Tɔlɔngɔsɔlɛ eyoyo dia vɔ mbikikɛ ɔlɔshamelo
1 Etena katatɛ anto mbeka Bible ndo ‘kakombolawɔ dia nsɛna lo yoho yɔtɔnɛ la omamemelo wa Nzambi,’ vɔ sɔmamaka oma le Satana. (2 Tim. 3:12) Ɔlɔshamelo mbeyaka ndja oma le asekawɔ wa l’olimu, wa la kalasa ndo asukanyi awɔ. Ndo dui sɔ kokaka monga wolo efula etena kalɔshama eyoyo oma le ase nkumbo yawɔ.—Mat. 10:21; Mako 3:21.
2 Bible kakatatshi dikambo di’ɔlɔshamelo: Eyoyo pombaka mbeya dia wayɔlɔshama ndo dui sɔ mɛnyaka dia vɔ wekɔ ambeki wa mɛtɛ waki Kristo. (Joa. 15:20) Tena dimɔtshi, anto mbeyaka mbalɔsha l’ɔtɛ wa tokanyi ta kɔlɔ tele lawɔ lo dikambo di’Ɛmɛnyi wa Jehowa. Vɔ pombaka mbohɔka dia ɔngɛnɔngɛnɔ w’efula ndjaka etena kashamawɔ sɔnyi l’ɔtɛ wewɔ ambeki waki Yeso ndo wakitanyiyawɔ Nzambi. (Etsha 5:27-29, 40, 41) Toshikikɛ eyoyo dia Jehowa mbasukɛka la ngandji. (Osam. 27:10; Mako 10:29, 30) Etena kalamawɔ olowanyi awɔ, vɔ mbetaka lo wedi wa Jehowa lo kɛnɛ kendana la lowandji la l’andja w’otondo.—Tuk. 27:11.
3 Ohomba wa ewo k’oshika: Kɔkɔmiya ambeki ayɛ wa Bible ohomba wa tetemala kondja ewo k’oshika oyadi ekakatanu wakoka pomana la wɔ. Oma l’ɔlɔshamelo, Satana nyangaka dia shimba diaha kɛnɛ kekawɔ monɛma l’etema awɔ wa didjidji. (Tuk. 4:23; Luka 8:13) Vɔ pombaka tetemala kondja ewo k’oshika ka lo Ɔtɛkɛta wa Nzambi dia vɔ tshikala nge lo mbetawɔ.—Osam. 1:2, 3; Kol. 2:6, 7.
4 Ohomba wa ekikelo: Ekikelo kekɔ ohomba efula etena kahomana onto l’ekakatanu ndo vɔ kokaka tondja etombelo w’ɛlɔlɔ. (Luka 21:16-19) Etena kakikɛ eyoyo ɔlɔshamelo, vɔ kondjaka wahɔ ndo kimanyiyaka anto akina. Vɔ mɛnaka dikoka diele la Jehowa dia tshulwɛ wanɛ wakikɛ la kɔlamelo ɛtshɔkɔ.—Jak. 1:12.
5 Ɔpɔstɔlɔ Paulo akangɛnangɛna etena kakandɛnyi Akristo wa la Tɛsalɔnika watahame lo nyuma. Nde akasha Nzambi losaka lo dikambo diawɔ. Efula ka l’atei awɔ waki anto wakandakimanyiya lo akambo wa mɛtɛ. (2 Tes. 1:3-5) Sho lawɔ kokaka monga l’ɔngɛnɔngɛnɔ wa ngasɔ ndo l’ɔlɔ etena kalɔngɔsɔlaso ambeki aso wa Bible dia vɔ mbikikɛ ɔlɔshamelo.