esambele ndo k’enanɛi: Sho koka mbisha anto biukubuku tshɛ yele la ndjɛkɛ 32 l’atei wa tɔnɛ tɛnyishami lo Olimu aso wa Diolelo wa Ngɔndɔ ka tanu. Ngɔndɔ ka divwa: Tayosha anto dibuku Bible etshatɔ mɛtɛ? Welo wa lânde wayodjama l’oyango wa tatɛ wekelo wa Bible mbala ka ntondo kasawolaso la onto. Naka ompokami ekɔ ladiɔ, kete ɛnyande woho wakokande kondja wahɔ lɔkɔ lo mbɛnya lo tshena pe woho wekaso l’anto Bible.

◼ Omendji walɔmbɔla kana onto ɔmɔtshi layondɔsɔna pombaka mbɛdika kɔntɛ k’etshumanelo ka Ngɔndɔ ka sato, ka nɛi ndo ka tanu. Kam’ayonyotsha wɛdikelo ɔsɔ ko nyu mbewoya etshumanelo l’ɔkɔngɔ wa mbadia alapɔlɔ wa kɔntɛ wa mbala ketshi.​—Enda Instructions pour la comptabilité des congrégations (S-27).

◼ Tatɛ numɛlɔ ka Ngɔndɔ ka ntondo 1, 2008, Tshoto y’Etangelo ya lo Lingala ndo ya lo Oluba yayotatɛka tomba ndo lo alɛta wa weke. Tshoto y’Etangelo y’alɛta a weke shɔ yayongaka paka la asawo wa wekelo ato. Apandjudi wele l’okakatanu wa mɛna l’ɔtɛ wa lotshundu mbeyaka kombola kondja wahɔ oma lo woho wa Tshoto y’Etangelo shɔ ndo vɔ kokaka ndjilɔmba oma le okambi wendana la periodikɛ. Okambi wendana la periodikɛ ayolodja fɔrmilɛrɛ M-202. Sekeletɛlɛ k’etshumanelo pombaka ndjashikikɛ dia fɔrmilɛrɛ kɛsɔ kambotomama lo Bɛtɛlɛ lo etatelo ka Ngɔndɔ k’esambele.

◼ Tambolanga nyohola dia wembelo wa esambo wa Diolelo ekɔ etenyi kɛmɔ k’ɔtɛmwɛlɔ aso. Ɔtɛmwɛlɔ aso mongaka dimɛna efula etena kembaso kâmɛ ndo aha l’ofukutanu. Diɔ diakɔ diele ase etshumanelo tshɛ pombaka memba lo ɔtɛkɛta ɔtɔi, mbuta ate l’ɔtɛkɛta wa etshumanelo kawɔ. Lo yoho yɔtɔnɛ la diewoyelo sɔ, sho nyɔlɔmbaka dia nyu nyomadia mukanda wa Ngɔndɔ ka hende 1, 2004, djekoleko lo odingɔ 3.

◼ Tshoto y’Etangelo ya Ngɔndɔ k’esambele 1, 2007 yayonga la sawo diele l’ɔtɛ a dui ɔnɛ: “Onde anto wa waoho tshɛ kokaka monga kâmɛ?” Lo menda ohomba wa dimbola sɔ, etshumanelo tshɛ kayolonga yɛdikɔ ya lâdiko ya pursa 10 ya numɛlɔ kɛsɔ.