Tosuke kanyi y’Afundelo lo dikambo dia okundelo—Etenyi 4
Etena katshɔso lo ekundelo walɔngɔswama oma le anto wele bu Ɛmɛnyi wa Jehowa
1. Kakɔna kahatahombe mbohɛ naka tambelamɛ lo sɛlɛmɔnyi kɛmɔtshi k’okundelo kɔlɔngɔswami oma le onto lele bu Ɔmɛnyi wa Jehowa?
Oko wakadiɛnya sawo diele l’ɔtɛ a dui ɔnɛ: “Ambola w’oma le ambadi” dia lo Tshoto y’Etangelo ya Ngɔndɔ ka tanu 15, 2002 lo Falase, ntshɔ lo sɛlɛmɔnyi y’okundelo yɔlɔngɔswami lo yoho yɔtɔnɛ la wetshelo wa kashi wa l’ɛtɛmwɛlɔ ekɔ dikambo dia woke, oyadi sɛlɛmɔnyi kakɔ kayosalema lo luudu l’ɔtɛmwɛlɔ kana la ngelo. Tatohɛke dia sɛlɛmɔnyi y’okundelo yasalema lo luudu l’ɔtɛmwɛlɔ mendanaka mɛtɛ la wetshelo ndo la ɛtɛkɛta wasukɛ dietawɔ diahɔtɔnɛ l’Afundelo, ɛnyɛlɔ oko wetshelo w’ɔnɛ anima w’onto havu ndo w’ɔnɛ anto w’ɔlɔlɔ tshɛ wayotshɔ l’olongo. Olalelo wa l’andja, wembelo wa nkembo y’ɛtɛmwɛlɔ, alɔmbɛlɔ wasalema lo nkombo y’ashidi, elambo wa waa nyama ndo kutimɛ nkina y’apanganu salemaka lo sɛlɛmɔnyi shɔ.
2. a) Lande na kele Okristo wotɔ l’onto lambovɔ pombaka menda ɔlɔlɔ? Sha bɛnyɛlɔ. b) Kakɔna kakoka sala Okristo diaha nde ndjoyatambiya lo kutimɛ y’apanganu?
2 Mbala mɔtshi, vɔ nɔmbaka la wolo dia ase nkumbo sala awui amɔtshi wa lânde w’ashidi. Ɛnyɛlɔ, vɔ mbeyaka nongamɛ dia ɔna l’enondo lele Okristo sala tshelo mɔtshi yahɔtɔnɛ l’Afundelo lo lokombo la she kambovɔ kele bu Ɔmɛnyi wa Jehowa. Ɛnyɛlɔ kekina: Lam’avusha womoto omɛnde, vɔ nongamɛka dia nde kitanyiya kutimɛ mɔtshi y’apanganu. La ntondo k’akambo wa ngasɔ, Akristo pombaka menda ɔlɔlɔ diaha ndjosala kɛnɛ kele kɔlɔ. Mbokɛmaka hwe dia hatohombe konga nyɔi ka lakiso ɔmɔtshi dia sho ndjewoya ase nkumbo kaso wele kema ambetawudi yɛdikɔ yaso dimɛna. Naka vɔ wambotashilaka mbeya yɛdikɔ yaso, kete hatonga wolo dia sho nama wɛdimo aso wa lo nyuma oyadi tɔsɛngiya takɔna tayohomana la so l’etena k’otanda.
3. a) Naka Okristo ɔmɔtshi nangaka ntshɔ lo okundelo w’onto ɔmɔtshi lele bu ombetawudi, ambola akɔna wahombande ndjaoka? b) Lo ndjela 1 Koreto 8:12, 13, dui diakɔna diahombaso ndeka mbidja yimba lo dihole diaha nyangiya ewotɔ aso wele bu ambetawudi?
3 Ko kayotota naka Okristo nangaka ntshɔ l’okundelo w’osekande ɔmɔtshi, w’ose nkumbo kana w’osukanyi ande wele bu ombetawudi? Nde pombaka ndjambola ɔnɛ: ‘Naka dimi tanema l’atei w’olui w’anto wele vɔ tshɛ ndjashaka lo ditshelo di’oma l’ɔtɛmwɛlɔ wa kashi, onde ayonga wolo le mi dia shika tanga diaha sala akambo oko vɔ? Onde otanemelo ami lo dihole sɔ koka fukutanya nkum’otema k’ase etshumanelo amɔtshi? (Mat. 18:6) Onde otanemelo ami lo dihole sɔ koka tondja owanu lam’asami l’anto wahashihodia lande na katonami dia sala awui amɔtshi?’ Tatohɛke nto shɛngiya yakoka monga la dikambo sɔ lo nkum’otema kaso hita. Sho pombaka ndeka mbidja yimba lo wâle wa fukutanya nkum’otema kaso kana k’anto akina wakoka ndja oma lo otshwelo aso lo sɛlɛmɔnyi k’okundelo lo dihole dia ndeka mbidja yimba lo wahɔ wayotokondja naka sho ntshɔ lɛkɔ.—Ɛdika la 1 Koreto 8:12, 13.
4. a) Naka tambɛna dia sho kokaka toyatambiya lo ditshelo diokakatanyi l’ɔtɛmwɛlɔ wa kashi, yɛdikɔ yakɔna yahombaso mbɔsa? b) Lo tena diakɔna diɛna anto amɔtshi ɔlɔlɔ ntshɔ dia tenda wanɛ wambovusha dia mbâkimanyiya ndo mbâkeketsha? Ndo lande na?
4 Ko, kayotota naka tambɛna ɔnɛ lo ntshɔ lo sɛlɛmɔnyi y’okundelo sho koka ndjadja lo wâle wa sala dui dimɔtshi diahasale Akristo, takanya anto akina kana ndjonga l’ewanu l’anto wele bu ambetawudi? Kânga dikambo ɔtɔi l’atei w’akambo woshidiso ango koka shimba Okristo diaha nde ntshɔ l’okundelo w’onto lele bu ombetawudi. Naka nkum’otema k’Okristo kambowotɛ diaha nde ntshɔ, ndoko ose etshumanelo ɔtɔi lahomba mɔnyɔla yɛdikɔ yande kana nyanga. Amɔtshi wakɛnyi ɔlɔlɔ dia ntshɔ tembola nkumbo kambovusha la ntondo kana l’ɔkɔngɔ w’okundelo. Lo tena dia ngasɔ, ondo nkumbo kambovusha koka ndeka monga suke dia mpokamɛ kɛnɛ kata Bible. Lo waaso asɔ, naka sho mbisha onto dikuta lo shɔpɔ, kete nkumbo mbayokondja wahɔ oma l’ekimanyielo kaso. Lo nyanga etena koleki dimɛna ka kimanyiya ndo ka sukɛ nkumbo kɛsɔ, sho ndjakokɛka lo nyuma ndo sho ndjashikikɛka dia kɛnɛ kashaso nkumbo kakɔ mandɔmaka ndo kekɔ ohomba.
5. a) Ngande wɔsa anto efula sɛlɛmɔnyi y’okundelo? b) Ɛkɔkɔ akɔna washa anto amɔtshi dia mɛnya lande na katshɔwɔ lo sɛlɛmɔnyi efula y’okundelo?
5 Tatɔnyɔlake wâle wakoka tokomɛ: Le anto efula, sɛlɛmɔnyi y’okundelo mbâkimanyiyaka dia pomana l’anto efula ndo dia tɔlɛ ndo tɔnɔ l’anto. Mɛnana ndo mɛnama oma le anto akina lo waaso asɔ mbɔsamaka oko dui di’ohomba efula le wɔ. Naka onto hatshwe, kete ayonga oko nde ambɔtɛnga nkumbo kambovusha. Amɔtshi mbokaka wɔma nto ɔnɛ: Naka hawotshu mbala la mbala lo sɛlɛmɔnyi y’okundelo y’anto akina, kete anto yema tshitshɛ tsho mbakoka ndjoya lam’ayokoma mbala kawɔ! L’ɔtɛ w’ɛkɔkɔ ɛsɔ, anto ntshɔka lo sɛlɛmɔnyi efula y’okundelo lo wikɛndɛ akɔ wâmɛ. Vɔ ntshɔka oyadi haweyana dimɛna l’onto lovwe kana l’ase nkumbo kande. Onde monga la kanyi ya ngasɔ lo dikambo dia sɛlɛmɔnyi y’okundelo mbɔtɔnɛka la kanyi yaki Nzambi?
6. a) Adia Efeso 5:15, 16. Ngande wakoka otshwelo wa mbala efula lo sɛlɛmɔnyi y’okundelo mbidja lonyuma laso lo wâle? b) Lande na kele bu dui dia lomba toma ose nkumbo ndamɛ lo sɛlɛmɔnyi y’okundelo?
6 Atɛmɔdi wa mɛtɛ waki Jehowa pombaka kana yimba lo shɛngiya yayonga la otshwelo wa mbala la mbala lo sɛlɛmɔnyi y’okundelo lo lonyuma lawɔ. Onde ayonga dui dia lomba dia mbɔsa wenya efula lo wikɛndɛ dikambo dia sɛlɛmɔnyi y’okundelo oleki wenya wayowetsha l’esambishelo kana l’elimu ekina wa teokrasi? (Ef. 5:15, 16) Sɛlɛmɔnyi y’okundelo y’ase andja ɔnɛ kakatanyemaka mbala efula la ditshelo diahɔtɔnɛ l’Akristo, ɛnyɛlɔ oko ɔnwɛlɔ wa wanu wa tshambandeko ndo awui wa mindo wa dieyanelo. Sho kokaka ndjambola ɔnɛ: ‘Onde ayonga dui dia lomba dia dimi ntshɔ dimamɛ, kana toma olonganyi kana ose nkumbo kami ɔmɔtshi ndamɛ otsha l’osomba kana ngelo kɛmɔtshi k’etale lo sɛlɛmɔnyi y’okundelo?’ Sho tshɛ pombaka mbeya wâle wakoka tokomɛ naka sho ndeka ndjasha lo ditshelo diahangɛnyangɛnya Jehowa ndo dui sɔ diayonga l’etombelo wa kɔlɔ l’ohamelo aso wa lo nyuma ndo lo lonto laso l’Okristo.—Eny. 18:4.
7. Lembetshiya kɛnɛ kakakomɛ Akristo amɔtshi waki kokamba la dako diele lo Tukedi 22:3.
7 Tena dimɔtshi, Akristo wele bu la yewo wakɔnyɔla wâle wakoka mbakomɛ ko wakonge la lɔkɛwɔ la kɔlɔ. Amɔtshi wakashisha ɛkɛndɛ awɔ ndo akina wakatshanyema oma l’etshumanelo k’Akristo. Bible mbutaka ɔnɛ: “Kanga yewo atenaka elanyelu, atuyasheka.” (Tuk. 22:3) Naka sho shihodia tɔndɔ sɔ lo mbidja yimba lo wâle wa lo nyuma ndo wendana la lɔkɛwɔ wakoka tokomɛ, kete dui sɔ diayototshutshuya dia sho monga la yewo la ntondo ka mbɔsa yɛdikɔ ya ntshɔ kana ya tona dia ntshɔ lo sɛlɛmɔnyi y’okundelo yɔlɔngɔswami le anto wele bu Ɛmɛnyi wa Jehowa.
8. a) Elɛwɔ tshunda diendana l’awui w’okundelo? b) Lande na kele bu dui dia lomba dia Akristo wa mɛtɛ mbɔtɔ lɔkɔ?
8 Lo ahole amɔtshi, anangɛso l’akadiyɛso wakɔtɔ lo atshunda wendana l’awui w’okundelo. Mbala efula atshunda asɔ kengamaka l’anto woye oma lo dioho kana kabila kâmɛ. Vɔ nɔmbaka di’anto wa lo tshunda sala ɛkɔngɔ dia tana falanga ya ndjokundɛka anto wa lo tshunda diawɔ. Vɔ nongamɛka di’anto wa l’atshunda asɔ monga lo sɛlɛmɔnyi y’okundelo ndo mbisha lonya lɔkɔ. Onde ekɔ dui dia lomba dia mbɔtɔ l’atshunda wa ngasɔ? Lo ngelo kɛmɔtshi, kadiyɛso kɛmɔtshi akɔtɔ lo tshunda dimɔtshi diendana l’awui w’okundelo aha l’ambutshi ande mbeya. Lam’akandavu, ase tshunda sɔ wakaye lemba la woke dia ndjohoma nkombe, ndjemba esambo ndo ndjɔnɔ wɛnyɛ. Nkumbo ka kadiyɛso wakahembe dia mbashimba, koko aha la tshimbatshimba awui wakaleke fukutana ndo wakanyangiya ambutshi asɔ la Akristo akina wakaye lo sɛlɛmɔnyi k’okundelo. Mbeya dia diɔtɔnganelo dia kɔlɔ ndanyaka lonyuma laso pombaka tokimanyiya dia shihodia ɔnɛ ekɔ dui di’enginya monga la diɔtɔnganelo la atshunda wa ngasɔ.—1 Kor. 15:33.
Afundelo wekɔ la kanyi yele la wɛdimo ndo yokɛma hwe
9. a) Ngande wɛnya 1 Koreto 10:21 wâle wa ndjakimɔ lo kutimɛ y’apanganu? b) Kakɔna kayotomba naka ose etshumanelo ambɔnyɔla alako w’oma lo Olimu aso wa Diolelo wendana la sɛlɛmɔnyi y’okundelo ndo amboyakimɔ lo kutimɛ y’apanganu? c) Adia Euhwelu k’Elembe 18:9-13 ndo Jeremiya 7:16-19. Ngande wakayaoke Jehowa lo kɛnɛ kendana la ditshelo dia woho akɔ wâmɛ diaketawɔ wodja wa Isariyɛlɛ?
9 Koreto ka ntondo 10:21 totɛka ɔnɛ: “Nyu hanyeyi no dikoho dia Khumadiondjo, ndu dikoho di’edienge.” Ekambi wa Nzambi kitanyiyaka ɔhɛmwɛlɔ ɔsɔ. Kakɔna kayotomba naka l’ɔtɛ wa tɔsɛngiya t’oma le ambutshi kana asukanyi ande wele bu ambetawudi, ose etshumanelo amboyasha lo mbekelo kana kutimɛ y’apanganu? Naka nde ambosala dui diendana l’ɔtɛmwɛlɔ wa dikishi kana osanga w’ɔtɛmwɛlɔ, kete ɔsɔ ayonga apɔstazi ndo tɛdikɔ pombaka mbɔsama dia ndjashikikɛ ɔnɛ etshumanelo kambotshikala pudipudi.—Euh. 18:9-13; Jer. 7:16-19.
10. a) Lo ndjela Osambu 97:10, kanyi yakɔna yahomba monga la so lo kɛnɛ kendana la wetshelo w’ɔnɛ anto wambovɔ mbeyaka awui amɔtshi? b) Koreto ka ntondo 10:32, 33 toshaka ɔkɔkɔ w’oshika wa tona kutimɛ shɔ. Naa ɔkɔkɔ akɔ?
10 Tonge la kanyi yele la wɛdimo lo dikambo dia nyɔi: Kakɔna kayotokimanyiya dia monga la kanyi yele la wɛdimo lo dikambo dia nyɔi ndo lo ditshelo diɔtɛkɛtshiso la diko ndo? Sho pombaka nanga Jehowa l’otema aso tshɛ ndo ‘mpetsha kɛnɛ kele kɔlɔ.’ (Osam. 97:10) Pombaka tona kutimɛ yokakatanyi la wetshelo w’ɔnɛ anto wambovɔ kokaka monga la shɛngiya lo nsɛnɔ y’anto. Lo wedi okina, ngandji k’efula kokaso wanyaso anto kayotoshimba dia sala dui tshɛ diakoka mbâtakanya kana fukutanya nkum’otema kawɔ.—1 Kor. 10:32, 33.
11. a) Lo ndjela Efeso 5:8, naa toho ta sala akambo ndo ta kanyiya tahahombe monga l’ekambi wa Nzambi? b) Shɛngiya yakɔna yahomba monga la 1 Tesalonika 4:13 lo lɔkɛwɔ laso lo etena k’okundelo?
11 Naka sho shihodia dimɛna eongelo k’anto wambovɔ, kete dui sɔ diayotoshimba diaha monga la tokanyi t’anto wele lo wodjima wa lo nyuma ndo dia sala akambo oko vɔ. Tayotona tɔsɛngiya ta wanɛ walɔngɔsɔla sɛlɛmɔnyi y’okundelo yele l’oyango wa tombola ndo wa nɛmiya anto wambovɔ, kana wa mɛnya dihole diele la wɔ lo tshunda ndo lomombo la l’emunyi lele la wɔ. Tatetawɔke pondjo dia sɛlɛmɔnyi y’okundelo fukutanya elimu wa teokrasi woleki ohomba. Hatohombe nyanga naka onto ambɔsa yɛdikɔ yaha ntshɔ kana yaha telɛ lo sɛlɛmɔnyi mɔtshi y’okundelo. Akristo wa mɛtɛ wekɔ la kanyi yotshikitanyi ndo salaka akambo lo yoho yotshikitanyi nɛ dia akambo wa mɛtɛ wa lo Bible mbalɔmbɔlaka. (Ef. 5:8) Sho ndelaka wakiso wa ngandji wambovɔ ndo mbâkundɛka la kɛnɛmɔ kɛnya dia tekɔ la lonyuma l’ɔlɔlɔ, ndo sho salaka dikambo sɔ la wɛdimo ndo lo yoho yɔtɔnɛ la Bible.—1 Tes. 4:13; 5:5, 8, 11.
12. a) Adia 1 Petero 4:4. Etena katonaso dia ndjakimɔ lo kutimɛ ya kɔlɔ, kakɔna kahombaso nongamɛ le anto wele bu la so dietawɔ ɔtɔi? b) Lo ndjela Tukedi 29:25, lande na kahatahombe pondjo mbetawɔ dia wɔma w’onto monga la shɛngiya lo tokanyi ndo lo lɔkɛwɔ laso?
12 Tatokake anto wambovɔ wɔma: Hatolange pondjo takanya ndoko onto. Koko, oko wele ditshelo di’ɔlɔlɔ diaki Yeso diakanyangiya wanɛ waki koshihodiaka akambo wa mɛtɛ wa lo Bible, mbele ndo woho wasukɛso ɔtɛmwɛlɔ wa pudipudi ayonyangiya anto amɔtshi. (Joa. 6:60, 66) Anto wele bu la so dietawɔ ɔtɔi kokaka tɔ̂nyɔla, tɔtɛnga ndo tosoya l’ɔtɛ watonaso dia ndjatambiya lo kutimɛ y’apanganu. (1 Pet. 4:4) Wakahɔtɔla Ɛmɛnyi wa Jehowa diangɔ diawɔ ndo wakatone dia mbâkimanyiya nɛ dia vɔ wakakukutɛ kɛnɛ kele ɔlɔlɔ. (Joa. 15:19) Akina wakɔsama oko anto wa wâle; wakâsɔngwɛ ɔnɛ haweye nsɛna l’anto ndo hawɔlɛnya anto wambovɔ. Awui asɔ hawotɔngɛnyangɛnya, koko lo mbeya dia sho tshikitana l’ase andja ɔnɛ, sho nongamɛka dia anto tosalɛ awui wa ngasɔ. (2 Tim. 3:12) Lo dihole dia sɛngiyama la wɔma w’onto, sho nɔmbwamaka la wɔma w’ɔlɔlɔ waha nyangiya Jehowa Nzambi.—Tuk. 29:25; Etsha 5:29.
13. a) Kakɔna kata anto amɔtshi lo dikambo dia Ɛmɛnyi wa Jehowa? b) Ohemba akɔna wahombaso shika tanga, ndo ngande wakatosha Yeso ɛnyɛlɔ lo dikambo sɔ?
13 Towasha diaaso dia vɔ mɛna otshikitanu wele lam’asaso la wɔ: Anto amɔtshi mbutaka ɔnɛ: “Ɛmɛnyi wa Jehowa haweye woho wa kundɛ anto awɔ.” Onde ɛtɛkɛta ɛsɔ totshindjaka wɔɔngɔ? Kana onde sho toyangaka mbala mɔtshi dia mbaɛnya ɔnɛ sho mbeyaka woho wakundɛ wakiso wa ngandji? Tohɔ dia etena kakalɔmbɛ Satana Yeso dia nde mɛnya ɔnɛ nde ekɔ Ɔnaki Nzambi lo fumbɔ oma lo tshoto ya tɛmpɛlɔ, Yeso kombetawɔ dui sɔ. Nde kombetawɔ sɛngiyama dia sala kɛnɛ kele kɔlɔ dia mambiya anto akina. (Mat. 4:5-7) Woho akɔ wâmɛ mbele, hatohombe nyanga dia mɛnya anto ɔnɛ sho mbeyaka kundɛ edo aso lo mbokoya toho talɔngɔsɔla anto wele bu ambetawudi sɛlɛmɔnyi yawɔ y’okundelo. Ngande wakoka dui sɔ salema?
14. a) Naa pɛkato ka woke kakasale ase Isariyɛlɛ? b) Lo ndjela Etumbelu 32:28, lo na ele kanyi yawɔ kɔmbɔtɔnɛ la yaki Jehowa, ndo kakɔna kakâkomɛ?
14 Ɔmɛnyi wa Jehowa hahombe pondjo ndjakimɔ lo tshelo mɔtshi y’apanganu. Koko, naka hatongi la yewo sho koka ndjonga la kanyi ya kɔlɔ yakayɔkɔka ekambi wa Nzambi wa lo nshi y’edjedja lɔkɔ. Ase Isariyɛlɛ wakasale yana ya ngɔmbɛ ya paonyi yakawatɛmɔla ndo wakate ɔnɛ: ‘Ɔnɛ ekɔ lushi la woke le Jehowa.’ (Etum. 32:5.) Vɔ wakayakese lo fɔnya ɔnɛ Nzambi ayetawɔ ɔsɔhanyelo w’ɔtɛmwɛlɔ wa mɛtɛ la wa kashi. Vɔ mɛtɛ wakayakese! Dui sɔ kɔngɛnyangɛnya Jehowa, ndo ase Isariyɛlɛ suke la 3000 wakadiakema.—Etum. 32:28.
15. a) Adia Ngalatiya 6:12 ndo Euhwelu k’Elembe 12:30. Kakɔna kahatohemba ekambi wa Nzambi sala pondjo, ndo lande na? b) Kânga mbahemba anto dia minya awui w’apanganu wa kutimɛ shɔ, ngande watetemala Akristo wa mɛtɛ mbɔsa kutimɛ yakɔ lo ndjela 1 Koreto 10:20 ? c) Lo ndjela Malaki 3:18, kakɔna kayɛna anto naka sho sukɛ la dihonga tshɛ kɛnɛ kele ɔlɔlɔ ndo kanyi y’Afundelo lo dikambo dia okundelo?
15 Ekambi wa Nzambi hawotohemba pondjo nɔngɔsɔla sɛlɛmɔnyi yoye oma le apanganu oko olalelo wa l’andja, sɛlɛmɔnyi yasalema l’ɔkɔngɔ wa okundelo, anivɛrsɛrɛ wa nyɔi k’onto ndo ditshelo dikina dia mindo lo minya awui amɔtshi w’apanganu wokakatanyi l’ɛtɛmwɛlɔ wa kashi ko mbahɛnya l’awui wafɔna la wa l’ɔtɛmwɛlɔ wa mɛtɛ. Awui asɔ koka ngɛnyangɛnya wanɛ wele bu ambetawudi ndo mbakonya dia vɔ fɔnya ɔnɛ Ɛmɛnyi wa Jehowa waya la yoho yawɔ hita ya sala sɛlɛmɔnyi y’apanganu shɔ. (Ngal. 6:12; Euh. 12:30) Sho mbɔsaka kutimɛ shɔ woho weyɔ mɛtɛ, mbuta ate yɔ yekɔ kutimɛ yahangɛnyangɛnya Nzambi, y’apanganu ndo yahɔtɔnɛ l’ɔtɛmwɛlɔ wa mɛtɛ. (1 Kor. 10:20) Lo monga la kanyi shɔ, sho mbishaka anto diaaso dia vɔ ‘mɛna otshikitanu wele lam’asa onto ɔlɔlɔ la onto la kɔlɔ, wanɛ wakambɛ Nzambi la wanɛ wahokambɛ.’—Mal. 3:18.
16. a) Naa alaka wa diambo wayanga kotshama kem’edja? b) Yɛdikɔ yakɔna yahomba mbɔsa ɔmɔmɔ la l’atei aso?
16 Kem’edja, nyɔi hatonga nto. Asɔyi, nyangu, ndo ekiyanu aso wayoshila etena kayolola Jehowa wanɛ wakavu. (Eny. 21:4) Elongamelo ka mɛnana la wakiso wa ngandji wakavu nemanɛka la kɔlamelo yaso nshi nyɛ. Etena kakongɛso ekotshamelo k’alaka asɔ wa diambo, nyɛsɔ toyashikikɛ diaha tanema kânga la vadi oma le Jehowa ndo tonge anto wamboyakakitola tshɛ lo tshɛ l’andja ɔnɛ wa kɔlɔ ndo la ditshelo diawɔ diahangɛnyangɛnya Nzambi!—2 Pet. 3:14.