Ekongelo ka losanganya la lânde layaye la lushi ɔtɔi
Ɔtɛ a dui wa losanganya la lânde la lushi ɔtɔi la lo ɔnɔnyi w’olimu 2008 wata ɔnɛ: “Sho tekɔ diwomba, Jehowa kele Okengi aso,” mbɔsama oma lo Isaya 64:8. Alako w’oma lo Afundelo wayotokondja oma lo tshimbo ya losanganya lɔsɔ ayoleka tokimanyiya dia sho shihodia ndo fudia lowando laso lo kɛnɛ kendana la lomba, losembwe, wolo ndo ngandji kele la Jehowa, Okengi a Woke.
Sawo diayosha omendji w’otshimbedi diata ɔnɛ: “Tokambe oko diangɔ dia nɛmɔ l’olimu w’esambishelo,” diayotɛnya woho wataleke anto efula kondja ɛtshɔkɔ wa mbeya akambo wa mɛtɛ ndo sambisha anto akina. Sawo diata ɔnɛ: “Okanelo wa yimba wayotokokɛ” diayɛnya woho watokokɛ tshelo ya kana yimba dimɛna lo atɔndɔ wosembwe waki Jehowa. Ɔtɛkɛtshi w’ɔngɛndangɛnda ayosha asawo wele l’ɛtɛ w’awui ɛnɛ: “ ‘Tatoyelake andja ɔnɛ’ ” ndo “Tetawɔ dia kengama oma le Okengi a Woke.” Ambutshi ndo ana wayokeketshama oma lo asawo anɛ: “Ɛlɔngɔlɔngɔ l’esekaseka wele ohomba le Jehowa” ndo “Ɔkɛndɛ w’ohomba efula wele l’ambutshi l’olimu w’okengelo.” Oma lo wɛnyɛlɔ ndo ɛkɔnya, tayɔngɛnangɛna efula dia mpokamɛ ndo mɛna kɛnɛ kasala anangɛso l’akadiyɛso l’olimu w’esambishelo. Wanɛ wakombola nongola batismu dia mɛnya ndjakimɔ kawɔ le Nzambi pombaka mbewoya omendji walɔmbɔla aha la tshimbatshimba. Tohɛke Tshoto y’Etangelo yayɛ yayekama lo lomingu layosalema losanganya la lânde la lushi ɔtɔi.
Okengi a Woke kotshaka asangwelo ande tshɛ. Koko, shoamɛ mbahomba sɔna woho wahombande tokenga. Wanɛ wetawɔ la lomba tshɛ ɛlɛmbɛ waki Jehowa, kokaka lo ɛnyɛlɔ ka diwomba diele lo anya wa okengi, kengama ndo nɔngɔswama dimɛna dia monga mpoke y’awomba y’ohomba. Etena kakambaso kâmɛ la Jehowa, sho tombolaka lowandji lande ndo sho kondjaka ɛtshɔkɔ efula.