Tɔkɛndɛkɛndɛ oko akanga a tomba
1 Etena kakalɔmbɛ Yeso amundji wa nse anɛi dia vɔ monga ambeki ande, vɔ kotshimbatshimba dia mbɔsa yɛdikɔ, “kem’edja vo . . . wakûyeli.” (Mat. 4:18-22) Etena kakakadimola Saulo ka la Taraso otema ndo kakandatatɛ mɛna nto, nde lawɔ kotshimbatshimba, “kem’edja ndi akasambisha dikambu dia Jesu lu temwelo.” (Etsha 9:20) Wenya wekɔ lo tatetemala mbeta ndo naka vɔ wambeta, kete wambeta lo pondjo. Diɔ diakɔ diele ekɔ ohomba efula dia sho ‘kɛndakɛnda oko akanga a tomba’ lo kɛnɛ kendana la woho wakambaso la wenya aso.—Ef. 5:15, 16.
2 Akambo wa shashimoya: Mbeyaka monga ko diaaso diele laso ɛlɔ dia kambɛ Jehowa hatotonga la diɔ lui. (Jak. 4:14) ‘Akambo wa shashimoya’ komɛka anto tshɛ. (Und. 9:11) Ndo nto, sho tshɛ tekɔ lo tatshunde ndo lo dikongɛ nɛ di’akambo hatokoke mbewɔ “nshi ya kolo” yaya la lotshundu l’osombe ndo kɛsɔ todjɛka wekamu lo kɛnɛ kakokaso sala l’olimu wa Jehowa. (Und. 12:1) Ɔnkɔnɛ, hatonga dui dia lomba dia tshimbatshimba dia ndjâkimɔ le Nzambi kana dia kongɛ etena koleki dimɛna dia sho ndjohamia olimu aso lo yɛdikɔ yokokiso sala ɛlɔ kɛnɛ. (Luka 9:59-62) Abarahama akayokondja wɔladi lo nshi yande y’osombe ndo akavu aya “usumbi a lukusumbi [ndo] akunduya andja” nɛ dia nde akakambe la lɔsɛnɔ lande la lomba, mbuta ate akalikimɔ tshɛ le Jehowa.—Etat. 25:8.
3 Nshi yambotshikala yaya bu efula: Sho nangaka nto kamba la wenya aso la lomba nɛ dia ‘nshi yambotshikala yaya bu efula.’ (1 Kor. 7:29-31) Kem’edja, andja w’omusu ɔnɛ wayanga komɛ. Waaso wele laso wa mbisha lonya l’otshumanyelo wa woke w’anto wele oko ɛkɔkɔ lo etena ka “dinela dia la kete” hatotonga la wɔ nto. (Eny. 14:15) Sho pombaka nsɛna wolo diaha mbetawɔ di’ekiyanu wa lo lɔsɛnɔ ndo awui wekola yimba tɔsɛ wenya wahombaso mbetsha lo olimu w’esambishelo. (Luka 21:34, 35) Tayonga mɛtɛ l’ɔngɛnɔngɛnɔ efula etena kayotohɔ dia takayasha tshɛ l’ohetoheto lo dinela!
4 Sho pombaka tetemala nsɛna wolo dia sho kamba la waɛsɛ w’olimu w’ɔngɛnɔngɛnɔ wakoka monga la ntondo kaso. Nyɛsɔ tɔshi yɛdikɔ ya sala kɛnɛ tshɛ kakokaso sala dia kambɛ Jehowa “uku lushi letawo vati: elo.” (Heb. 3:13) Lo sala ngasɔ, tayɛnya mɛtɛ dia tekɔ akanga a tomba, nɛ dia “one latutshaka lulangu la [Nzambi], atuyalaka pundju.”—1 Joa. 2:17.